Ниеми́я 3 - Библия - Пэ Балтитко Романи чиб (Романэс) 2019

Ва́нта Нэвякирэна

¹ И уштыя́ о Елияшыво, баро́ раша́й, и э пша́ла лэ́скирэ, и рашая́, и кэрдэ́ Бакрэнгири по́рта: ёнэ обсвэнцякирдэ ла и чхудэ́ вудара́ лэ́нгирэ, и вучардятыр (башнятыр) Меа кэ/жы́ко вучарды́ Хананэла обсвэнцякирдэ лэн.

² И пашы́л лэ́стэ кэрэ́нас кхэра́ Иерихонцы (Ерихонытка), пашы́л лэ́ндэ кэрэ́лас кхэра́ о Закхуро, Имриёскиро чхаво́.

³ Мачхэнгирэ по́рты кэрэ́нас мануша́, савэ́ бияндлэ дрэ Сеная: ёнэ учхакирдэ лэн, и чхудэ́ вудара́ лэ́нгирэ, о клыдына лэ́нгирэ, и шыберы (засовы) лэ́нгирэ.

⁴ Пашы́л лэ́ндэ кэрэ́лас ремо́нто пэ ва́нта о Меремофо, Урияскиро чхаво́, Гакоцоскиро чхаво́; пашы́л лэ́ндэ кэрэ́лас ремо́нто о Мешуламо, Берехияскиро чхаво́, Мешызабелоскиро чхаво́; пашы́л лэ́ндэ кэрэ́лас ремо́нто о Садоко, Баанаскиро чхаво́;

⁵ пашы́л лэ́ндэ кэрэ́нас ремо́нто Фекоитка; нэ сама славутна лэ́ндыр на бандькирдэ пэ́скири мэн, соб (кай) тэ кэрэ́л буты́ ваш пэ́скирэ Ра́скэ-Дэвлэ́скэ.

⁶ Пэ Пхуранэ́ по́рты кэрдэ́ ремо́нто о Иоида, Пасеахоскиро чхаво́, и о Мешуламо, Бесодияскиро чхаво́: ёнэ учхакирдэ лэн, и чхудэ́ лэ́нгирэ вудара́, и клыдына, и шыберы лэ́нгирэ.

⁷ Пашы́л лэ́ндэ кэрэ́лас ремо́нто о Мелатия Гаваонитянино, и о Иодоно Меронофостыр, Гаваоныткэнца, и Мицфитконэнца, савэ́ сыс тэл зор пэ палэ-рэкитка барыдырэ́скэ округи.

⁸ Пашы́л лэ́стэ кэрэ́лас ремо́нто о Узило, Харгаияскиро чхаво́, рупунари (серебрянико), и пашы́л лэ́стэ кэрэ́лас ремо́нто о Ханания, Гаракахимоскиро чхаво́. И шука́р нэвякирдэ Ерусалимо кэ буґлы ва́нта.

⁹ Пашы́л лэ́ндэ кэрэ́лас ремо́нто о Рефаия, Хураскиро чхаво́, о барыдыро́ пэ паш-округа Ерусалимо́скири.

¹⁰ Пашы́л лэ́ндэ и проти пэ́скиро кхэр кэрэ́лас ремо́нто о Иедаия, Харумафоскиро чхаво́, и пашы́л лэ́стэ кэрэ́лас ремо́нто о Хатушо, Хашавнияскиро чхаво́.

¹¹ Пэ второ штэ́то кэрэ́лас ремо́нто о Малхия, Харимоскиро чхаво́, и о Хашуво, Пахаф-Моавитко чхаво́; ёнэ-паць кэрэ́нас ремо́нто пэ Бовитко вучарды́ (башня).

¹² Пашы́л лэ́ндэ кэрэ́лас ремо́нто о Шалумо, Галохешоскиро чхаво́, барыдыро́ пэ паш-округа Ерусалимо́скири, ёв сыс и лэ́скирэ чхая́.

¹³ Долинакирэ портакэ кэрэ́лас ремо́нто о Хануно, и э Заноахоскирэ мануша́: ёнэ ґаздынэ́ лэн, и чхудэ́ вудара́ лэ́нгирэ, и клыдына, и шыберы лэ́нгирэ, и ишчо (инкэ́) кэрэ́нас ремо́нто ёнэ пэ бар (тысёнцо) куня́ вантакирэ кэ по́рта Гнэёскири.

¹⁴ Гнэёскирэ портакэ кэрэ́лас ремо́нто о Малхия, Рехавоскиро чхаво́, барыдыро́ пэ Бефкаремоскири округа: ёв нэвякирдя ла и чхудя́ вудара́ лэ́нгирэ, клыдына лэ́нгирэ, и шыберы лэ́нгирэ.

