Ниеми́я 5 - Библия - Пэ Балтитко Романи чиб (Романэс) 2019

Ниеми́я Роспхандэла Притасаибэн

¹ И кэрдя́пэ бари го́дла машки́р манушэ́ндэ, и э джувлендэ лэ́скирэ пэ да пэ́скирэ пшалэ́ндэ Юдэендэ.

² Сыс адасавэ́, савэ́ ракирэ́нас: “Амэн, о чхавэ́н амарэн, и чхае́н исын бут; и амэ камасас тэ дорэсас маро́, и тэ чалякираспэ и тэ джива́с.

³ Сыс и кадасавэ́, савэ́ ракирэ́нас: “Э фэ́лды амарэ́, винаградники амарэ́, кхэра́ амарэ́, амэ дасас дро сымады́ (залого), соб (кай) тэ ухтылас маро́ бокха́тыр.”

⁴ Сыс и кадасавэ́, савэ́ ракирэ́нас: “Амэ заласам э руп дро дыибэ́н, крали́скэ тэл сумады пэ амарэ́ фэ́лды и пэ амарэ́ винаградники;

⁵ амэ́ндэ исын дасавэ́-паць маса́, савэ́ маса́ исын амарэ́ пшалэ́ндэ, и о чхавэ́ амарэ́ исын кадасавэ́-паць, сыр лэ́нгирэ чхавэ́ исын; акэ, амэ сам бангэ́ тэ отдас амарэн чхавэ́н и амарэн чхае́н дрэ писхарьендэ, и ада́кицы амарэ́ чхаендыр ужэ исын дрэ писхарима. Нанэ нисавэ ловэ́ тэ выкинэн лэн дрэ амарэ́ васта́; и фэ́лды амарэ́ и винаградники амарэ́ исын явирэндэ.”

⁶ Ке́ли мэ шундём лэ́нгиро годлытко ракирибэ́н и дасавэ́ лава́, мэ древа́н холясыём.

⁷ Миро ило́ ґаздыя́пэ холя́са, и мэ нартэс (шылалэс) выпхэндём лачхэ́-родоскирэнгэ и барыдырэ́нгэ, и пхэндём лэ́нгэ: “Тумэ́ лэ́на древа́н бут начачуно ко́фо тумарэ́ пшалэ́ндыр.” И кхардём мэ пэ лэ́ндэ баро́ скэдыибэ́н.

⁸ И пхэндём лэ́нгэ: “Амэ выкиндям амарэ́ пшалэ́н, Юдэяскирэн, савэ́ сыс бикиндлэ народэнгэ, кицы́ амэ́ндэ сыс зор, а тумэ́, хачи, бикнэна тумарэ́ пшалэ́н, и ёнэ бикнэнапэ амэ́нгэ?” Ёнэ цытёнас (мол(ў)чынэнас) и на латхнэ́ отпхэныбэ́н.

⁹ И мэ пхэндём: “Нашукар тумэ́ адя́кэ кэрэ́на. Нау́што на дрэ дар Дэвлэ́скирэ амарэскири тумэ́нгэ трэй тэ псирэ́н, соб (кай) тэ обджан напатыв народэндыр, амарэ́ вэргэ́ндыр:

¹⁰ И мэ адя́кэ-паць, о пша́ла мирэ́ и дына́рья, пашы́л ма́ндэ дэ́нас лэ́нгэ дро вужлыпэ́н и руп и маро́; ячкирасам лэ́нгэ длуго дасаво.

¹¹ Отдэ́н палэ лэ́нгэ акана́ лэ́нгирэ фэ́лды, винаграды́тка и маслинитка унты (сады) лэ́нгирэ, и начачуно ко́фо моля́тыр и оливитконэ дзэтэстыр (елеё), пал савэ́ндэ тумэ́ дынэ́ лэ́нгэ дро длуго.”

¹² И ёнэ пхэндлэ́: “Отдасас палэ и на ла́са лэ́ндыр тэ вытырдас; и кэрасам адя́кэ, сыр ту ракирдян.” И мэ кхардём раша́н, и пхэндём лэ́нгэ тэ дэн совлаха́, со ёнэ адя́кэ кэрна.

¹³ И тринскирдём мэ миро урибэ́н и пхэндём: “Мэк тэ вытринскирэл о Дэвэ́л кажнонэ́ манушэ́с, саво́ на зрикирла дава́ лав, – лэ́скирэ кхэрэ́стыр и лэ́скирэ фелатинятыр, и тэ явэ́л лэ́стэ вытринскирдо и чхучо́!” И саро́ скэдыибэ́н пхэндя́: “Ами́нь.” И шардям амэ Дэвлэ́с; и о народо зрикирдя дава́ лав.

Ниеми́я Сыкавэ́ла Пэ́скиро Тангипэ́н кэ Яви́р Ману́ш

¹⁴ Ишчо (инкэ́): долэ́ дывэсэ́стыр, сыр со́мас мэ бичхадо́ сыр барыдыро́ лэ́нгиро пэ округа пэ Юды́тко пхув, биштонэ бэршэстыр кэ/жы́ко трия́нда яви́р бэрш кэ кра́ли Артаксерксо, сарэ́ дэшуду́й бэрш и мэ, и мирэ́ пша́ла на хаям маро́ барыдырэскиро пэ дая́ округа.

¹⁵ Яви́р барыдыра́ округакирэ, савэ́ сыс вагэдыр (ґарэдыр) ма́ндыр, пхарьякирдэ о народо, и лэнас лэ́ндыр маро́ и мол (вино), апри́ч штардэша́ шэ́кели рупувэ́; ишчо (инкэ́) э дына́рья лэ́нгирэ хулаиндлэ пэ манушэ́ндэ. Мэ-да на кэравас адя́кэ пиро́ дар Дэвлэ́стыр.

¹⁶ Адя́кэ-паць бутя́ пэ дая́ ва́нта мэ подрикиравас; и фэ́лды амэ на закиндямас, и сарэ́ мирэ́ дына́рья скэдэнаспэ одори́к пэ буты́.

¹⁷ О Юдэякирэн и барыдырэ́н сыс пир шэл и пандждэша́ пал миро сками́нд, и ишчо (инкэ́) явэ́нас кэ амэ труялытконэ народэндыр.

¹⁸ Акэ, со сыс кэрадо пэ екх дывэ́с: екх гурув, шов выкэдымэ бакрэ́ и чирикля́ кэрадёнас ма́ндэ; и дрэ дэш дывэса́ бут сыс пины мол (вино) вари-сави́. Нэ на дыкхи́ пэ дава́, мэ на мангавас маро́ барыдырэскиро пэ округа, адя́кэ сыр пхаро́ дынарибэ́н сыс пашто́ пэ дава́ народо.

¹⁹ Ри́пир, миро Дэ́вла, дро лачхипэ́н ма́нгэ саро́, со мэ кэрдём ваш далэ́ манушэ́нгэ (народоскэ)!