Ниеми́я 9 - Библия - Пэ Балтитко Романи чиб (Романэс) 2019

Мануша́ Приґалёнас Лэ́нгирэ Грэхи

¹ Пэ биш тэ шта́рто дывэ́с дро дава́ чхон скэдынэ́пэ сарэ́ чхавэ́ Израилёскирэ, савэ́ постынэна дрэ балы́тка гонэ́ (пеплоса) пэ шэро́.

² Семё (ро́до) Израилёскиро гия́ дрэ риг (уладыяпэ/отделиндяпэ) сарэ́ндыр явирэндыр и уштынэ́ ёнэ и мангнэ́ тэ отмэкэн грэ́хи пал грэ́хи пэ́скирэ и пэ́скирэ дадэнги́рэ.

³ И ёнэ сыс тэрдэ́ пэ пэ́скирэ штэ́ты и шта́рто частыр (чась) дывэсы́тко гиндлэ́ Дэвлэ́скиро лав и мангнэ́ тэ отмэкэн грэ́хи шта́рто частыр (чась) манушэ́ндыр и мангнэпэ Дэвлэ́скэ.

⁴ Тэрдинэ́ упрэ́ пэ Левитэнгиро штэ́то: Ису́со (Ёхошуа́), Ванея, Кадмиило, Шэвания, Вуниё, Шэревия, Вания, Хэнани, и зоралэ́с мангнэпэ кэ Рай Дэвэ́л, лэ́нгиро Дэвэ́л.

⁵ Леви́ты пхэндлэ́: “Ису́со (Ёхошуа́), Кадмиило, Ванея, Хашавния, Шэревия, Годия, Шэвания, Петахия: “Уштэ́н и барьякирэ́н Рас-Дэвлэ́с, Дэвлэ́с тумарэс пэ сарэ́ бэрша́.

⁶ Ту, Раё Дэ́вла, сан Екх, Ту создыян болыбэ́н, болыбэ́н пэ болыбэ́н и халадэ́н лэнгирэн, пхув и саро́, со исын пэ ла́тэ, мо́рё (дэрья́в) и саро́, со исын дрэ лэ́стэ, и Ту дэ́са джиибэ́н далэскэ сарэскэ и болыбны́тка халадыбэна дэ́на паты́в Ту́кэ.

⁷ Ту Кокоро́, Раё Дэ́вла, выкэдыян Авраамос, вылыджиян лэс Уростыр Халдеенгирэндыр и дыя́н лэ́скэ лав Авраа́мо,

⁸ и Ту ґалыян лэс чачунэса анги́л Пэ́стэ и дыя́н лэ́скэ завето, соб (кай) тэ дэс лэ́скирэ чхавэ́нгэ пхув Хананеенгири, Хетеенгири, Амореенгири, Ферезеенгири, Евусеенгири, Гергесеенгири. И Ту кэрдя́н пир Пэ́скиро лав, пал-дова́ со Ту сан чачуно́.

⁹ Ту дыкхця́н би́да амарэ́-дадэнгири дро Еги́пто, и Ту шундя́н лэ́нгири годлыма пашы́л Лоло́ мо́рё (дэрья́в).

¹⁰ Ту кэрдя́н знаме́нии (ґертыка́) и ди́вы анги́л фараоностэ и анги́л сарэ́ндэ пэскирэндэ писхарьендэ, и анги́л саро́ лэ́скиро народо, пал-дова́ со Ту джиндян, со ёнэ кэрдэ́ накуч лэ́нца и кэрдя́н пэ́скэ малва кэ ададывэсатуно дывэ́с.

¹¹ Ту ростырдыян анги́л лэ́ндэ мо́рё (дэрья́в) и ёнэ машки́р пани́ гинэ́, сыр пир шуки́ пхув, и одолэ́н, кон традыяпэ пал лэ́ндэ, Ту тасадякирдян лэн сыр бар дрэ барэ́ паня́.

¹² Дро сты́лбо облокэнгиро Ту лыджиян лэн-дывэсэ́ и дро сты́лбо ягало – раты́, соб (кай) тэ пир лэ́нгиро дром тэ явэ́л битяло.

¹³ Ту явдя́н пэ бэ́рга Синаё и ракирдян лэ́нца болыбна́стыр и дыя́н лэ́нгэ чачунэ́ сэнды, патяибнытка зако́ны, лачхэ́ упхэныбэна́ и припхэныбэна́.

¹⁴ Пхэндя́н лэ́нгэ пал свэ́нто Тыро́ са́вато, и припхэныбэна́, и упхэныбэ́н и сэнды пиридыян лэ́нгэ пир Пэ́скирэ писхаристэ, Мойзастэ.

