Pritčy 20 - Библия - Пэ Балтитко Романи чиб (Романэс) 2019

¹ Мол (вино) сы́рбы салапэ, сикера (зорало́ пибэ́н) ґаздэ́ла шумо, и конэ́с дава́ злыджала дромэ́стыр, кодова́ исын нагодо ману́ш.

² Холынакиро кра́ли исын сы́рбы шчэр (ле́во), саво́ рыкинэла, кон лэс холякирэла, кодова́ кэрэ́ла грэ́хо пэ пэ́скиро джиибэ́н.

³ Ману́ш кэрэ́ла паты́в пэ́скэ, ко́ли ёв тэрдякирэла кошыбэ́н, нэ кажно дылынинько ману́ш дэ́лапэ тэ чингардэлпэ.

⁴ Кирнэ-масэ́нгиро ману́ш на пхаравэла (на пашынэла) пхув иванта(тэс)киро (зимакиро), ёв явэ́ла тэ мангэ́л, ке́ли явэ́ла счхиныбэн и нанэ нисо́ лэ́стэ.

⁵ Манушэ́скирэ годякирэ ду́мы исын сы́рбы хор пани́, нэ годьваро́ ману́ш пхарэла (вылэла) лэн яври́.

⁶ Бут исын мануша́, савэ́ роспхэнэна сарэ́нгэ пал лэ́нгиро лачхипэ́н, нэ кон латхэ́ла патяибнытконэ манушэ́с?

⁷ Чачуно́ ману́ш дживэ́ла би дошэнгиро: лэ́скирэ чхавэ́ исын бахталэ́ пало́ (после) лэ́стэ.

⁸ Кра́ли, кон исын бэшто́ пэ сэндарискиро штэ́то, росчхурдэла сари́ холы́ (биба́хт) пэ́скирэ якхэ́нца.

⁹ Кон сашты́ (могинэ́ла) тэ пхэнэ́л: “Мэ кэрдём жужо́ ило́, мэ сом бигрэхэнгиро?”

¹⁰ Нароўна ублады́тка (весы) и нароўна меры (тырдынэ) исын сарэ́ дуй начачипэна, савэ́ исын джунгалэ́ (брыдка) Ра́скэ-Дэвлэ́скэ.

¹¹ Адя́кэ-паць и биято́с [тэрнэ́-бэршэнгирэс-р.с.] уджинэна пир лэ́скирэ кэрибэна, ци пир лэ́скири буты́, ци ёй тэ явэ́л бидошэнгири, ци чачуны́.

¹² Кан, со шунэ́ла, и якх, со дыкхэ́ла-исын далэ́ дуй льготы, со Рай Дэвэ́л создыя́.

¹³ На кам тэ совэс, соб (кай) тэ на явэс чороро́: откэр пэ́скирэ якха́ и ту явэ́са чало марэ́са.

¹⁴ “Биба́хт, биба́хт!” – ракирэ́ла ману́ш, кон кинэла; нэ ке́ли ёв джа́ла криг, тэ́ньчи ёв шарэлапэ.

¹⁵ Исын сувнака́й, и бут куч бара́, нэ най дрогэдыр кучипэ́н исын годьварэ́ ушта́.

¹⁶ Лэ криг и́дя кодолэскири, кон исын якхи́тко (дудвало) пал чужонэ́ манушэ́стэ и рикир дава́, сыр сымады́ пал манушэ́стэ рига́тыр.

¹⁷ Маро, со дорэсэлапэ хохаибнаса, исын гудло́ ваш манушэ́скэ, нэ тэ́ньчи (позже) лэ́скиро муй явэ́ла пхэрдо́ прахоса барорэнца.

¹⁸ Кажно годы́ (дума), со тэ кэрэ́с, рисёла дро чачипэ́н, нэ екх, ке́ли ту годыткэс розлэса, тэ́ньчи джа́ марибна́са.

¹⁹ Кон пхукавэла (пиридэла), кодова́ отчхакирэла гарадэ́ ду́мы, палдава́ на яв кхэтанэ́ адасавэса, кон откэрэла буґлэс пэ́скирэ ушта́.

²⁰ Кон прокошэла пэ́скирэ дадэ́с, ци пэ́скирэ да, лэ́скиро момолы́тко (свети́льнико) мурдёла машки́р хор калыпэ́н.

²¹ Миштыпэ́н, со дорэсэлапэ сы́гэс дро англыпэ́н, на явэ́ла бахтякирдо́ пэ ко́нцо (пэ яго́ро).

²² На ра́кир: “Мэ адя́кэ-паць кэра́ва биба́хт палэ лэ́скэ.” Ужакир Рас-Дэвлэ́с и ёв дэ́ла зор ту́кэ.

²³ Нароўна ублады́тка (весы) исын джунгалэ́ (брыдка) Ра́скэ-Дэвлэ́скэ, и хоханэ́ тырдынэ (гири) дава́ исын налачхипэн.

²⁴ Рай Дэвэ́л дэ́ла зор манушэ́нгирэ ґэрэнгэ, карик тэ джа́н, сыр тэ́ньчи манушэ́скэ сашты́ тэ ґалёл пэ́скиро дром?

²⁵ Дава́ исын сы́рбы фэлы́ ваш манушэ́скэ тэ пхэнэ́л сы́гэс (тэ дэл совэ́л), со дава́ исын свэ́нто, и тэ́ньчи (позже) тэ пиридуминэл пэ́скири совла́х.

²⁶ Годо́ кра́ли росчхурдэла фуе́ манушэ́н, и янэ́ла пэ лэ́ндэ сявитко (мельницытко) рота.

²⁷ Манушэ́скиро ду́хо (фа́но) исын Дэвлэ́скиро момолы́тко, со пиридыкхэла саро́, со исын андра́л манушэ́стэ.

²⁸ Лачхэ́-илы́ткима и патяибэ́н ракхэна крали́с, и ёв рикирэ́ла пэ́скиро троно лачхипна́са.

²⁹ Тэрнэ́-манушэ́нгиро барипэ́н исын лэ́нгири зор; и пхурэ́-манушэ́нгири гожыма исын лэ́нгиро сыво шэро́.

³⁰ Дукханэ даба [калэ́ маса́ марибнастыр-р.с.] жужакирэна бибахталэ́ манушэ́с, адя́кэ-паць и пэкаибэна (даба) жужакирэна хор штэ́ты дрэ манушэ́стэ.