Pritčy 15 - Библия - Пэ Балтитко Романи чиб (Романэс) 2019

Соломоно́скирэ Годыпэна

¹ Ковло отпхэныбэ́н штылякирэла холы́, нэ пхаро́ лав выкхарэла барэды́р холы́.

² Чиб годэ́-манушэ́нгири исын пхэрды́ джиныбнаса, нэ чиб дылынэскири вычхувэла дурэды́р дылныпэ́н.

³ Ра́скирэ-Дэвлэ́скирэ якха́ исын пэ кажно штэ́то и дыкхэ́на цямкэс пал фуе́ и лачхэ́ манушэ́ндэ.

⁴ Лачхи́ чиб исын сы́рбы джиибна́скири ґаны́нг, нэ мижэх чиб пхагирэ́ла ду́хо (фа́но).

⁵ Дылыно́ дыкхэ́ла вучипна́стыр, ке́ли лэс дад сыклякирэ́ла, нэ кон прилэ́ла банг, ке́ли лэ́скэ сыкавэ́на, исын барэ́-годя́киро.

⁶ Дрэ чачунэ́-манушэ́скиро кхэр исын бут кучипэна, нэ фуе́-манушэ́нгирэ кофостыр екх тугипэн (пиридживипэн).

⁷ Годэ́-манушэ́нгирэ ушта́ дэ́на джиныбэ́н, нэ дылыниньконэ-манушэ́нгиро ило́ на кэрэ́ла адя́кэ.

⁸ Рай Дэвэ́л рикирлапэ дрэ риг свэ́нто дыибэ́н, со фуй мануша́ янэ́на, нэ ёв зоралэ́с радынэ́лапэ мангипнастыр, саво́ кэрэ́на дэвлы́тка мануша́.

⁹ Рай Дэвэ́л на прилэ́ла фуе́-манушэ́нгиро дром, нэ Лэ́скэ исын дро́га кодолэ́, савэ́ родэ́на и джа́на дурэды́р пир чачипэ́н.

¹⁰ Древа́н пхарэ́с сыклякирэ́на одолэ́с, кон ячкирэ́ла лачхо́ дром, и кодова́, саво́ бидыкхэла (савэ́скэ на пир ило́), ке́ли лэс сыклякирэ́на, мэрэ́ла.

¹¹ Ко́ли исын джиндло́ Ра́скэ-Дэвлэ́скэ, со кэрэ́лапэ дро лю́но (адо) и Абадоно, то тэды пэ кицы́ бутэды́р Ёв джинэ́ла манушэ́нгирэ илэ.

¹² Кон сыкавэ́ла бипатыв [розмэкнэ манушэ́скэ на пир ило́-р.с.], ке́ли лэ́скэ выракирэна зоралэ́с, кодолэ́скэ исын на дро́го кадава́ ману́ш; адя́кэ-паць ёв на джа́ла кэ годэ́ мануша́ тэ дэн годы́ лэ́скэ.

¹³ Радымакиро (лошало) ило́ кэрэ́ла бахтало́ муй, нэ калыпэ́н пэ ило́ пхагирэ́ла ду́хо (фа́но).

¹⁴ Годыпнаскиро ило́ родэ́ла джиныбэ́н, нэ дылынэскирэ ушта́ чаравэнапэ дылныпнаса.

¹⁵ Сарэ́ притасадэ-манушэ́скирэ дывэса́ исын бибахталэ́, нэ манушэ́стэ радымакирэ илэ́са ўса́ды (сак) исын свэ́нко.

¹⁶ Тэ явэс чороро́ и тэ дарэс Дэвлэ́стыр исын фэды́р, сыр тэ явэс барэ́ барвалыпнаса, нэ пхарипнаса пэ ило́.

¹⁷ Фэды́р тэ хас шаха дро чаро́, нэ кай ту́кэ сыкавэ́на паты́в, сыр тэ хас тхулэ телянтос, нэ кай тут бидыкхэна.

¹⁸ Холынакиро ману́ш выкхарэла кошыбэ́н, нэ кон рикирэ́ла пэс холя́тыр, одова́ ковлякирэла чинга́рд.

¹⁹ Кирнэ-масэ́нгиро дром исын сыр тыно пхусадытконэ (тернытконэ) хрустэндыр, нэ дэвлытконэнгиро дром исын маму́й (пря́мо).

²⁰ Годо́ чхаво́ радынэла пэ́скирэ дадэ́с, нэ дылынинько ману́ш дыкхэ́ла вучипна́стыр пэ пэ́скирэ датэ.

²¹ Набарэ́-годя́киро ману́ш радынэ́лапэ лэ́скирэ дылныпнастыр, нэ годьваро́ ману́ш псирэ́ла маму́й (прямэс).

²² Со ману́ш придуминэла би годэ́-лавэнгиро, савэ́ дэ́на бут мануша́, одова́ дэ́лапэ дукха́, нэ кай бут мануша́ дэ́на годы́, одо́й саро́ исын зорало́ (мишто́).

²³ Ману́ш радынэ́лапэ пэ́скирэ лачхэ́ отпхэныбнастыр, лачхо́ лав ракирлапэ, ке́ли ёв трэй.

²⁴ Годэ́-манушэ́скиро дром дро джиибэ́н джа́ла упрэ́, соб (кай) ёв тэ рисёл криг люностыр (адостыр), со исын тэлэ́.

²⁵ Рай Дэвэ́л хасякирэ́ла кхэр, кай пхутькирдэ́ исын, нэ Ёв дэ́ла зор пэ кустыка, кай пивля (удовы).

²⁶ Рай Дэвэ́л исын джунгало́ долэ́стыр, со бибахталэ́ мануша́ придуминэна, нэ бидошэнгирэ-манушэ́нгирэ лава́ исын лачхэ́ Лэ́скэ.

²⁷ Кон исын ґа́лко (жадно) кэ ко́фо, кодова́ кэрэ́ла пхарипэ́н пэ́скирэ кхэрэ́скэ, нэ кон бидыкхэла (конэ́скэ на пир ило́) мыты (взятки), явэ́ла тэ дживэ́л.

²⁸ Чачунэ́-манушэ́нгиро ило́ обдуминэла (сыклёла), сыр тэ отпхэнэл, нэ фуе́-манушэ́нгиро муй пырскинэла бибахтяса.

²⁹ Рай Дэвэ́л дурьёла фуе́ манушэ́ндыр, нэ Ёв шунэ́ла чачунэ́-манушэ́нгири па́тери (моли́тва).

³⁰ Якхэнгиро дуд радынэла ило́, и лачхи́ зан (звесь) тхулякирэла кокалы́.

³¹ Кон шунэ́ла, ке́ли лэ́скэ сыкавэ́на банг дро джиибэ́н (лэс сыклякирэ́на джиибнаскэ), ячэ́лапэ машки́р годэ́ манушэ́ндэ.

³² Кон вычхурдэла илэ́стыр дова́, со́са лэс сыклякирэ́на, одова́ на прилэ́ла кэ годы́ пэ́скиро ду́хо (фа́но), нэ одова́, кон шунэ́ла сыклякирибэ́н, исын годьваро́.

³³ Кон дарэ́ла Ра́стыр-Дэвлэ́стыр, одова́ сыклёла годыпнаскэ, и анги́л, сыр тэ дорэсэл паты́в, трэй тэ явэ́л напхутькирдэса.