Pritčy 2 - Библия - Пэ Балтитко Романи чиб (Романэс) 2019

Пал Годыпэ́н

¹ Ми́ро чхава! Ко́ли ту прилэса мирэ́ лава́, и гаравэса (зракхэ́са) миштэ́с мирэ́ припхэныбэна́ андрэ́ пэ́стэ;

² адя́кэ, со ту пришунэсапэ кэ годыпэ́н, и рискирэса ило́, соб (кай) тэ ґалёс;

³ и, ко́ли ту явэ́са тэ мангэс зоралэ́с пэ́скэ годыпэ́н и ту рискирэса ило́, соб (кай) тэ ґалёс;

⁴ ко́ли ту явэ́са тэ причхувэс зор тэ латхэс годыпэ́н сыр руп, и ту явэ́са тэ родэс годыпэ́н сыр кучипэ́н:

⁵ то тэды ту ґалёса, со́скэ трэй тэ кутякирэс кэ дар Рас-Дэвлэ́с, и тэ уджинэс бутэды́р пал Дэвлэ́стэ.

⁶ Пал-дова́ со Рай Дэвэ́л дэ́ла джиныбэ́н, Лэ́скирэ лавэ́стыр явэ́ла джиныбэ́н и ґалыибэ́н.

⁷ Ёв пригаравэла зракхибэ́н (баро́ годыпэ́н) дэвлытконэнгэ, Ёв исын шчы́то ваш одолэ́нгэ (дыкхэ́ла пал одолэ́ндэ), савэ́ дживэ́на пир чачипэ́н;

⁸ Ёв приракхэла дроморэ, кай исын чачипэ́н манушэ́ндэ, и Ёв ракхэ́ла дрома́ ваш Пэ́скирэ свэнтонэнгэ.

⁹ Тэ́ньци ту ґалёса чачипэ́н, чачипэ́н машки́р манушэ́ндэ, и чачуно́ дром.

¹⁰ Сыр годыпэ́н заджа́ла дро тыро́ ило́, и джиныбэ́н явэ́ла тэ радынэл тыро́ ди;

¹¹ то тэды хор розґалыибэн явэ́ла тэ зракхэ́л тут, а ґалыибэ́н явэ́ла тэ дыкхэ́л ракхибны́ткэс пал ту́тэ.

¹² Соб (кай) тэ выракхэл тут чорэ́ дромэ́стыр, манушэ́стыр, саво́ ракирэ́ла фуипэ́н пэфроми (нарошнэс),

¹³ одолэ́ндыр, савэ́ мэкэ́на чачунэ́ дрома́, соб (кай) тэ псирэ́н калэ́ дромэ́нца дро грэ́хо;

¹⁴ савэ́ исын ра́да тэ кэрэ́н чорипэ́н и древа́н тэ радынэ́нпэ фуипнаскэ (захалэ биладжаипнаскэ),

¹⁵ савэнгирэ дрома́ исын бангэ́ (хоханэ́), и савэ́ кэрэ́на фрэнтэс (хоханэ́с) саро́.

¹⁶ Соб (кай) тэ зракхэ́л тут явирэ-ромэскирэ ромнятыр (чужонатыр), сави́ гудлякирэла пэ́скирэ лавэ́нца,

¹⁷ сави́ мэкця́ дрогонэ́ малэс пэ́скирэ тырныпнастыр, и бистырдя пэ́скирэ-Дэвлэ́скиро завето.

¹⁸ Пал-дова́ со ла́киро кхэр лыджа́ла кэ мэрибэ́н, а ла́кирэ дроморэ джа́н кэ мулэ́;

¹⁹ ние́кх, кон джа́ла кэ ёй, на рисёла палэ, и ёв адя́кэ-паць на тэрдёла пэ джиибна́скиро дром,

²⁰ палдава́ псир лачхэ́ дромэ́са, и ри́кирпэ кэ чачипнаскирэ дроморэ.

²¹ Пал-дова́ со чачипнаскирэ явэ́на тэ дживэ́н пэ пхув, и бидошэнгирэ ячэ́напэ пэ ла́тэ,

²² а фуй мануша́ явэ́на чхурдынэ́ пхувья́тыр, и напатяибнаскирэ выкушэнапэ ла́тыр сыр дылыны чар.