Pritčy 19 - Библия - Пэ Балтитко Романи чиб (Романэс) 2019

¹ Фэды́р тэ явэ́л чороро́ ману́ш, саво́ дживэ́ла пир чачипэ́н, сыр тэ явэ́л хоханэ́-чибакиро (чибьякиро) ману́ш и дылыно́.

² Исын намишто, ке́ли манушэ́стэ нанэ джиныбэ́н, адя́кэ-паць и кон сы́гэс псирэ́ла, одова́ обштавэлапэ (обстэмпинэлапэ).

³ Манушэ́скиро дылныпэ́н бандякирэла лэ́скиро дром, и лэ́скиро ило́ ґаздэ́лапэ холя́са пэ Растэ-Дэвлэ́стэ.

⁴ Барвалэ́ манушэ́стэ ячэ́напэ бут буты́р мала́, нэ чорорэстыр дурьёла лэ́скиро мала́.

⁵ Начачуно якхи́тко явэ́ла сэндякирдо, и кодова́, кон хохавэла, на зракхэ́лапэ.

⁶ Бут мануша́ пэкэнапэ пал ла́ска барэ́ рандыр, и кажно ману́ш исын мал одолэ́скэ, кон дэ́ла.

⁷ Сарэ́ пша́ла чорорэ́-манушэ́скирэ древа́н на камэ́на лэс, пэ кицы́ буты́р лэ́скирэ мала́ дурьёна лэ́стыр! Ёв могинэ́ла тэ мангэ́л лэн палэ лавэ́нца, нэ ёнэ усае́кх мэкэ́на лэс.

⁸ Кон сыклёла тэ явэ́л годэдыр, одова́ пэкэлапэ (заботисола) пал пэ́скиро ди; кон ячэ́лапэ годьваро́, одова́ латхэ́ла лачхипэ́н.

⁹ Начачуно якхи́тко (свидетеле) явэ́ла сэндякирдо, и кодова́, кон хохавэла, хасёла.

¹⁰ Пэсьтима (пышныма) на подджа́ла дылыниньконэскэ, пэ бут буты́р адя́кэ-паць и дынари́скэ на подджа́ла тэ хулаинэ́л пэ тхагарьендэ.

¹¹ Кон хор розлэла, одова́ насыгэс (поволинькэс) холясо́ла, и кодова́ кэрэ́ла барипэ́н пэ́скэ, кон сы́рбы на дыкхэ́ла, ке́ли лэ́скэ кэрэ́на чорипэ́н.

¹² Кра́ли, саво́ холясо́ла, исын сы́рбы шчэр (ле́во), саво́ рыкинэла, лэ́скири ла́ска исын сы́рбы пахлын (роса) пэ чар.

¹³ Дылыно́ чхаво́ кэрэ́ла бари би́да дадэ́скэ; ромны́, сави́ чингардэлапэ, исын сы́рбы пани́, со пэрэ́ла и ўса́ды (сак) чхинэла дрэ кана́.

¹⁴ Кхэр и барвалыпэ́н исын мэкно́ миштыпэ́н дадэндыр, нэ барэ́-годякири ромны́ исын да́ро Ра́стыр-Дэвлэ́стыр.

¹⁵ Набутякирибэн (кирнэ-масэнгирипэн) лыджа́ла манушэ́с дро хор соибэн, и биталанытко ману́ш явэ́ла тэ страдынэл бокха́тыр.

¹⁶ Кон рикирлапэ кэ припхэныбэ́н, одова́ зракхэ́ла пэ́скиро ди. Кон на дыкхэ́ла, со ёв кэрэ́ла, кодова́ мэрэ́ла.

¹⁷ Кон исын лачхэ́-дескиро кэ чорорэ́, кодова́ сы́рбы дэ́ла дро длуго (покэрэла) Ра́скэ-Дэвлэ́скэ, Ёв плэскирэла палэ одолэ́скэ, кон дыя́.

¹⁸ Сыкля́кир кэ дукха́ пэ́скирэ чхавэ́с пака исын наде́я и на кэр дава́ пир ме́ра, соб (кай) ёв тэ на мэрэ́л и на дыкх пэ лэ́скири го́дла.

¹⁹ Древа́н-холынакиро ману́ш явэ́ла тэ страдынэл сэндостыр; ко́ли ту выракхэса (потангинэса) лэс, тэды ту́кэ трэй явэ́ла тэ кэрэ́с дава́ нэвэ́стыр.

²⁰ Шун, сыр дэ́на годы́ ту́кэ, и прилэ́ дова́, ко́ли сыклякирэ́на тут, соб (кай) ту могинэ́са тэ явэс годо́ дрэ палатунэ́ (последня) дывэса́.

²¹ Ману́ш думинэ́ла бут пал саро́ [манушэ́стэ исын бут мысли дро ило́-р.с.], нэ явэ́ла екх, пал со Рай Дэвэ́л дэ́ла годы́, и ёнэ явэ́на тэ кэрэнпэ чачипна́са.

²² Манушэ́скиро кучипэ́н исын лэ́скиро лачхипэ́н, и чороро́ ману́ш исын фэды́р хоханэстыр.

²³ Кон дарэ́ла Дэвлэ́стыр, кодова́ дживэ́ла. Конэ́стэ исын дар, одова́ ячэ́лапэ чало, и биба́хт на пэрэ́ла пэ лэ́стэ.

²⁴ Набутитко (кирнэ-масэ́нгиро) ману́ш чхувэ́ла тэлэ́ пэ́скиро васт дро чаро́, и ёв аж на ґаздэ́ла васт палэ дро пэ́скиро муй.

²⁵ Пэкав одолэ́с, кон сыкавэ́ла бипатыв кэ яви́р, и простонэ-годякирэ явэ́на годэдыр, выракир годьварэ́ манушэ́с и ёв явэ́ла тэ дживэ́л.

²⁶ Кон исын бибахтало́ кэ пэ́скиро дад, и традэ́ла яври́ пэ́скирэ да, кодова́ исын биладжаипнытко и бипатывакиро чхаво́.

²⁷ Пирияч, миро чхаво́, тэ шунэ́с сыклякирибэ́н, саво́ дурьякирэла тут годыпнаскирэ лавэ́ндыр.

²⁸ Фрэнто якхи́тко салапэ холямэс пэ сэ́ндо, и фуе́-манушэ́нгиро муй накхавэла (глытынэла) чорипэ́н (хохаибэ́н).

²⁹ Пэ одолэ́ндэ, савэ́ исын бипатывакирэ кэ яви́р мануша́, исын сэ́ндо, и пэ дылынэскирэ маса́ пэкаибэна (васт тэ марэл).