Osija 10 - Библия - Пэ Балтитко Романи чиб (Романэс) 2019

Израилёскиро Грэ́хо и Плено

¹ Израилё исын пышно винаграды́тко кашторо, саво́ бутэды́р янэ́ла му́ри пэ́скэ. Со бутэды́р ёв дэ́ла му́ри, то бутэды́р ёв кэрэ́ла алта́ри; со фэдэды́р ячэ́лапэ лэ́скири пхув, то ёнэ бутэды́р гожакирэна (шукарьякирэна) сты́лбы вычхудэ́ муенца / патренца (образэнца).

² Лэ́нгиро ило́ росчхудо пэ паш, акана́ Рай Дэвэ́л пхагирэ́ла тэлэ́ лэ́нгирэ алта́ри (жэ́ртва), Ёв пхагирэ́ла пэ котэра́ лэ́нгирэ сты́лбы вычхудэ́ муенца / патренца (образэнца).

³ Пал-дова́ со акана́ ёнэ ракирэ́на: ‘Амэ́ндэ нанэ Кра́ли, пал доваа со амэ на дарандыям Ра́стыр-Дэвлэ́стыр. Ко́ли тэ явэ́л кра́ли амэ́ндэ, со ёв кэрэ́ла амэ́нгэ?’

⁴ Ёнэ ракирэ́на хартытка (пуста) лава́, хоханэ́с совлахана, ке́ли счхувэна завето. Палдава́ пхаро́ сэ́ндо ґаздэ́лапэ пэ лэ́ндэ сы́рбы трутитко чар (ядовито), со исын пэ лесьни (борозны) фэлдэнгирэ.

⁵ Мануша́, кон дживэ́ла кэ Сама́рия, дарэ́на вычхиндлэ́ гуруворэстыр Беф-Авеностыр. Лэ́нгирэ мануша́ тугинэна зоралэ́с пал лэ́ндэ, и лэ́нгирэ биладжакунэ́ рашая́ явэ́на тэ тринскирэнпэ пал лэ́ндэ, пал лэ́нгиро барипэ́н, саво́ ячкирдя́ лэн.

⁶ Кадава́ идоло кокоро́ явэ́ла лыджино кэ Асирия, сыр да́ро крали́скэ Иаревоскэ (Яревоскэ); нэ Ефремос обухтылэла ладж, и Израилё явэ́ла ладжакирдо́ годэ́ лавэ́стыр, пал саво́ ёнэ гинэ́.

⁷ Нэ со ракирэлапэ пал Сама́рия, то ла́киро кра́ли хасёла криг сы́рбы пена/вэткица упра́л пэ тхадунэ панинга́.

⁸ И адя́кэ-паць явэ́на розмардэ пэ котэра́ вучэ́ штэ́ты пэ Авено, грэ́хо Израилёскиро. Хру́сты сувьенца и жылта хру́сты пхусаденца выбарьёна пэ лэ́нгирэ алта́ри; ёнэ пхэнэ́на бэргэнгэ: ‘Чхакирэн амэн,’ и бэргицэнгэ: ‘Пэрэн пэ амэ́ндэ.’

⁹ О, Израилё Тырэ́ манушэ кэрдэ́ буты́р грэ́хи сыр и дро долэ́ дывэсэ́ дрэ Гива́, – одо́й тумэ́ ячнэ́пэ. Ци со марибэ́н дрэ Гавао́но (Гива́) проти чхавэ́ндэ, савэ́ кэрэ́на чорипэ́н, на догия́ кэ ёнэ?

¹⁰ Ко́ли тэ явэ́л Миро выкэдэибэн, то Мэ высыклякирава лэн. Манушы́тка на́цыи (народы) явэ́на тэ кэдэнпэ проти лэ́ндэ, ке́ли ёнэ бангякирэна лэн пал дуе-молытко чорипэ́н.

¹¹ О Ефреме, саво́ исын сы́рбы высыклякирды рэца (тёлка), савьякэ камэлапэ тэ штакирэл гива́, нэ Мэ чхува́ва ґа́мо пэ лэ́скири тхулы мэн: Мэ зачхувава Ефремос тэ тырдэл плуго, а Юда явэ́ла тэ пашынэл (тэ пхаравэл) пхув, а Яково явэ́ла тэ рандэл (тэ розмарэл) комки.

¹² Почхувэн дрэ пхув ваш пэ́скэ пир чачипэ́н; счхинэн тэлэ́ пир лачхэ́-илы́ткима, и ґаздэ́н тумари́ напочхуды фэ́лда; пал-дова́ со исын часо тэ родэ́н Рас-Дэвлэ́с анги́л дова́, сыр Ёв явэ́ла и почхувэла чачипна́са сыр брышындэса пэ тумэ́ндэ.

¹³ Тумэ́ пхарадэ пхув ваш фуипэ́н, тумэ́ счхиндлэ чорипэ́н. Тумэ́ ханэ́ хохано́ баритко (пло́до), пал-дова́ со тумэ́ допатяндынэ зоралэ́с дрэ пэ́скирэ дроморэ, дро бутыпэн тумарэ́ зоралыпнаскирэ муршэндэ.

¹⁴ И ґаздэ́лапэ бу́нто машки́р тумарэ́ манушэ́ндэ, и сарэ́ тумарэ́ тва́рдыми / диз (крепости) явэ́на пхагирдэ́ – сыр Салмано пхагирдя́ Бет-Арбело дро марибны́тко дывэ́с: э дай сыс чингирды пэ котэра́ ла́кирэ биятэнца.

¹⁵ Адя́кэ кэрэ́ла тумэ́нца, о Вефи́лё, пир-дова́ со тумэ́ бут кэрдэ́ фуипэ́н.