Osija 3 - Библия - Пэ Балтитко Романи чиб (Романэс) 2019

Израилё Рисёла кэ Дэвэ́л

¹ И пхэндя́ Рай Дэвэ́л ма́нгэ: “Джа́ нэвэ́стыр, кам джувля́, сави́ исын камлы (пирамни) ромны́ ромэстэ, нэ сави́ камэ́ла и явирэ муршэ́н. Нэ ту кам ла, адя́кэ-паць, сыр Рай Дэвэ́л сыкавэ́ла ла́ска чхаворэнгэ Израилёскирэнгэ, савэ́ дыкхэ́на пал явирэ дэвлорэндэ и выкэдэна марикля зюмоса, со пэкэна лэ́нгэ Наюды́тка на́цыи.

² Ѓа́да, мэ киндём ла ваш пэ́скэ пал дэшупандж шэ́кели руп, и пал екх пашэ́са хомеро ґэрсто (ячменё).”

³ И пхэндём мэ ла́кэ: “Ту ячэсапэ ма́нца бут дывэса́; и ту буты́р на явэ́са тэ камэс явирэ муршэ́н, и ту на явэ́са буты́р никонэскири, и мэ ява́ва кадасаво́-паць ваш ту́кэ.”

⁴ Пал-дова́ со чхавэ́ Израилёскирэ ячэ́напэ бут дывэса́ би крали́скиро, би тхагари́скиро, би свэнтонэ́-дыибна́скиро, би обсвэнцындлэ́-стылбо́скиро, би эфодо́скиро, би терафимо́скиро.

⁵ Пало́ (после) дава́ чхавэ́ Израилёскиро рисёна, и ёнэ явэ́на тэ родэ́н Рас-Дэвлэ́с, лэ́нгирэ Дэвлэ́с, и лэ́нгирэ крали́с Давидо́с: и ёнэ явэ́на тэ дарэ́н Ра́стыр-Дэвлэ́стыр и тэ рисён кэ Лэ́скиро лачхипэ́н дрэ палатунэ́ (последня) дывэса́.