Ниеми́я 6 - Библия - Пэ Балтитко Романи чиб (Романэс) 2019

Зракирибэ́н пэ Немиястэ

¹ Сыр догия́ кэ Санавалатоскирэ кана́ и кэ Товия и кэ Гешэмо Аравитянино, и кэ сарэ́ яви́р амарэ́ вэ́рги, со мэ нэвякирдём ва́нта, и со на яця́пэ дрэ ла́тэ доша – акэ, мэк кэ/жы́ко дова́ часо мэ ишчо (инкэ́) на чхудём вудара́ дрэ по́рта и,

² тэ́ньчи бичхадя́ о Санавалато и о Гешэмо кэ мэ тэ пхэнэ́н: “Яв адари́к, зджасапэ дро екх гав пэ Оноскиро штэ́то.” Ёнэ задуминдлэ тэ кэрэ́н ма́нгэ фуипэ́н.

³ Нэ мэ бичхадём кэ ёнэ э послэн тэ пхэнэ́н: “Мэ сом залыно барэ́ рэндоса, мэ на могина́ва тэ джав; и тэрдёлас бы рэ́ндо, ко́ли мэ мэкавас о рэ́ндо и джавас кэ тумэ́.”

⁴ Штар мо́лы бичхавэнас ёнэ кэ мэ кадасавэ́-паць кхарибнаса, и мэ одпхэнавас лэ́нгэ адя́кэ-паць.

⁵ Тэды бичхадя́ кэ мэ о Санавалато дро па́нджто мо́ло пэ́скирэ писхари́с, савэ́стэ дро васт сыс одкэрдо лыл.

⁶ Дро лэ́стэ сыс чхиндло́: “Вурняла малва народэндэ, и о Гешэмо раки́рла, со, хачи, ту, и э Юдэя́кирэ задуминдлэ тэ отпэрэн, ваш кодова́ ту кэрэ́са ва́нта, со камэ́са тэ явэс лэ́ндэ крали́са, пир кодоя-паць ма́лва;

⁷ о пророкэ́н ту чхудя́н упрэ́, соб (кай) ёнэ тэ годлякирэн пал ту́тэ дро Ерусалимо и тэ ракирэ́н: ‘Юдэя́киро кра́ли!’ И дасавэ́ лава́ доджана кэ кра́ли. Адя́кэ яв, обракираса кхэтанэ́.”

⁸ Нэ мэ бичхадём лэ́скэ тэ пхэнэ́н: “Ничи на сыс, пал со ту ракирэ́са – ту придуминдян саро́ пэ́скирэ годя́са.”

⁹ Пал-дова́ сарэ́ ёнэ трашавэнас амэн, думини: “Обмэкэнапэ тэлэ́ васта́ лэ́нгирэ далэ́ рэндостыр, и на выджа́ла ёв”; нэ мэ-далэ́са бутэды́р зоралякирдём мирэ́ васта́.

¹⁰ Явдём мэ дро Шэмаия́скиро кхэр, кэ Дэлаияскиро чхаво́, Мегетавелоскиро чхаво́, и ёв пхандя вудара́ и пхэндя́: “Явэ́н дро Дэвлэ́скиро Кхэр, андрэ́ Кхангири́, пхандаса пал пэ́стэ сарэ́ Кхангирья́кирэ вудара́, пал-дова́ со явэ́на тэ мулякирэ́н тут, и явэ́на тэ мулякирэ́н тут раты́.”

¹¹ Нэ мэ пхэндём: “Сашты́ (могинэ́ла) тэ нашэ́л адасаво́ ману́ш, сыр мэ сом?” Сашты́ адасаво́ тэ явэ́л, со, сыр дасаво сыр мэ сом, тэ джал андрэ́ Кхангири́ (Свэнто-свэнтонэнгиро), соб (кай) тэ ячэ́л джидэса? На джа́ва.”

¹² Мэ джиндём, со на Дэвэ́л бичхадя́ лэс, на дыкхи́, со ёв ракирэ́лас ма́нгэ сыр о проро́ко, нэ со лэс подкиндлэ о Товия, и о Санавалато.

¹³ Ёв ваш дова́ сыс подкиндло, соб (кай) мэ тэ страхадёвав, и тэ кэра́в адя́кэ, и тэ пэрав дро грэ́хо, и соб (кай) ёнэ могиндлэ́ тэ думинэн фуипэ́н пал ма́ндэ и тэ обракирэн ман.

¹⁴ Ри́пир, миро Дэ́вла, Товияс и о Санавалатос пир дасавэ́ лэ́нгирэ рэ́нды, и ишчо (инкэ́) э пророчица Ноадия и явирэ пророкэ́н, савэ́ камлэ́ тэ трашавэн ман!

Ва́нта Кэрды

¹⁵ Ва́нта сыс кэрды дрэ биш тэ па́нджто дывэ́с, дро чхон Елуло, пал пандждэшадуй дывэса́.

¹⁶ Ке́ли шунэнас пал дава́ сарэ́ амарэ́ вэ́рги, и дыкхнэ́ дава́ сарэ́ народы, савэ́ сыс трусця́л амэ́ндэ, то ёнэ бут пынэ́ дрэ лэ́нгирэ якха́, и ґалынэ́, со дава́ рэ́ндо сыс кэрдо́ амарэса Дэвлэ́са.

¹⁷ Апри́ч дова́ дрэ долэ́ дывэса́ славутна Юдэи чхинэнас бут лыла́, савэ́ бичхавэнас кэ Товия; лыла́ Товияскирэ джа́нас кэ ёнэ.

¹⁸ Пал-дова́ со бутджинэ пэ Юдэитко тхэм сыс дрэ совлаха́ лэ́са, пал дова́ со ёв сыс Шэханияскиро зятё (джамутро), Арахоскиро чхаво́, и лэ́скиро чхаво́ Иоханано лыл пал пэ́стэ чхаёрья Мешуламоскирья, Верехияскирэ-чхавэскири.

¹⁹ Анги́л ма́ндэ ёнэ аж шарэнас лэ́скиро лачхипэ́н дескиро, и мирэ́ лава́ ёнэ лыджа́нас кэ ёв. И о Товия бичхавэлас лыла́, соб (кай) тэ трашавэл ман.