Osija 5 - Библия - Пэ Балтитко Романи чиб (Романэс) 2019

Дэвэ́л Сыкавэ́ла Лэ́скиро Холямипэн пэ Израилё

¹ ‘Шунэ́н дава́, рашая́лэ! Причхувэ́н кан, кхэр Израилёскиро! Рикирэнпэ кэ дова́, со шунэ́на, о кхэр крали́скиро! Пал-дова́ со сэ́ндо явэ́ла проти тумэ́ндэ, пир-дова́ со тумэ́ са́нас сы́рбы фэлы́ (петля) дрэ Маси́фа (Мицпа) и сы́рбы кхуды́ (сеть) пэ Фаворо.

² Ёнэ хор загинэ́ дро блэ́ндо [бунтыибнарья бут замарэна ваш свэ́нта дыибэна́-ю.о.], нэ Мэ бангякирава лэн сарэ́н.

³ Мэ джино́м Ефремос, и Израилё исын на гарадо́ Ма́ндыр, и акана́, Ефре́мо, ту кэрэ́са биладжакунэ́ рэ́нды, а Израилё исын магирдо́.

⁴ Дова́, со ёнэ кэрэ́на, на домэкэла лэн тэ рисён кэ лэ́нгиро Дэвэ́л, пал-дова́ со ду́хо (фа́но) тэ кэрэ́л биладжаипэ́н, исын машки́р лэ́ндэ, и ёнэ на джинэ́на Рас-Дэвлэ́с.

⁵ Пхутькирибэ́н Израилёскиро тыкнякирдо дрэ лэ́нгирэ якха́ [допхэнэ́ла лэ́скирэ манушэ́нгэ дро муй-ю.о.], на дыкхи́ пэ дова́, со Израилё и Ефре́мо обштавэнапэ (пэрэ́на) дро лэ́нгиро чорипэ́н; и Юда обштавэлапэ адя́кэ-паць лэ́нца.

⁶ Ёнэ явэ́на тэ родэ́н Рас-Дэвлэ́с лэ́нгирэ бакрэ́нгирэ стадэнца и табунэнца, нэ ёнэ на латхэ́на Лэс; Ёв рисия́ (отгия́) криг лэ́ндыр.

⁷ Ёнэ ячкирдэ́ (парудэ) напатяибныткэс Рас-Дэвлэ́с; пал-дова́, со лэ́ндэ латхнэпэ кхэлбы (незаконна бияты): акана́ нэво́-чхонытко свэ́нко похала лэн и лэ́нгиро миштыпэ́н.

⁸ Пхурдэ́н дро бакрано ро́го дрэ Гива́, пхурдэ́н дро ро́го (труба), дрэ Ра́ма; дэн го́дла зоралэ́с дро Беф-Авэно, дыкх жа пала́л пал пэ́стэ, о Вениамино!

⁹ Ефремостыр ячэ́лапэ голоты́ня (чхучипэн) дро дывэ́с, сыр Мэ бангякирава лэн; машки́р ро́дыцы Израилёскирэ Мэ пхэндём, со дава́ явэ́ла чачэс.

¹⁰ Тхага́рья Юда́скирэ исын сы́рбы кодолэ́, кон дурьякирдя шпэры (знаки) пэ пхув: Мэ вычхувава Миро мижэхипэн (мижэх холы́) и пэ лэ́ндэ сыр пани́.

¹¹ О Ефре́мо, притасадо, сэ́ндо пэкадя́ зоралэ́с лэс, пир-дова́, со ёв илэ́стыр лыя́ тэ псирэ́л пир манушы́тко упхэныбэ́н.

¹² Мэ ява́ва сы́рбы моль (мэль) ваш Ефремоскэ, и сы́рбы кирмо [кирныпэн-ю.о.] ваш кхэр Юда́скиро.

¹³ Ке́ли Ефре́мо дыкхця́ пэ́скири дукх, и Юда дыкхця́ пэ́скиро фра́нсо (рана), тэды гия́ Ефре́мо кэ Асуро, и бичхадя́ пал крали́стэ Иаревостэ (Яревостэ), нэ ёв на дэ́ла ра́да тэ састякирэл тумэн, ци тэ драбакирэл тумэн тумарэ́ рискирдэ́ франсостыр (ранатыр).

¹⁴ Пал-дова́ со Мэ ява́ва сы́рбы шчэр (ле́во) пэ Ефремостэ, и сыр тэрно́ шчэроро пэ Юда́скиро кхэр. Мэ аж роскушава лэн и джа́ва криг, и Мэ лыджа́ва криг лэн, и одо́й на явэ́ла ние́кх тэ ракхэ́л лэн.

¹⁵ Мэ джа́ва криг, Мэ рисёва́ва пэ Миро штэ́то анги́л дова́, сыр ёнэ приджинэна пэ́скири банг [лэ́нгиро чорипэ́н-ю.о.] и явэ́на тэ родэ́н Миро муй: ке́ли лэн притасавэ́на, ёнэ явэ́на добусо́вэс тэ родэ́н Ман.