Osija 6 - Библия - Пэ Балтитко Романи чиб (Романэс) 2019

Дэвэ́л Кхарэ́ла Манушэ́н тэ Рисён кэ Ёв

¹ Дрэ смэнтныма пэ́скири ёнэ пэ зло́ко (ра́нко) явэ́на тэ родэ́н Ман и тэ ракирэ́н: ‘Явэ́н, и рисёваса амэ кэ Рай Дэвэ́л: пал-дова́ со Ёв дукхадя, и Ёв састякирэла амэн; Ёв пэкадя́ амэн, и Ёв пирипхандэла амарэ́ фра́нсы (раны).

² Пало́ дуй дывэса́ Ёв джидякирэла амэн; пэ три́то дывэ́с Ёв чхувэ́ла пэ ґэра́ амэн, соб (кай) амэ́нгэ тэ джива́с анги́л Лэ́скиро дыкхибэ́н.

³ Амэ́нгэ трэй тэ джинас буты́р, амэ́нгэ трэй тэ причхувас тэ джинас буты́р Рас-Дэвлэ́с, Лэ́скиро явибэн явэ́ла сыр зло́ко, Ёв явэ́ла сыр брышы́нд, сыр ґаратуно брышы́нд (позднё), со панякирэла пхув.’

⁴ ‘О, Ефремэ, со Ма́нгэ тэ кэра́в ту́са? О, Юда, со Ма́нгэ тэ кэра́в ту́са? Пал-дова́ со тумари́ паты́в кэ Мэ исын сы́рбы туча пэ зло́ко (ра́нко), и сы́рбы пахлын (роса) пэ зло́ко, сави́ сыг хасёла (проджа́ла).

⁵ Палдава́ Мэ вычингиравас лэн пир пророкэ́ндэ, Мэ мулякиравас лэн Мирэ́ лавэ́нца; и Миро сэ́ндо пэ лэ́ндэ явэ́ла сы́рбы дуд (свэ́то), со ґаздэ́лапэ.

⁶ Пал-дова́ со Ма́нгэ исын древа́н пир ило́ лачхэ́-илы́ткима, а на свэ́нто дыибэ́н, и джиныбэ́н пал Ма́ндэ, Дэвлэ́стэ, буты́р, сыр цэ́ло схачкирибэ́н.

⁷ Нэ ёнэ сыр Адамо пхагирдэ́ Завето; одо́й ёнэ ячадэ хоханэ́с Ман.

⁸ Галаа́до исын фо́ро, дро саво́ дживэ́на бибахталэ́, и ёв исын магирдо́ ратэ́са.

⁹ Сыр розмарибнарья [розмарибнытко шайка-ю.о.], кон подракхэла манушэ́с тэ замарэ́л, адя́кэ-паць и кампания рашангири запасёла тэ замарэ́л пир дром кэ Сехэмо; чачэс, ёнэ кэрэ́на стэтка (джунгалэ́) рэ́нды.

¹⁰ Дро кхэр Израилёскиро Мэ дыкхцём трашано: одо́й кэрэ́лапэ Ефрамоскиро биладжаипэ́н; Израилё исын магирдо́.

¹¹ Адя́кэ-паць, ваш ту́кэ, Юдэ, сыкадо дывэ́с ваш гивэнгиро счхиныбэн, ке́ли Мэ рискира́ва Мирэ́ – манушэ́нгирэ пленонэн.