Osija 11 - Библия - Пэ Балтитко Романи чиб (Романэс) 2019

Израилё Исын Усады / Сак (Всегда) Дро́го Чхаво́ ваш Дэвлэ́скэ

¹ Пэ зло́ко (пэ ра́нко) кра́ли Израилёскиро хасёла! ‘Сыр Израилё сыс бия́то, ёв яця́ дро́го Ма́нгэ, и Мэ кхардём Мирэ́ чхавэ́с Египто́стыр.

² Ёнэ, Мирэ́ проро́ки, кхардэ́ лэс, нэ ёв дурия лэ́ндыр. Лэ́скирэ мануша́ янэ́нас Ваалоскэ свэ́нта дыибэна́, и тхувалякирдэ дрогонэ́ смолэнца вычхиндлэ́ муенгэ барэстыр.

³ Мэ сыклякирдём Ефремос тэ псирэ́л, Мэ лыём (лыджиём) лэс пэ васта́; нэ ёнэ на джиндлэ́, со Мэ састякирдём лэн.

⁴ Мэ притырдавас лэн ковлэ́ дорье́нца (шылорэнца) манушытконэ́ ласкаса, и Мэ со́мас ваш лэ́нгэ сы́рбы кодова́, кон лэ́ла криг ґа́мо лэ́нгирэ жандэндыр, и Мэ ковлэс чалякирдём лэн.

⁵ Ёв на рисёла палэ пэ пхув Египто́скири, нэ Асуро (Асириятыр) явэ́ла кра́ли лэ́нгэ: пал-дова́ со ёнэ отпхэндлэпэ тэ рисён кэ Мэ.

⁶ И курта́ла пэрэ́ла (явэ́ла тэ рисёл одори́к и палэ) пэ фо́рья лэ́скирэ, и ёй явэ́ла тэ чингирэл тэлэ́ лэ́нгирэ штабы, и хасякирэ́ла лэн пал лэ́нгири годы́.

⁷ Мирэ́ мануша́ бандинэ, соб (кай) тэ дурьён криг Ма́ндыр. На дыкхи́ пэ дова́, со ёнэ кхарна Ман тэ помогинав, Най Вучэдыронэс, ние́кх лэ́ндыр на барьякирэ́ла Лэс.

⁸ Со Ма́нгэ тэ кэра́в ту́са, Ефреме? Сыр Мэ выдава тут, Израиле? Сыр Мэ тэ кэра́в ту́са сыр Адмаса [Адамаса-р.с.]? Сыр Мэ сашты́ тэ кэра́в ту́кэ одова́, со кэрдём Сэвоимоскэ [Цэвоимоскэ-ю.о.]? Миро ило́ рисия́ дрэ Ма́ндэ, Мири́ ла́ска (жалость) росхачия.

⁹ Мэ на ява́ва тэ кэра́в пир саро́ зоралыпэ́н Мирэ́ холынакиро, Мэ на ява́ва тэ хасякира́в Ефремос. Пал-дова́ со Мэ сом Дэвэ́л, а на ману́ш, Екх Свэ́нто машки́р тумэ́ндэ; и Мэ на ява́ва трашаса дро фо́ро.

¹⁰ Ёнэ джа́на пала́л пал Растэ-Дэвлэ́стэ; Ёв явэ́ла тэ рыкинэл сы́рбы шчэр (ле́во). Сыр Ёв лэ́ла тэ рыкинэл, тэ́ньчи Лэ́скирэ бияты явэ́на тэ джа́н сыгэды́р тринскирибнаса пал-панендыр (западостыр).

¹¹ Ёнэ явэ́на сы́гэс тринскирибнаса сы́рбы чирикля́ Египто́стыр, сы́рбы голумбы Асирия́кирэ пхувья́тыр. Нэ Мэ да́ва во́ля лэ́нгэ тэ дживэ́н дрэ лэ́нгирэ кхэра́,’ – ракирэ́ла Рай Дэвэ́л.

Дэвлэ́скири Холы́ пэ Юда́скиро Грэ́хо

¹² Ефре́мо обчхудя́ Ман хохаибнаса, и кхэр Израилёскиро фрэнтымаса. Нэ Юда дурэды́р псирэлас Дэвлэ́скирэ дромэ́са и сыс патяибнытконэ свэнтонэнца.