Pritčy 16 - Библия - Пэ Балтитко Романи чиб (Романэс) 2019

Соломоно́скирэ Годыпэна

¹ Ману́ш придуминэла пэ́скирэ илэ́са, нэ дова́ со ёв Ра́стыр-Дэвлэ́стыр пэ дава́ отпхэнэлапэ чиба́са (чибьяса).

² Дрэ манушэ́скирэ якха́ сарэ́ лэ́скирэ дрома́ исын бидошэнгирэ, нэ Рай Дэвэ́л роскэдэла (важынэла) тумаро́ ду́хо (фа́но).

³ Допатя Тыри́ буты́ Ра́скэ-Дэвлэ́скэ, и тырэ́ ду́мы рисёна дро чачипэ́н.

⁴ Рай Дэвэ́л кэрдя́ саро́ ваш Пэ́скиро задуминыбэн; и, аж фуе́ манушэ́с ваш хасибны́тко дывэ́с.

⁵ Кажно (сва́ко) пхутькирдо илэ́са ману́ш исын джунгало́ (брыдинэла) Ра́скэ-Дэвлэ́скэ, мэк ёнэ исын дро екх васт екх екхэ́са, мэ совлахава: ние́кх на нашэла бибангипнаскиро.

⁶ Лачхэ́-илыткимаса и чачипна́са отмэкэлапэ банг пал чорипэ́н, кон дарэ́ла Дэвлэ́стыр, кодова́ отджала (дурьёла) бибахтятыр (чорорипнастыр).

⁷ Ко́ли манушэ́скирэ дрома́ исын лачхэ́ Ра́скэ-Дэвлэ́скэ, Ёв кэрэ́ла адя́кэ, со аж лэ́скирэ вэ́рги исын дро рама́нё лэ́са.

⁸ Фэды́р тэ явэ́л на́бут, нэ дорэсно чачипна́са, сыр тэ явэ́л баро́ ко́фо, нэ начачипнаса.

⁹ Манушэ́скиро ило́ обдуминэла пэ́скиро дром, нэ Рай Дэвэ́л сыкавэ́ла (мамуякирэла) лэ́скиро дром.

¹⁰ Крали́скирэ ушта́ исын дэвлякирдэ, лэ́скирэ москэ нашты́ тэ обджал чачипэ́н (тэ хохавэ́л) пэ сэ́ндо.

¹¹ Чачунэ́ ублады́тка (весы) и ублады́тка чашы исын Ра́стыр-Дэвлэ́стыр; сарэ́ тырдынэ (гири) дро гоно́ исын Лэ́скиро кэрибэн.

¹² Кральенгэ исын стэтка (древа́н джунгалэ́) кодолэ́, кон кэрэ́ла чорипэ́н, пал-дова́ со троно рикирлапэ чачипна́са.

¹³ Чачунэ́ ушта́ зоралэ́с радынэна крали́с, и лэ́скэ исын дро́го одова́, кон ракирэ́ла чачипэ́н.

¹⁴ Крали́скиро холякирибэ́н сыкавэ́ла пэ мэрибэ́н, нэ годо́ ману́ш ковлякирэла крали́с.

¹⁵ Сыр крали́скиро муй зяинэла, то джиибэ́н дэ́ла сарэ́нгэ, и лэ́скири ла́ска исын сыр о́блоко вэснакирэ брышындэса.

¹⁶ Пэ бут фэды́р исын сувнака́стыр тэ ячэс годэдыр, и тэ ячэс барэ́-годякирэса исын фэды́р рупэ́стыр.

¹⁷ Чачуно́ дром ваш дэвлытконэнгэ исын дрэ дова́, соб (кай) тэ дурьён чорипна́стыр. Кон рикирлапэ кэ пэ́скиро [ракхэ́ла-р.с.] дром, одова́ ракхэ́ла пэ́скиро ду́хо (фа́но).

¹⁸ Пхутькирибэ́н исын усады (сак) кэ хасибэ́н, ману́ш, саво́ задэлапэ, сыг пэрэ́ла.

¹⁹ Фэды́р исын тэ явэс напхутькирдэ духо́са машки́р кандунэ / простонэ манушэ́ндэ, сыр тэ роскэрэн чордо дорэсыбэ́н машки́р пхутькирдэ́ манушэ́нца.

²⁰ Кон прилэ́ла лав годя́са, одова́ латхэ́ла лачхипэ́н, и кон рисёла кэ Рай Дэвэ́л тэ зракхэлпэ, одова́ исын бахтало́.

²¹ Конэ́стэ исын годо́ ило́, кодова́ кхарэ́лапэ барэ́-годя́киро, гудлэ́ ушта́ барьякирэна сыклякирибэ́н.

²² Конэ́стэ исын годыпэ́н, дава́ исын джиибна́скири ґаны́нг (источнико); нэ тэ сыклякирэс дукханэс пал доша дылынэн-дава́ исын дылныпэ́н.

²³ Годэ́-манушэ́скиро ило́ сыклякирэ́ла лэс, со тэ ракирэ́л, и дэ́ла буты́р джиибэ́н лэ́скирэ уштэнгэ.

²⁴ Куч лава́ исын сыр авги́н (мэда): гудло́ ваш ди, и састыпэн ваш кокалы́.

²⁵ Исын дром, сыр здэлапэ манушэ́скэ, соб (кай) ёв исын чачуно́, нэ ёв ладжала кэ мэрибэ́н.

²⁶ Ману́ш, саво́ кэрэ́ла буты́ пхарэ́с, кэрэ́ла буты́ пхарэ́с ваш пэ́скэ, пал-дова́ со бокхало муй зачхувэла лэс.

²⁷ Бидэвлыткари [фрэнтари-р.с.] ґанавэла биба́хт, и лэ́скирэ ушта́ исын сы́рбы яг, сави́ хачкирэ́ла.

²⁸ Начачуно ману́ш розлыджала чинга́рд, кон гундяринэла (шэпчынэла), одова́ роскэрэла фэдыршонэ малэн.

²⁹ Нахрато ману́ш притырдэла кэ пэ лэ́скирэ пашатунэс, и лыджа́ла лэс налачхэ́ дромэ́са.

³⁰ Кон марэла якхаса (пришчуринэ́лапэ), одова́ придуминэла чорипэ́н; кон дандырэла пэ́скирэ ушта́, одова́ кэрэ́ла чорипэ́н.

³¹ Сыво шэро́ исын сы́рбы крали́скири стадык (коро́на) барипнаса, саво́ исын пэ дром кэ чачипэ́н.

³² Кон поволинькэс (ле́нтэс) холясо́ла, исын фэды́р зоралэ́ манушэ́стыр, и одова́, кон рикирэ́ла зор пэ пэ́скиро ду́хо (фа́но), исын фэды́р одолэ́стыр, саво́ лэ́ла фо́ро.

³³ Жрэбиё чхурдэлапэ дрэ ангаля (полы), нэ кажно мо́ло саро́ кэрэ́лапэ Дэвлэ́скирэ годя́са.