Ниеми́я 13 - Библия - Пэ Балтитко Романи чиб (Романэс) 2019

Ниеми́я Зоралэ́с Марлапэ Бизладоса

¹ Дро дова́ дывэ́с гиндлэ́ машки́р манушэ́ндэ лылвари́ Мойзаскири и ґалынэ́ дрэ ла́тэ: “Амонитянино и Моавитянино на могинэ́на тэ заджа́н дро Дэвлэ́скиро кхэтаныпэн никели,

² пал-дова́ со ёнэ на стрэниндлэ Израилёскирэ чхавэ́н марэ́са и пане́са и лынэ́ пэ лэ́ндэ Валамос, соб (кай) тэ магирэс лэн; но Дэвэ́л амаро́ пирикирдя магирибэн дро бахтякирибэ́н.”

³ Сыр ёнэ шундлэ́ дава́ Зако́но, ёнэ вылыджинэ́ саро́ народо, саво́ на сыс Израилёскирэ манушэ́ндыр.

⁴ Анги́л дава́ раша́й Елиашыво, саво́ сыс тырдо паш шту́бы (комнаты) дро амаро́ Дэвлэ́скиро Кхэр, саво́ сыс пашатуны сэмэ́нца Тонияскэ,

⁵ кэрдя́ ваш лэ́скэ бари шту́ба, дрэ сави́ англэды́р чхувэ́нас да́ры марэстыр, ладано и штэклы и дэшэнгири (ме́ра) марэстыр, моля́тыр (виностыр) и ксилэстыр, савэ́ трэй тэ явэ́н пир Зако́но ваш Левитэ́нгэ, багаибнаскирэнгэ и ракхибнарьенгэ, и да́ры ваш рашангэ.

⁶ Сыр саро́ дава́ сыс, мэ на со́мас дро Ерусалимо, пал-дова́ со дро трия́нда яви́р бэрш Вавилоно́скирэ крали́скирэ Артаксеркоскирэ мэ псирдём кэ кра́ли и пир вари-савэ́ дывэса́ нэвэ́с вымангдёмпэ крали́стыр.

⁷ Сыр мэ явдём дро Ерусалимо и уджиндём пал на́лачхо рэ́ндо, саво́ кэрдя́ Елиашыво, саво́ кэрдя́ шту́ба ваш Тонияскэ дро Дэвлэ́скиро Кхэр,

⁸ то ма́нгэ сыс зоралэ́с пхарэ́с (на пир ило́), и мэ вычурдыём сарэ́ кхэри́тка предметы (чы́сы) Тонияскирэ яври́ штубэндыр.

⁹ И пхэндём, соб (кай) тэ выжужакирэн шту́бы, и чхурдыём лав (пропониндём), соб нэвэ́с тэ залыджан кхорэ́ (сасу́ды) Дэвлэ́скирэ Кхэрэскир одори́к, да́ры марэстыр и ладано.

¹⁰ Кэ саро́ уджиндём мэ, со Левитэ́нгэ на отдэнас лэ́нгири паш, и со Леви́ты и багаибнаскирэ рознашнэпэ кажно пир пэ́скири фэ́лда.

¹¹ Мэ костём пал дава́ шэралэн, и пхэндём: “Пал со ячкирдям амэ Дэвлэ́скиро Кхэр?” И мэ скэдыём лэн и чхудём лэн пэ пэ́скиро штэ́то.

¹² Сарэ́ Юдэи ячнэ́ тэ янэ́н дэ́што паш пир маро́, мол (вино), ксил дрэ пиралы́.

¹³ Мэ чхудём паш пираля́ раша́с Шэлэмияс и Садокос лылваритконэс, и о Феданияс Левитэндыр и паш лэ́ндэ сыс Ханана, чхаво́ Матфанияскиро, пал дова́, со ёнэ сыс чачунэ́. И пэ лэ́ндэ сыс зор тэ роздэн дава́ лэ́нгирэ пшалэ́нгэ.

¹⁴ Ри́пир ман пал дава́, миро Дэ́вла, и на бистыр мирэ́ лачхэ́ рэ́нды, савэ́ мэ кэрдём ваш миро Дэвлэ́скиро Кхэр и ваш раша́нгирэ рэ́нды (де́лы) паш лэ́стэ.

¹⁵ Дрэ долэ́ дывэса́ дыкхцём мэ дрэ Юдэ́я, со дро са́вато (субо́та) тасавэна дро пресо, лыджа́на ґарбы (снопы) и чхувэ́на мол, винаградо, инжыро и кажно пхарипэ́н и лыджа́на дро са́вато дро Ерусалимо. И мэ зоралэ́с выпхэндём лэ́нгэ дро дова́ дывэ́с, сыр ёнэ бикнэнас хабнытко.

¹⁶ Тиряни дживдэ́ кэ Юдэ́я и янэ́нас мачхэ́ и разно товаро (арцикуло) и бикнэнас лэс дро са́вато манушэ́нгэ Юдэя́тыр и Ерусалимо́стыр.