¹⁵ Ту дыя́н лэ́нгэ маро́ болыбна́стыр, сыр ёнэ сыс бокхалэ́, и пани́ барэстыр Ту дыя́н, ке́ли ёнэ камлэ́ тэ пьен, и пхэндя́н лэ́нгэ, соб (кай) ёнэ тэ джа́н, и тэ лэн пхув, пал сави́ Ту совлахадян лэ́нгэ тэ дэс, сыр Ту ґаздыян васт Пэ́скиро.

¹⁶ Нэ ёнэ и дада́ амарэ́ сыс нахрата и рикирдэ пэ́скири мэн вучэ́с, и на шундлэ́ Тырэ́ припхэныбэна́.

¹⁷ Ёнэ на закамлэ тэ поддэнпэ, на пририпирдэ ди́вы тырэ́, савэ́ ту кэрдя́н лэ́нца, и рикирдэ мэн упрэ́ и пир пэ́скири во́ля палэ чхудэ́ анги́л пэ́стэ шэралэс, соб (кай) тэ явэ́н писхарье́нца. Нэ Ту, сан Дэ́вла, Саво́ выкэдэ́ла тэ отмэкэ́л грэ́хи, Саво́ длэнгэс вырикирэ́ла, и Ту на ячкирдян лэн.

¹⁸ На дыкхи́, со ёнэ кэрдэ́ пэ́скэ сувнакуно́ вычхудо гуруворо и пхэндлэ́: “Дава́ исын амаро́ дэвэл, саво́ вылыджия́ тут Египто́стыр, и на дыкхи́, со ёнэ кэрдэ́ баро́ обракирибэн.

¹⁹ Нэ Ту пир Пэ́скири ла́ска на чхурдыям лэн пэ чхучи́ пхув, сты́лбо облокэнгиро на гия́ киг лэ́ндыр дывэсэ́, соб (кай) тэ лыджа́л лэн пир дром и сты́лбо ла́тыр, саво́ лыджия́ лэн раты́, соб (кай) лэ́нгэ тэ явэ́л бицяло́, пир саво́ дром тэ джа́н.

²⁰ И Ту дыя́н лэ́нгэ Пэ́скиро лачхо́ Ду́хо, соб (кай) тэ сыклякирэс лэн и мана пэ́скири на отлэсас лэ́нгирэ мо́стыр и пани́ дыя́н лэ́нгэ тэ пьен.

²¹ Штардэша́ бэрш Ту дыя́н лэ́нгэ тэ хас пэ чхучи́ пхув, ёнэ ни дро со на маиндлэ трэ́бима; и́дя лэ́нгири на пхурия, и ґэра́ на шулынэ.

²² И Ту дыя́н лэ́нгэ кралипэна́ и народы и росчхудян лэн пэ паша́ и пхув Сигоноскири яця́ лэ́нгири, и пхув Есевонэскири, и пхув Огоскири, крали́скирэ Васаноскири.

²³ Чхавэ́н лэнгирэн Ту убарьякирдян пэ бут сыр чэргэня́ пэ болыбэ́н и лыджиян лэн пэ пхув, пал сави́ Ту ракирдян лэ́нгирэ дадэ́нгэ, со ёй явэ́ла лэ́нгири.

²⁴ И загинэ́ чхавэ́ лэ́нгирэ и пхув яця́ лэ́нгири. Ту отдыян Хананеенгирэ манушэ́н лэ́нгэ дрэ васта́ и кра́лья лэ́нгирэ ячнэ́ тырэ́ и манушэ́н, соб (кай) ёнэ тэ кэрэ́н лэ́нца, со закамэна.

²⁵ И залынэ ёнэ зоралэ́ фо́рья и лачхи́ пхув и лынэ́ ёнэ пэ́скэ кхэра́ сарэ́ барвалыпнаса, колба́ни (водоёмы), савэ́ сыс барэстыр, винаграды́тка и маслинитка унты (сады) и бут дрэвы плодэнца ваш хабэ́н. Ёнэ ханэ́, чалынэ, тхулынэ и коштындлэ пир Тыри́ ла́ска.

²⁶ И кэрдэ́пэ ёнэ нахрата (упряма), и на лынэ́ тэ кутякирэн Тут и ячкирдэ́ Зако́но, замардэ́ пророкэ́н, савэ́ дэ́нас лэ́нгэ годы́ тэ патяс дрэ Ту́тэ, и кэрдэ́ барэ́ калякирибэна.

