Pritčy 10 - Библия - Пэ Балтитко Романи чиб (Романэс) 2019

Соломоно́скирэ Годыпэна

¹ Соломоно́скирэ притчы. Годо́ чхаво́ радынэла пэ́скирэ дадэ́с, нэ дылыниньконэ чхавэстыр калёла ило́ лэ́скирэ датэ.

² Кучипэна (сокровишчы), со дорэсэ́на чорэ́ рэндэ́ндыр, на янэ́на лачхипэ́н, нэ чачипэ́н зракхэ́ла мэрибна́стыр.

³ Рай Дэвэ́л на домэкэла, соб (кай) чачуно́ ману́ш тэ бокхалёл, нэ Ёв на прилэ́ла дова́, со древа́н трэй надэвлытконэ манушэ́нгэ.

⁴ Одова́ ману́ш, савэ́стэ исын кирначо (лениво) васт, явэ́ла чороро́, нэ добусово (старательно) васт барвалякирэла манушэ́с.

⁵ Кон укэдэла лынаскиро, исын годо́ чхаво́, нэ кодова́ ману́ш, саво́ исын суто́, ке́ли укэдэна убияндыпэн, исын балвалитко чхаво́.

⁶ Бахтякирибэ́н учхакирэ́ла шэро́ чачипнаскирэ манушэ́скиро, нэ нахратыма гаравэла муй фуе́-манушэ́нгиро.

⁷ Бахтало́ исын рипирибэ́н пал чачунэ́ манушэ́стэ, нэ чорэ́-манушэ́нгиро лав кирнёла.

⁸ Годэ́ мануша́ прилэ́на кэ годы́ припхэныбэна́, нэ набарэ́-годя́киро ману́ш пэрэ́ла.

⁹ Кодова́ ману́ш, саво́ кэрэ́ла бидошэнгирэс, псирэ́ла бидаракиро; нэ кодова́ ману́ш, саво́ псирэ́ла бангэ́ дромэ́са, явэ́ла ухтылдо ваш ка́ра.

¹⁰ Ману́ш, саво́ марэла якхаса, ке́ли кэрэ́ла чорипэ́н, янэ́ла калыпэ́н, а пхутькирдо ману́ш пэрэ́ла.

¹¹ Чачунэ́-манушэ́скирэ лава́ исын джиибна́скири ґаны́нг, нэ нахратыма гаравэла муй фуе́-манушэ́нгиро.

¹² Зорало́ накамибэн ґаздэ́ла кошыбэ́н, паты́в кэ яви́р мануша́ зачхакирэла сарэ́ грэ́хи.

¹³ Годыпэ́н джа́ла годыпнаскирэ манушэ́стыр, а ран кэдэлапэ тэ марэл пир думо кодолэ́скэ, саво́ на ґалёла годыпэ́н.

¹⁴ Годэ́ мануша́ скэдэ́на (зракхэна) джиныбэ́н, нэ дылыно́ ракирэ́ла кэ хасибэ́н.

¹⁵ Барвалэ́-манушэ́скиро миштыпэ́н исын сыр зорало́ фо́ро, нэ чороро́ ману́ш пэрэ́ла дро ду́хо (фа́но) пэ́скирэ богипнастыр.

¹⁶ Чачипнаскирэ-манушэскири пхари́ буты́ лыджа́ла кэ джиибэ́н, нэ бажын (приросто), сави́ дорэсэ́ла начачуно (чоро) ману́ш, лыджа́ла кэ грэ́хо.

¹⁷ Одова́, саво́ рикирэ́лапэ кэ сыклякирибэ́н, исын пэ дром кэ джиибэ́н, нэ кодова́, кон на прилэ́ла кэ годы́, ке́ли лэ́скэ сыкавэ́на банг, джа́ла дрэ риг далэ́ дромэ́стыр.

¹⁸ Кон гаравэла явирэндыр дова́, со ёв древа́н на камэ́ла, исын хохано́, и кон розмэкэла чиб (калэ́-кэрибнаскирэ) лава́, исын дылыно́.

¹⁹ Кай ракирэ́на бут лава́, одо́й и чорипэ́н пхэнэ́на: нэ кон обрикирэла пэ́скирэ ушта́, одова́ исын годо́ ману́ш.

²⁰ Чачунэ́-манушэ́скирэ лава́ исын сы́рбы выкэдыно руп, а фуе́-манушэ́нгиро ило́ на мол нисо́.

²¹ Чачунэ́-манушэ́скирэ ушта́ дэ́на годы́ бутэ́ манушэ́нгэ, нэ дылынинька мэрэ́на пир дова́, со лэ́нгэ на ухты́лла (на́доси) годыпэ́н.

²² Ра́скирэ-Дэвлэ́скиро бахтякирибэ́н барьякирэ́ла манушэ́с, ёв нисо́ на могинэ́ла тэ причхувэл кэ дава́, кэри буты́ пхарэ́с.

²³ Дылынэ́ манушэ́скэ тэ кэрэ́л чорипэ́н сы́рбы тэ броинэл, нэ манушэ́стэ, саво́ ґалёла, исын бут годыпэ́н.

²⁴ Дова́, со́стыр дарэ́ла фуй ману́ш, пэрэ́ла пэ лэ́стэ, нэ дова́, со древа́н исын дро́го чачунэ́ манушэ́нгэ, явэ́ла отмэкно лэ́нгэ.

²⁵ Рискирибнаскири балва́л (вихро) проджа́ла и фуй мануша́ буты́р на явэ́на, нэ чачуно́ ману́ш исын пэ ве́чно фунда́менто.

²⁶ Со исын шут (уксусо) ваш данда́, ци тхув ваш якха́, адя́кэ-паць исын кирнэ-масэ́нгиро ману́ш ваш одолэ́нгэ, савэ́ бичхадэ́ кадасавэ́ манушэ́с.

²⁷ Кон дарэ́ла Ра́стыр-Дэвлэ́стыр, кодова́ дживэ́ла ґарэдыр (длугэдыр), нэ фуй мануша́ мэрэ́на сыгэды́р.

²⁸ Чачунэ́-манушэ́нгиро ужакирибэ́н исын ра́дыма, нэ фуе́-манушэ́нгири наде́я хасёла.

²⁹ Рай Дэвэ́л исын зоралыпэ́н ваш чачунэ́ манушэ́нгэ, нэ Ёв хасякирэ́ла кодолэ́н, [и дар ваш одолэ́нгэ-р.с.], савэ́ кэрэ́на чорипэ́н.

³⁰ Чачунэ́ мануша́ ние́кхвар на кунинэнапэ, нэ фуй мануша́ на явэ́на тэ дживэ́н дурэды́р пэ пхув.

³¹ Чачунэ́ мануша́ ракирэ́на годэ́ лава́, нэ хоханы чиб чингирэна криг.

³² Чачунэ́-манушэ́нгирэ ушта́ джинэ́на, со тэ пхэнэ́н, нэ муй фуе́-манушэ́нгиро фэ́ни (то́ка) хохавэла.