¹⁷ И мэ костём барыдырэ́н Юдеятыр и пхэндём лэ́нгэ: “Пал со тумэ́ кэрэ́на дасаво налачхипэн и магирэна са́вато?

¹⁸ Хай, на адя́кэ-паць кэрдэ́ тумарэ́ дада́ и пал дава́ Дэвэ́л амаро́ яндя́ пэ амэ́ндэ и пэ дава́ фо́ро сари́ дая́ би́да? Тумэ́ холякирэна буты́р Дэвлэ́с пэ Израилё, магири са́вато (субо́та).

¹⁹ Пало́ (после) дава́, сыр кэрдя́пэ цямло (кало́) пашы́л Ерусалимо́скири по́рта, анги́л са́вато, мэ припхэндём тэ закэрэн вудара́ и пхэндём, соб (кай) тэ на псиравэн (отпхандэн) лэн анги́л злоко пало́ (после) са́вато.

²⁰ Бикибнарья и кофарья кажнонэ́ товароса (арцикулоса) ратькирдэ на дро Ерусалимо и е́кхвар и буты́р.

²¹ Мэ шылалэс выпхэндём лэ́нгэ, и пхэндём: “Пал со тумэ́ ратькирна паш дая́ ва́нта? Ко́ли тумэ́ ишчо (инкэ́) е́кхвар адя́кэ кэрна, то мэ чхува́ва васт пэ тумэ́ндэ.” Далэ́ дывэсэ́стыр ёнэ буты́р на явэ́нас дро са́вато.

²² Мэ припхэндем Левитэ́нгэ, соб (кай) ёнэ тэ кэрэнпэ жужэ́ (чыста) и тэ явэ́н тэ рикирэ́н стрэ́га пэ по́рта, ваш дова́, соб (кай) тэ свэнкинэн дывэ́с саватытко. И пал дава́, “Ри́пир пал ма́ндэ, Дэ́вла, и приманг ман пир Пэ́скири лачхэ́-илы́ткима.”

²³ Ишчо дрэ долэ́ дывэса́ мэ дыкха́вас Юдэ́н, савэ́ лынэ́ пэ́скэ борьен Азотянкэндыр, Моавитянэндыр и Аммонитянэндыр,

²⁴ И пал дова́ чхавэ́ лэ́нгирэ ракирна паш пир пир-азотытко, ци пэ чиба́ явирэ-манушэ́нгирэ и на джинэ́на тэ ракирэ́н Юдыткэс.

²⁵ Мэ костём лэн пал дова́ и магирдём лэн, и вари-савэ́н муршэ́н лэ́ндыр мардём, костём пал лэ́нгирэ бала́ и мангдём лэн Дэвлэ́са, соб (кай) ёнэ тэ на отдэ́н пэскирэн чхае́н пал лэ́нгирэ чхавэ́ндэ, и тэ на лэн чхае́н лэнгирэн пал пэ́скирэ чхавэ́н и пал пэ́стэ.

²⁶ Ци на пал лэ́ндэ, – ракирдём мэ, – кэрдя́ грэ́хи Соломо́но, кра́ли Израилёскиро? На сарэ́ндэ манушэ́ндэ сыс дасаво кра́ли, сыр Соломо́но. Лэ́скэ сыкадя́ лэ́скиро Дэвэ́л и Дэвэ́л чхудя́ лэс крали́са пэ сарэ́ндэ Юдэ́ндэ: и явирэ пхувья́тыр джувля́ залыджинэ лэс дро блэ́ндо.

²⁷ И сашты́ ли амэ́нгэ тэ шунэ́с пал амэ́ндэ, со тумэ́ кэрна саро́ дава́ налачхипэн анги́л амарэ́ Дэвлэ́стэ, ко́ли ла́са явирэ джувле́н?”

²⁸ Иоидаскиро чхавэ́ндыр, чхавэ́с барэ́ раша́с Елиашывос, лэ́скиро дад сыс джамутрэса (зятёса) Санавалатоскирэса, Хоронитконэса. Мэ вытрадыём лэс пэ́стыр.

²⁹ “Ри́пир лэ́нгэ, миро Дэ́вла, пал-дова́ со ёнэ магирдэ́ рашаибэн и завето раша́нгиро и Левитэнгиро.”

³⁰ Адя́кэ, мэ вымордём лэн сарэ́ манушэ́ндыр на Израилёскирэ манушэ́ндыр и кэрдём дынарибэ́н раша́нгиро и Левитэнгиро, кажнонэскиро пир лэ́скиро рэ́ндо.

³¹ И кашта́ тэ янэ́н кэ пэ́скиро часо и англатунэ́ барьякирдэ́ (пло́ды). Ри́пир ман, Дэ́вла миро, ваш миро миштыпэ́н!