Osija 14 - Библия - Пэ Балтитко Романи чиб (Романэс) 2019

Израилё Нэвэ́стыр Явэ́ла Дэвлэ́са

¹ [13.16-ю.о.] Мануша́ Самариятыр явэ́на бангэ́ палдова́, со ёнэ кэрдэ́ бу́нто проти лэ́нгирэ Дэвлэ́стэ. Ёнэ пэрэ́на куртала́тыр, лэ́нгирэ бияты явэ́на росчингирдэ (пэкадэ) пэ котэра́, и лэ́нгирэ пхарэ́ джувлятыр отлэна тыкнэмасэн.’

² О Израиле! Рисёв палэ кэ Рай Дэвэ́л, тыро́ Дэвэ́л, пал-дова́ со ту обштадянпэ ґэрьяса пал пэ́скиро чорипэ́н.

³ Лэн пэ́са мангипнытка лава́ и рисён палэ кэ Рай Дэвэ́л, ракирэ́н Лэ́скэ: “Отмэк амэ́нгэ саро́ чорипэ́н и прилэ́ амэн ласкаса, соб (кай) амэ́нгэ тэ янас свэ́нта дыибэна́ амарэ́ уштэндыр.”

⁴ Асуро (Асирия) буты́р на явэ́ла тэ ракхэ́л амэн, амэ на ява́са тэ традас уклистэ́, и амэ на ява́са буты́р тэ ракирас пэ буты́ амарэ́ вастэнгири: ‘Тумэ́ сан амарэ́ дэвэла́’; пал-дова́ со и пироты (бидадэнгирэ чхаворэ́) латхэ́на ла́ска Ту́тэ.”

⁵ Мэ састякирава лэн далэ́стыр, со ёнэ отпынэ (дуринэ) Ма́ндыр, Мэ сыкава́ва ла́ска лэ́нгэ илэ́стыр; пал-дова́ со Мири́ холы́ рисия́ криг лэ́ндыр.

⁶ Мэ ява́ва сы́рбы пахлын (роса) ваш Израилё и ёв явэ́ла тэ лулудёл сыр лилия, и ёв мэкэ́ла пэ́скирэ ко́рни (рукха́) сы́рбы дрэвы пэ Лива́но.

⁷ Лэ́скирэ рандя́ (вэ́тки) розбуглёна (розмэкэнапэ), и лэ́скири шук (гожыма) явэ́ла сы́рбы маслинитко кашт и лэ́скиро лачхэ́ – сунгакиро кхандыпэн (парфуны) явэ́ла сы́рбы кедрэндыр пэ Лива́но.

⁸ Ёнэ, савэ́ явэ́на тэ дживэ́н тэл Мири́ зэр (засенка), рисёна и ёнэ явэ́на тэ отджидён сы́рбы гив, и явэ́на тэ барьён сы́рбы винаграды́тко кашт. Ёнэ явэ́на лачхэ́с тэ пахнисон сы́рбы мол (вино) Ливаностыр.”

⁹ Ефре́мо пхэнэ́ла: ‘Со ма́нгэ ишчо (инкэ́) трэй идолэндыр?’ Мэ отпхэнава лэ́скэ: ‘Мэ ява́ва тэ шунав, и тэ дыкха́в пал ту́тэ? Мэ ява́ва сыр кипарисо, саво́ розмэкця, Рай Дэвэ́л, патря (листы). Ма́ндыр явэ́на ту́тэ баритка (пло́ды).’

¹⁰ Кон исын годо́, соб (кай) ёв тэ ґалёл сарэ́ далэ́ лава́? Кон исын барэ́-годя́киро, соб (кай) ёв тэ джинэ́л дава́ саро́? Пал-дова́ со Ра́скирэ-Дэвлэ́скирэ дрома́ исын чачунэ́, и чачипнаскирэ мануша́ псирэ́на пир лэ́ндэ, нэ чорипэ́н-кэрибнаскирэ обштавэнапэ пир лэ́ндэ.