Pritčy 17 - Библия - Пэ Балтитко Романи чиб (Романэс) 2019

¹ Фэды́р исын шуко маро́, нэ тэ явэ́л рама́нё (миро), сыр исын пхэрдо́ кхэр свэнтонэ́ масэса, нэ кай исын кошыбэ́н.

² Годо́ дына́ри (слуга) рикирэ́ла зор пэ чхавэ́стэ, саво́ кэрэ́ла ладж, и ёв роскэрэла (роздэла) мэкно́ миштыпэ́н машки́р пшалэ́ндэ.

³ Дрэ кака́ви (котло) билавэна (плавинэна) руп, а дрэ бов сувнака́й, нэ Рай Дэвэ́л пропатякирэла илэ.

⁴ Бибахтало́ ману́ш прилэ́ла кэ годы́, со ракирэ́на начачунэ ушта́, нэ хохано́ ману́ш шунэ́ла бэдо чиб, сави́ лыджа́ла пэ хасибэ́н.

⁵ Кон салапэ чорорэстыр, одова́ обракирэла Рас-Дэвлэ́с, Саво́ создыя́ лэс. Кон радынэ́лапэ барэ́ бидакэ, кодолэ́скэ явэ́на вечна мэ́ньки.

⁶ Чхавэ́нгирэ чхаворэ́ исын сы́рбы крали́скири стадык (коро́на) пхуранэ́ манушэ́нгэ, чхавэ́ исын бариканэ лэ́нгирэ дадэндыр.

⁷ Сыр нахрата мануша́ на пхэнэ́на нисо́ фэдэды́р, адя́кэ-паць и патяибэ́н исын, со крали́скири сэмэ́нца на явэ́ла тэ хохавэ́л.

⁸ Да́ро исын куч бар дрэ кодолэскирэ якха́, конэ́стэ ёв исын: карик хула́й тэ на рисёл, да́ро янэ́ла лэ́скэ миштыпэ́н.

⁹ Кон учхакирэ́ла налачхэ́ рэ́нды, одова́ родэ́ла рама́нё (миро): нэ кон ракирэ́ла палэ пал дова́, кодова́ дурьякирэла фэды́р малэн (другэн).

¹⁰ Фэды́р исын хор тэ бангякирэн годэ́ манушэ́с, сыр шэл мо́лы тэ пэкавэс дылынэс.

¹¹ Бибахтало́ ману́ш родэ́ла екх, соб (кай) тэ бунтуинэл, палдава́ биилытко Янго́ло явэ́ла бичхадо́ пэ лэ́стэ.

¹² Фэды́р исын тэ дыкхэспэ ричыхаса (медведицаса), савья́тыр чордэ ричорэн, сыр дылынэса лэ́скирэ дылныпнаса.

¹³ Кон плэскирэла палэ чорипнаса пал лачхипэ́н, биба́хт на явэ́ла тэ дурьёл (на отджала) лэ́скирэ кхэрэ́стыр.

¹⁴ Сыр лэ́на тэ кошэнпэ, дава́ исын сы́рбы пани́, со мэкэлапэ тэлэ́, палдава́ мэк тэ чингардэспэ анги́л, сыр холямо́ кошыбэ́н лэ́лапэ.

¹⁵ Кон чачакирэла (оправдынэла) [промэкэла банг-ю.о.] фуе́ манушэ́нгэ, кон бангякирэла чачунэ́ манушэ́с-далэ́ дуе рэндэ́ндыр (делэндыр) дурьела Рай Дэвэ́л.

¹⁶ Ваш со барвалыпэ́н дрэ васта́ дылынэстэ, соб (кай) тэ явэ́л годо́? Лэ́скиро ило́ на джинэ́ла, со тэ кэрэ́л лэ́са.

¹⁷ Малэскэ трэй лэ́скирэ мал дро кажно часо (цы́ро), чачуно́ пшал явэ́ла, сыр пэрэ́ла биба́хт.

¹⁸ Нагодьваро ману́ш марэла пир васта́ сыр дрэ сымады́ (залого) и ячэ́лапэ якхи́тко (свидетелё) пал пэ́скирэ пашатунэстэ.

¹⁹ Конэ́скэ пир ило́ исын чорипэ́н, одова́ выкэдэ́ла кошыбэ́н. Кон ґаздэ́ла пэ́скири по́рта, одова́ родэ́ла хаськирибэн.

²⁰ Хоханэ́-илэ́скиро ману́ш на латхэ́ла лачхипэ́н; пэ манушэ́стэ, савэ́стэ исын мижэх чиб, пэрэ́ла биба́хт.

²¹ Конэ́стэ латхэлапэ чхаво́, саво́ исын би патывакиро кэ яви́р мануша́, одолэ́скэ манушэ́скэ явэ́ла калыпэ́н. Дад, конэ́стэ исын дылынинько чхаво́, на радынэ́лапэ.

²² Радымакирэ илэ́стыр джа́ла састякирибэн сыр драбэстыр, нэ пхагирдо́ ду́хо (фа́но) шутькирэла кокалы́.

²³ Фуй ману́ш чхувэ́ла мыто (взятка) палэ брэк, соб (кай) тэ рисёл чачипнастыр пэ сэ́ндо.

²⁴ Годыпэ́н джа́ла анги́л якха́ годьварэ́ манушэ́стэ, нэ дылынэскирэ якха́ рознашэнапэ пэ пхувья́кирэ яго́ры (концы).

²⁵ Дылынэ́ чхавэстыр калёла ило́ дадэ́стэ, киркипэн одолэ́ джувля́кэ, сави́ бияндя́ лэс.

²⁶ Тэ сэндякирэс чачунэ́ манушэ́с исын намишто, и тэ марэс крали́скирэ барыдырэ́н пал лэ́нгиро патяибэ́н.

²⁷ Кон исын годьваро́, одова́ ракхибны́ткэс ракирэ́ла, кон ґалёла годэс, кодолэстэ ду́хо (фа́но) на кунинэлапэ.

²⁸ Аж дылынэс гинэ́на пал годэстэ, ке́ли ёв исын штыл; ци кодолэ́с, саво́ запхандэла пэ́скиро муй, лэс ґалёна пал годэ́-шэрэскирэ манушэ́стэ.