²⁷ Ту отдыян лэн лэ́нгирэ вэргэ́нгэ, савэ́ притасавэнас лэн. Нэ, сыр дро пхаро́ часо, ёнэ кхардэ́ Тут, Ту шундя́н лэн болыбна́стыр, пир Пэ́скири ла́ска Ту дэсас лэ́нгэ зракхибнаскирэн, и ёнэ зракхэнас лэн вэргэ́ндыр.

²⁸ Сыр саро́ сыс куч и штыл, нэвэ́с ёнэ лэнаспэ пал налачхипэн, и Ту отдэсас лэн вэргэ́нгэ дрэ васта́ и вэ́рги сыс хулая́ пэ лэ́ндэ. Нэ сыр ёнэ нэвэ́с кхардэ́ тут, Ту шундя́н лэн и брониндян лэн (затэрдиян пал лэ́ндэ) бут мо́лы пир Тыри́ лачхэ́-илы́ткима.

²⁹ Ту пририпирэсас лэ́нгэ тэ дживэ́н пир Зако́но, нэ ёнэ на лыджинэ́ пэ́скиро джиибэ́н адя́кэ, и на шундлэ́ Тырэ́ припхэныбэна́ и гинэ́ на долэ́ дромэ́са, сыр Тыро́ стату́то (уставо) ракирдя́, савэ́нца тэ явэ́л джидо́ ману́ш, ко́ли кэрдя́ бы пир стату́то (уставо), и думо пэ́скиро кэрдэ́ твардо и мэн пэ́скири рикирдэ вучэ́с и на кандэнас Тут.

³⁰ Ужакири лэ́нгиро рисибэн кэ Ту, Ту учхакирдян бут бэ́рги и пририпирэсас лэ́нгэ Пэ́скирэ Духо́са пир пророкэ́ндэ, нэ ёнэ на шундлэ́. И ту пиридыян лэн тэ васта́ явирэ народэнгэ.

³¹ Нэ, пир Пэ́скири лачхэ́-илы́ткима Ту на замардян лэн кэ ко́нцо, и на мэкцян лэн, пал-дова́ со Ту сан Дэвэ́л лачхо́ и лачхэ́-дескиро.

³² Акана́, амаро́ Дэ́вла, Дэ́вла баро́, Саво́ исын, зорало́, трашало, Саво́ ракхэ́ла Завето и ла́ска! Мэк тэ на явэ́л набарипнаса сари́ мэнька, сави́ кэрдя́пэ амэ́нца, амарэ́ кральенца, тхагарьенца амарэнца, рашанца амарэнца, пророкэнца амарэнца и амарэ́ дадэ́нца и саро́ народо тыро́, дывэсэ́ндыр Асириякир кральендыр кэ ададывэсатуно дывэ́с.

³³ Дро саро́, со амэ́нца кэрдя́пэ, Ту сан чачуно (право), пал-дова́ со Ту кэрдэн пир чачипэ́н и амэ сам бангэ́.

³⁴ Амарэ́ кра́лья, тхага́рья амарэ́, рашая́ и дада́ амарэ́ на дживдэ́ пир Зако́но и на шундлэ́ Тырэ́ припхэныбэна́ и пририпирибэна Тырэ́.

³⁵ И дро лэ́скиро кралипэ́н ёнэ на дынариндлэ́ Ту́кэ, пир Тыро́ баро́ лачхипэ́н, саво́ Ту дыя́н лэ́нгэ, и пэ буґлы и тхулы пхув, сави́ Ту откэдыян ваш лэ́нгэ, и ёнэ на рисёнас пэ́скирэ фуе́ рэндэ́ндыр.

³⁶ И, акэ, амэ сам писха́рья акана́, пэ дая́ пхув, сави́ Ту дыя́н амарэ́ дадэ́нгэ, соб (кай) тэ хас ла́кирэ барьякирдэ́ (пло́ды), и тэ чараваспэ ла́кирэ лачхипна́са, акэ, амэ сам писха́рья пэ дая́ пхув.

³⁷ И ла́кирэ барьякирдэ́ ёй дэ́ла бутэ́ кральенгэ, пир савэ́ндэ Ту лыян зор пэ амэ́ндэ пал грэ́хи амарэ́. И ёнэ рикирна зор пэ амарэ́ маса́ и пэ амарэ́ кхэритконэ́ мурдалэ́ндэ (ското) пир пэ́скиро ило́, и амэ сам притасадэ.

³⁸ И пир саро́ дава́ амэ даса зорало́ отпхэныбнытко лав, и подчхинаса, и пэ дава́ подчхиныбэн явэ́ла чэргэн амарэ́ тхагарьендыр, и амарэ́ Левитэндыр, и амарэ́ рашандыр.”