Pritčy 14 - Библия - Пэ Балтитко Романи чиб (Романэс) 2019

¹ Годы́ джувлы́ рикирэ́ла кхэр, нэ набарэ́-годякири джувлы́ пхагирэ́ла лэс пэ́скирэ дылныпнаса.

² Кон кэрэ́ла саро́ пир чачипэ́н, кодова́ кутякирэла кэ дар Рас-Дэвлэ́с, нэ кон кэрэ́ла чорипэ́н пэфроми, одова́ на прилэ́ла кэ годы́ Лэс.

³ Дылыно́ рикирэ́ла пхутькирдэс кэ ран пэ пэ́скиро думо, нэ годэ́ ушта́ ракхэна манушэ́н.

⁴ Кай нанэ гурувэ́н, одо́й ясла (кхурлы) исын чхучи́, нэ баро́ прибытко (умалото) явэ́ла гурувэскирэ зорья́тыр.

⁵ Патяибны́тко якхи́тко на явэ́ла тэ хохавэ́л, нэ начачуно якхи́тко явэ́ла тэ пхэнэ́л хохаибэ́н.

⁶ Бипатывакиро ману́ш родэ́ла годыпэ́н, и на латхэ́ла нисо́, нэ джиныбэ́н локхэс дэ́лапэ кодолэ́скэ, саво́ исын годыпнаскиро (годьваро́).

⁷ Дурьёв (наш криг) дылынэ́ манушэ́стыр, савэскирэ уштэндыр ту на шунэса джиныбэ́н (годьварэ́ лава́).

⁸ Барэ́-годя́киро ману́ш джинэ́ла, со ёв кэрэ́ла акана́ и дурэды́р, нэ дылыно́ гаравэла пэ́скиро дылныпэ́н дро лэ́скири фрэнтыма, соб (кай) тэ хохавэ́л.

⁹ Дылынинька просана пэ́скирэ грэ́хи, нэ машки́р дэвлытконэндэ исын екх годы́.

¹⁰ Екх ило́ джинэ́ла пэ́скиро киркипэн, нэ чу́жо на пхэнэ́ла явирэскэ пал пэ́скири ра́дыма.

¹¹ Фуе-манушэ́нгиро кхэр равэна тэлэ́, нэ дэвлытконэнгири ша́тра явэ́ла най шукарэдыр.

¹² Исын дром, саво́ здэлапэ манушэ́скэ, со ёв исын маму́й (пря́мо), нэ пэ ко́нцо (пэ яго́ро) ёв лыджа́ла кэ мэрибэ́н.

¹³ Мэк ману́ш и салапэ, нэ пэ ило́ лэ́стэ сашты́ тэ явэ́л дукх; и бари ра́дыма яви́р мо́ло пириджала дро калыпэ́н.

¹⁴ Бэдэ-илэ́скиро ману́ш чалёла пэ́скирэ фуе́ бутендыр, нэ лачхо́ ману́ш явэ́ла чало пэскирэндыр.

¹⁵ Простонэ-годякирэ мануша́ патя́на кажнонэ́ лавэ́скэ, нэ барэ́-годя́киро ману́ш обдуминэла лачхэ́с кажно шаго (ламны).

¹⁶ Годо́ ману́ш дарэ́ла и дурьёла чорипна́стыр, нэ дылыно́ сы́гэс холясо́ла и зоралэ́с патя́ла дрэ пэ́стэ.

¹⁷ Хачкирдо ману́ш кэрэ́ла нагодьварэс, нэ манушэ́с, саво́ придуминэла фуипэ́н, зоралэ́с на камэ́на.

¹⁸ Простонэ-годякирэ мануша́ дорэсэ́на дылныпэ́н сыр мэкно́ миштыпэ́н, нэ барэ́-годякирэнгэ манушэ́нгэ джиныбэ́н дэ́лапэ сы́рбы коро́на.

