Pritčy 22 - Библия - Пэ Балтитко Романи чиб (Романэс) 2019

¹ Лачхо́ лав исын дрогэдыр (кучэдыр) барэ́ барвалыпнастыр, и лачхи́ мавлы́н (малва) исын кучэдыр рупэ́стыр и сувнака́стыр.

² Барвало́ и чороро́ ману́ш дыкхэнапэ екх екхэ́са: Рай Дэвэ́л создыя́ лэн дуе́н.

³ Барэ́-годя́киро ману́ш дыкхэ́ла анги́л биба́хт (би́да) и гарадёла, нэ просто джа́ла анги́л и явэ́ла сэндякирдо.

⁴ Кон кандэ́ла, и дарэ́ла Ра́стыр-Дэвлэ́стыр, кодова́ дорэсэ́ла барвалыпэ́н, паты́в и джиибэ́н.

⁵ Пхусадытка хру́сты (терны) и фэля́ исын пэ дром, кай исын мижэх ману́ш; а кон приракхэла пэ́скиро ди, кодова́ явэ́ла тэ дурьёл лэ́ндыр.

⁶ Сыкля́кир тэрнэ́ чхавэ́с адя́кэ, сыр лэ́скэ трэй дурэды́р тэ дживэ́л, и, ке́ли ёв явэ́ла пхуро́, ёв на джа́ла криг далэ́ дромэ́стыр.

⁷ Барвало́ рикирэ́ла зор пэ чорорэстэ: и кон исын вужло, одова́ исын дына́ри кодолэ́скэ, саво́ покэрдя (конэ́скэ ёв исын банго́).

⁸ Кон почхувэла (сеинэла) начачипэ́н сыр гив пэ фэ́лда, кодова́ кэрэ́ла биба́хт (би́да) пэ́скэ, и лэ́скири зор дрэ холы́ кончынэлапэ.

⁹ Кон исын барвалэ́-илэ́скиро, кодова́ явэ́ла бахтякирдо́, пал-дова́ со ёв дэ́ла пэ́скиро маро́ чорорэнгэ.

¹⁰ Традэ криг адасавэс, саво́ исын бипатывакиро кэ яви́р мануша́, и чинга́рд дурьёла; и кошыбэ́н, и обракирибэн пириячэна.

¹¹ Кон тырдэлапэ кэ жужо́ ило́, и конэ́стэ исын бахталыпэ́н пэ лэ́скирэ ушта́, кадасавэ́ манушэ́скэ кра́ли исын лэ́скиро мал.

¹² Ра́скирэ-Дэвлэ́скирэ якха́ ракхэна джиныбэ́н, нэ Ёв равэла тэлэ́ лава́, савэ́ исын напатяибнаскирэ манушэ́ндыр.

¹³ Набутитко (кирнэ-масэ́нгиро) ману́ш пхэнэ́ла: “Шчэр (ле́во) исын яври́! Мэ ява́ва мулякирдо, пэ вули́цы (пэ га́сы).”

¹⁴ Фуе-джувленгиро муй исын хор ґанби́н (яма); пэрэ́ла одори́к кодова́ ману́ш, пэ конэ́стэ Рай Дэвэ́л холясо́ла.

¹⁵ Дылныпэ́н припхандяпэ кэ чхавэ́скиро ило́, нэ ран (розга), савья́са сыклякирэ́на пхарэ́с, традэ́ла дылныпэ́н криг.

¹⁶ Кон тасавэла (дукхавэла) чорорэс тэ барьякирэл пэ́скиро барвалыпэ́н; и кодова́, кон дэ́ла барвалэскэ, кадасаво́ ману́ш явэ́ла чороро́.

¹⁷ Причху́в пэ́скиро кан и пошун годьварэ́-манушэ́нгирэ лава́, и бандякир тыро́ ило́ кэ миро джиныбэ́н;

¹⁸ пал-дова́ со куч явэ́ла, ко́ли ту явэ́са тэ рикирэспэ кэ ёнэ пэ́скирэ илэ́са, соб (кай) ёнэ тэ явэ́н адя́кэ-паць скэдынэ́ пэ тырэ́ ушта́.

¹⁹ Соб (кай) ту́тэ тэ явэ́л зорало́ патяибэ́н дрэ Растэ-Дэвлэ́стэ, мэ сыклякирава тут и ададывэ́с, и ту ри́пир.

²⁰ Ци мэ на чхиндём ту́кэ трин мо́лы най кучэдыр годэ́ и джиныбнытка лава́,

²¹ соб (кай) мэ могинавас тэ пиридав ту́кэ патяибнытка лава́ пал чачипэ́н, соб (кай) ту могинэсас тэ отпхэнэс палэ патяибнытконэ лавэ́нца кодолэ́нгэ, савэ́ бичхавэна тут.

²² На чор чорорэстыр, пал-дова́ со ёв исын чороро́, на тасав одолэ́н, савэ́н притасавэ́на пашы́л по́рта:

²³ пал-дова́ со Рай Дэвэ́л затэрдёла пал лэ́нгиро рэ́ндо, и лэ́ла криг кодолэнгиро ди, савэ́ обчорэна лэн.

²⁴ На яв мал (на дружын) холынакирэ манушэ́скэ, на ра́кир [на джа́-ю.о.] яглунэ манушэ́са,

²⁵ соб (кай) ту тэ на сыклёс, сыр ёв кэрэ́ла, и соб (кай) ту тэ на чхувэ́с фэлы́ ваш тыро́ ди.

²⁶ На яв кадасавэ́ манушэ́са, саво́ марэла пир васта́ дрэ сымады́ (залого), ци саво́ исын дудвало/якхи́тко (свидетелё) пал вужлыпэна (длуги);

²⁷ пал-дова́ со, ко́ли нанэ ту́тэ со́са тэ плэскирэс, то тэды ту́тыр отлэна тыри́ пасиндлы (постель).

²⁸ На пиричхув ґаратуны шпэ́ра пэ пхув, сави́ тырэ́ дада́ чхудэ́.

²⁹ Ци ту дыкхэ́са манушэ́с, саво́ добусовэс кэрэ́ла пэ́скири буты́? Ёв явэ́ла тэ тэрдёл анги́л кралье́ндэ; ёв на явэ́ла тэ тэрдёл анги́л простонэ (напатывалэ) манушэ́ндэ.