¹⁵ Ѓанынгакирэ по́рты кэрэ́лас ремо́нто о Шалумо Колхозеёскиро чхаво́, барыдыро́ пэ Мицфакири округа: ёв ґаздыя́ лэн, и учхакирдя́ лэн, и чхудя́ вудара́ лэ́нгирэ, клыдына лэ́нгирэ, и шыберы лэ́нгирэ, – ёв и кэрэ́лас ремо́нто пэ ва́нта пашы́л вэндэри́н (водоёмо) Селахо, проти крали́скири у́нта (садо) кэ ґэруня (ступеньки), кай змэкэнапэ Давидо́скирэ форо́стыр.

¹⁶ Пал лэ́стэ кэрэ́лас ремо́нто о Ниеми́я, Азбукоскиро чхаво́, барыдыро́ пэ паш-округа Бефцуроскири, кэ копли́ца Давидоскири, и кэ выганады вэндэри́н (прудо), и кэ кхэр муршэнгиро.

¹⁷ Пал лэ́стэ кэрэ́нас ремо́нто Леви́ты: о Рехумо, Ванияскиро чхаво́; пашы́л лэ́стэ кэрэ́лас ремо́нто о Хашавия, барыдыро́ пэ паш-округа Кеилёскири, пало́ пэ́скири округа.

¹⁸ Пал лэ́стэ кэрэ́нас ремо́нто о пша́ла лэ́нгирэ: о Баваё, Хенададоскиро чхаво́, барыдыро́ пэ Кеилёскири паш-округа.

¹⁹ И пашы́л лэ́стэ кэрэ́лас ремо́нто о Езеро, Исусо́скиро чхаво́, барыдыро́ пэ Мицфа, пэ второ штэ́то, анги́л сыр тэ джас андрэ́ мардя́рня (оружэйня) пэ вэнгло.

²⁰ Пал лэ́стэ добусо́вэс (старательнэс) кэрэ́лас ремо́нто о Варухо, Забваёскиро чхаво́, пэ второ штэ́то, вэнглостыр кэ вудара́, кэ Елияшывоскиро кхэр, барэ́-рашаскиро.

²¹ Пал лэ́стэ кэрэ́лас ремо́нто о Меремофо, Урияскиро чхаво́, Гакоцоскиро чхаво́, пэ второ штэ́то, вударэндыр дрэ Елияшывоскиро кхэр кэ яго́ро пэ Елияшывоскиро кхэр.

²² Пал лэ́стэ кэрэ́нас ремо́нто э рашая́, савэ́ сыс трусця́л мануша́ долостыр.

²³ Пал лэ́ндэ кэрэ́лас ремо́нто о Вениамино, и о Хашуво, анги́л лэ́нгиро кхэр; пал лэ́ндэ кэрэ́лас ремо́нто о Аза́рия, Масеёскиро чхаво́, Ананияскиро чхаво́, пашы́л пэ́скиро кхэр.

²⁴ Пал лэ́стэ кэрэ́лас ремо́нто о Бинуё, Хенададоскро чхаво́, пэ второ штэ́то, Азариёскирэ кхэрэ́стыр кэ вэнгло, кэ збангипэн дромэскиро.

²⁵ Пал лэ́стэ сыс о Фалало, Узаёскиро чхаво́, анги́л вэнгло и кэ вучарды́ (башня), со вытэрдёла крали́скирэ-упратунэ кхэрэ́стыр, кай исын пашы́л грэ́да (дво́ро) темницакири (штарибнаскири). Пал лэ́стэ сыс Федаия, Парошоскиро чхаво́.

²⁶ Э Нефинеи, хачи, савэ́ дживдэ́ кэ Офелё, кэрдэ́ ремо́нто англал Панитка по́рты кэ васто́ко и кэ вытырдыны вучарды́.

²⁷ Пал лэ́ндэ кэрэ́нас ремо́нто Фекоитка мануша́, пэ второ штэ́то, штэто́стыр анги́л бари вытырдыны вучарды́ кэ Офелытко ва́нта.

²⁸ Дурэды́р Грэнгирэ портэндыр кэрэ́нас ремо́нто э рашая́, кажно маму́й пэ́скиро кхэр.

²⁹ Пал лэ́ндэ кэрэ́лас ремо́нто о Садоко, Имероскиро чхаво́, маму́й пэ́скиро кхэр, и пал лэ́стэ кэрэ́лас ремо́нто о Шемаия, Шеханияскиро чхаво́, стрэгари пэ вастокитко по́рта.

³⁰ Пал лэ́стэ кэрэ́лас ремо́нто о Ханания, Шелемияскиро чхаво́, и Хануно, шо́вто чхаво́ Цалафоскиро, пэ второ штэ́то. Пал лэ́стэ кэрэ́лас ремо́нто о Мешуламо, Берехияскиро чхаво́, маму́й пэ́скири шту́ба.

³¹ Пал лэ́стэ кэрэ́лас ремо́нто о Малхия, Гацорфиёскиро чхаво́, кэ кхэр Нефинеитко и бикибнарьенгиро, маму́й Гамифкадытка по́рта и кэ вэнглытка джиибнытка шту́бы.

³² А машки́р вэнглытка джиибнытка шту́бы кэ Бакрэ́нгирэ по́рты кэрэ́нас ремо́нто рупунарья и бикибнарья/кофарья (торговцы).