¹⁹ Чорэ́ мануша́ бандякирэна шэро́ анги́л лачхэндэ, и фуй мануша́ анги́л чачунэ́-манушэ́нгири по́рта (вра́ты).

²⁰ Чорорэ́ манушэ́с зоралэ́с на камэ́на аж лэ́скирэ пашатунэ́ мануша́, нэ барвалэстэ исын бут дру́ги (мала́).

²¹ Кон дыкхэ́ла вучипна́стыр пэ пэ́скирэ пашатунэстэ, кодова́ кэрэ́ла грэ́хо; нэ бахтало́ исын кодова́ ману́ш, кон исын лачхэ́-илэ́скиро (жалинэла) кэ кодолэ́, савэ́н притасавэ́на.

²² Ци на хохавэнапэ одолэ́, савэ́ придуминэна чорипэ́н? Нэ кодолэ́, савэ́ придуминэна лачхипэ́н, дыкхэ́на явирэ манушэ́ндыр дро́го лачхипэ́н и патяибэ́н.

²³ Кажнонэ́ пхарэ́ бутя́тыр манушэ́скэ явэ́ла ко́фо (прибыль), нэ чхучэ́ (пустонэ) ракирибнастыр ману́ш явэ́ла чороро́.

²⁴ Годэ́ мануша́ дорэсэ́на барвалыпэ́н сыр коро́на, нэ дылынинько фэ́ни пэ́скиро дылныпэ́н.

²⁵ Чачуно́ якхи́тко выракхэла манушэ́нгиро джиибэ́н, нэ фрэнто якхи́тко ракирэ́ла хохаибэ́н.

²⁶ Кон дарэ́ла Ра́стыр-Дэвлэ́стыр, кодова́ ману́ш исын зоралэ́с тэрдо́, и лэ́скирэ чхавэ́нгэ явэ́ла штэ́то тэ гарадён.

²⁷ Кон дарэ́ла Ра́стыр-Дэвлэ́стыр, кодова́ пьела джиибна́скирэ ґанынгатыр, соб (кай) тэ рискирэс криг мэрибнаскирэ фэлятыр.

²⁸ Крали́скиро барипэ́н рикирлапэ пэ дова́, сыр бут исын лэ́стэ мануша́, нэ ке́ли крали́стэ исын на́бут мануша́, тэды ёв нашавэла саро́.

²⁹ Ману́ш, саво́ ле́нтэс (на сы́гэс) холясо́ла, исын баро́ годяри, нэ кодова́, савэ́стэ исын хачкирдо ду́хо (фа́но), сыкавэ́ла пэ якха́ пэ́скиро дылныпэ́н.

³⁰ Лачхо́ ило́ дэ́ла джиибэ́н масэнгэ, нэ зэвлыныпэ́н кирнякирэла кокалы́.

³¹ Кон притасавэла чорорэс, кодова́ сы́рбы обракирэла Рас-Дэвлэ́с, Саво́ создыя́ лэс. Нэ кодова́ кэрэ́ла паты́в Лэ́скэ, Саво́ исын лачхэ́-дескиро кэ мануша́, кон исын дрэ трэ́бима.

³² Фуй мануша́ пэрэ́на пэ́скирэ фуипнастыр, нэ чачуно́ исын зоралэ́с тэрдо́ аж дро са́мо лэ́скиро мэрибэ́н.

³³ Годыпэ́н откхинёла штылэ́с дрэ барэ́-годя́киро ило́, нэ дова́, со исын дрэ дылыниньконэнгиро ило́, джиндло́ сарэ́нгэ.

³⁴ Чачипэ́н ґаздэ́ла манушэ́н (народо), нэ грэ́хо лэ́ла криг паты́в кажнонэ́ манушэ́ндыр.

³⁵ Кра́ли сыкавэ́ла паты́в годэ́ дынари́скэ, нэ ёв зоралэ́с холясо́ла пэ одолэ́стэ, саво́ ладжакирэла лэс.