Pritčy 24 - Библия - Пэ Балтитко Романи чиб (Романэс) 2019

¹ На зэвлынэ (на ревнин) бибахталэ́ манушэ́нгэ, и на манг зоралэ́с тэ явэс лэ́нца;

² пал-дова́ со лэ́нгиро ило́ придуминэла нахратыма (насилиё), и лэ́нгирэ ушта́ ракирэ́на, соб (кай) тэ кэрэ́н дош (фуипэ́н).

³ Кхэр ґаздэ́на (чхувэ́на) годыпнаса, и лэс рикирэ́на годя́са;

⁴ и лэ́скирэ шту́бы (комнаты) исын пхэрдэ́ дрогонэ́ и кучонэ́ барвалыпнаса.

⁵ Годо́ ману́ш исын зорало́; и годьваро́ ману́ш прибарьякирэла зоралыпэ́н кэ пэ́скири зор.

⁶ Пал-дова́ со го́дла годьварэ́-дыибнаса тумэ́ лыджа́на пэ́скиро марибэ́н; и кай бут исын мануша́, савэ́ дэ́на го́дла, одо́й явэ́ла зракхибэ́н.

⁷ Годыпэ́н исын древа́н вучэ́с дылыниньконэстыр: ёв на отпхандэла пэ́скиро муй дрэ по́рта.

⁸ Кон придуминэла тэ кэрэ́л биба́хт, одова́ явэ́ла кхардо бибахтярискиро.

⁹ Дылыно́ придуминэла екх грэ́хо, и манушэ́стыр, саво́ исын бипатывакиро кэ яви́р мануша́, рикирнапэ дрэ риг (брыдинэна) яви́р мануша́.

¹⁰ Ко́ли ту пэрэса дро ило́ дро трашакиро дывэ́с, то ту́тэ исын набари зор.

¹¹ Зра́кх одолэ́н, савэ́н лыджа́на пэ мэрибэ́н, и зарикир одолэ́н, савэ́ обштавэнапэ анги́л мулякирибэн [исын сэндякирдэ тэ мэрэ́н-р.с.].

¹² Ко́ли тумэ́ пхэнэ́на: “Чачо́, амэ на джиндям дава́”, тэды Кодова́, Саво́ ублавэла (важынэла) илэ, ци на ґалёла дава́? Кодова́, Саво́ ракхэ́ла тыро́ ило́, ци на джинэ́ла Ёв дава́? И Ёв отдэ́ла кажнонэ́ манушэ́скэ ада́кицы, кицы́ ёв исын мол пал лэ́скирэ рэ́нды.

¹³ Мро чха́ва? Ха авги́н, пал-дова́ со ёв исын лачхо́, и авгинытко сото, саво́ исын гудло́ ваш тыро́ кирло [смако-ю.о.]:

¹⁴ адя́кэ-паць явэ́ла ваш тумаро́ ди джиныбэ́н пал годыпэ́н; ке́ли тумэ́ латхнэ́ лэс, тэды исын англыпэ́н, и тумари́ наде́я на хасёла.

¹⁵ На подракх тэ замарэс (на придумин биба́хт), пашы́л кхэр, кай исын чачуно́ ману́ш, ту сан фуй ману́ш, на пхагир лэ́скиро откхиныбнытко штэ́то;

¹⁶ пал-дова́ со чачуно́ ману́ш сашты́ (могинэ́ла) тэ пэрэ́л эфта́ (битринэ́нгиро дэш) мо́лы и ёв уштэ́ла, нэ фуй ману́ш пэрэ́ла дрэ бари би́да.

¹⁷ На ра́дынпэ зоралэ́с, ке́ли тыро́ вэ́рго пэрэ́ла, мэк тыро́ ило́ тэ на явэ́л радо, ке́ли ёв обштавэлапэ,

¹⁸ соб (кай) Рай Дэвэ́л тэ на дыкхэ́л дава́, и тэ на явэ́л холямо́, и, соб (кай) ёв тэ на рискирэ́л пэ́скири холы́ долэ́ манушэ́стыр.

¹⁹ На ґаздэпэ холя́са пэ бибахталэ́ манушэ́ндэ, и на зэвлынэ (на завидын) фуе́ манушэ́нгэ:

²⁰ пал-дова́ со на явэ́ла англыпэ́н ваш бибахталэ́ манушэ́нгэ, фуе́-манушэ́нгиро момолы́тко (свети́льнико) мурдёла.

²¹ Мро чха́ва! Дар Ра́стыр-Дэвлэ́стыр и крали́стыр; на яв кхэтанэ́ манушэ́нца, савэ́ зракирэнапэ тэ ґаздэ́н бу́нто.

²² Пал-дова́ со екха́тыр (сра́зу) бари би́да явэ́ла пэ лэ́ндэ, и кон джинэ́ла, саво́ бэдыпэн (би́да) явэ́ла лэ́ндыр.

²³ Ѓа́да, исын годэ́-манушэ́нгирэ лава́: “Дава́ исын намишто тэ явэс пэ вари конэ́скири риг пэ сэ́ндо.”

²⁴ Кон ракирэ́ла бангэ́ манушэ́скэ: “Ту ракирэ́са чачипэ́н”, одолэ́с манушыпнаскирэ на́цыи явэ́на тэ прокошэн; Наюды́тка мануша́ явэ́на фуес тэ ракирэ́н пал лэ́стэ;

²⁵ пэ кодолэндэ, савэ́ бангякирэна фуе́ манушэ́н, явэ́на зоралэ́с тэ радынэ́нпэ и дро́го бахтякирибэ́н явэ́ла пэ лэ́ндэ.

²⁶ Чачуно́ отпхэныбэ́н исын сы́рбы чамудыпэн дрэ ушта́.

²⁷ Англэды́р кэр пэ́скири буты́ яврестыр, и почхув гив пэ фэ́лда; тэ́ньчи ґа́здэ пэ́скиро кхэр.

²⁸ На яв хохано́ якхи́тко (лжэсвидетелё) пэ пэ́скирэ пашатунэстэ би причынакиро, со́скэ тэ хохавэс пэ́скирэ уштэ́нца.

²⁹ На ра́кир: “Мэ кэра́ва адя́кэ лэ́скэ, сыр ёв кэрдя́ ма́нгэ. Мэ отда́ва палэ манушэ́скэ пал лэ́скири буты́.”

³⁰ Мэ гиём набутитконэ-манушэ́скирэ фэлдаса и пир винаграды́тко фэ́лда, кай набарэ́-годя́киро ману́ш исын;

³¹ и одо́й ёв сыс забарино пхусадытконэ бустенца. Лэ́скири фэ́лда сыс учхакирды цукнудяса (стракиваса), лэ́скири баруны ва́нта сыс пхагирды тэлэ́.

³² Ке́ли мэ дыкхцём, мэ ґалыём, со дава́ сыс куч, мэ подуминдём и дорэсцём сыклякирибэ́н:

³³ на́бут соибэн, на́бут линдра (дрёма), на́бут счхув ва́нта тэ откхинён!

³⁴ И тыро́ чорорипэн явэ́ла сы́рбы марибны́тко пирангачо и тыри́ трэ́бима явэ́ла сы́рбы ману́ш мардытконэса.