Osija 13 - Библия - Пэ Балтитко Романи чиб (Романэс) 2019

Биковлыпнаскиро Сэ́ндо пэ Израилё

¹ Ке́ли ракирдя́ Ефре́мо (мануша́ Ефремо́скирэ родыцо́стыр), то сарэ́ издрандынэ. Ёв сыс барьякирдо́ дро Израилё, нэ сыр ёв кэрдя́ чорипэ́н анги́л Ваалостэ (Ваало), то ёв хасия́.

² Акана́ ёнэ кэрэ́на грэ́хи бутэды́р и барэды́р, и ёнэ кэрдэ́ ваш пэ́скэ вычхудэ́ муя́, и́долы рупэ́стыр пир пэ́скиро джиныбэ́н, сарэ́ кадалэ́ статулы кэрдэ́ графарья (спецы тэ рисынэн) дрэ вастытка бутя́. И ёнэ пхэнэ́на: ‘мэк мануша́, кон янэ́ла свэ́нто дыибэ́н, тэ чамудэн гуруворэ́н.’

³ Палдава́ ёнэ явэ́на сыр мигла (тумано) пэ зло́ко, сыр пэ́рво пахлын, сави́ сы́гэс хасёла, сыр шприя (мякина), со росчхурдэла рискирибнаскири балва́л криг гиваобкэрибнаскирэ шурнатыр (гумностыр), сыр тхув, со джа́ла труба́тыр (тхувалэстыр).

⁴ Нэ Мэ сом Рай-Дэвэ́л, тыро́ Дэвэ́л Египто́скирэ пхувья́тыр, ту́кэ на трэй тэ джинэ́с явирэ дэвлорэн апри́ч Ма́ндэ: пал-дова́ со нанэ ние́кх апри́ч Ма́ндэ, Саво́ зракхэ́ла.

⁵ Мэ дыкхцём пал ту́тэ пэ чхучи́ пхув, пэ штэ́ты, кай сыс баро́ шукипэн.

⁶ Ке́ли лэ́ндэ исыс чаритка фэ́лды, ёнэ сыс чалэ, ёнэ сыс пхэрдэ́с чалэ и лэ́нгиро ило́ ячэлас барикано, пал-дова́ со ёнэ бистырдэ пал Ма́ндэ.

⁷ И Мэ ява́ва ваш лэ́нгэ сы́рбы шчэр (ле́во), сы́рбы леопардо пашы́л дром ява́ва Мэ тэ дыкха́в цямкэс пал лэ́ндэ.

⁸ Мэ ява́ва тэ пирилав лэн сы́рбы ричыха (медведица), савьятэ хасинэ́ тыкнорэ; Мэ ява́ва тэ рискирав лэ́нгирэ-пашварэнгиро кокалыцо кэ ило́ и Мэ ява́ва тэ похав лэн сы́рбы шчэриха, а фэлды́тка мурдала́ (звери) явэ́на тэ роскушэн лэн.

⁹ Ту хасякирдян пэс, Израиле, со ту сан проти Ма́ндэ, проти Кодолэстэ, Саво́ подэла васт ту́кэ. Кай жа исын дова́ сэнда́ри (кра́ли), саво́ дэ́ла ра́да тэ зракхэ́л тут дрэ сарэ́ тырэ́ фо́рья? И кай исын тырэ́ сэнда́рья, пал савэ́ндэ ту пхэндя́н: ‘Дэ ма́нгэ крали́с и тхагарьен?’

¹⁰ Кай исын тыро́ кра́ли акана́? Мэк ёв тэ зракхэ́л тут дрэ сарэ́ тырэ́ фо́рья? Кай исын тырэ́ сэнда́рья, пал савэ́ндэ ту пхэндя́н: “Дэ амэ́нгэ крали́с и барыдырэ́н.”

¹¹ Мэ дыём ту́кэ крали́с дрэ Мири́ холы́, и Мэ лыём лэс криг дро Миро исын холякирибэ́н.

¹² Чорипэ́н Ефремоскиро запхандло дро вэнзло, а лэ́скиро грэ́хо приракхно.

¹³ Дукх джувля́тэ, савьякэ трэй тэ биянэ́л, явэ́ла пэ лэ́стэ: ёв исын чхаво́ на о барэ́-годя́киро, пал-дова́ со ёв тэды тэ на явэ́л одо́й, сыр явэ́ла цы́ро (часо) тэ бияндёл.

¹⁴ Мэ выкинава лэн люноскирэ/адоскирэ (Шэолоскирэ) зорья́тыр, Мэ выракхава лэн мэрибна́стыр. О Мэрибэ́н! Кай исын Тыро́ жало (мэрибнытко трута/ядо)? О лю́но (адо)? Кай исын тыри́ зберда (победа) [тыро́ хасибэ́н-ю.о.]? Мирэ́ якхэ́ндыр гарадо́, соб (кай) Мэ тэ сыкавав ило́ ваш лэ́нгэ.

¹⁵ Мэк Ефре́мо и тэ лулудёл машки́р пшалэ́ндэ, явэ́ла балва́л вастоко́стыр: балва́л Ра́стыр-Дэвлэ́стыр явэ́ла чхучэ́ пхувья́тыр, и Лэ́скири ґанынгори явэ́ла шуки́, и лэ́скиро фолахар (фонтано) пириячэ́ла (тэрдёла) тэ чхувэлпэ. Ёв кэрэ́ла чхучо́ кхоро́ (сасудо) кажнонэ́ пиралятыр, кай исын кажно куч кхоро́.