Ниеми́я 10 - Библия - Пэ Балтитко Романи чиб (Романэс) 2019

Мануша́, Кон Чхудя́ Чэргэнори (Печать)

¹ Мануша́, савэ́ чхудэ́ чэргэнорья (печати), сыс: Ниеми́я-Тиршафа, Гахалияскиро и Седэкияскиро чхаво́,

² Сераия, Аза́рия, Ереме́ё,

³ Пашхуро, Амария, Малхия,

⁴ Хатушо, Шэвания, Малухо,

⁵ Харимо, Меремофо, Овадия,

⁶ Дание́лё, Гинефоно, Варухо,

⁷ Мешуламо, Авия́, Миямино,

⁸ Мазия, Вилгаё, Шэмаия: адалэ́ сыс рашая́.

⁹ Леви́ты: Ису́со (Ёхошуа́), Азанияскиро чхаво́, Бинуё, Хенададоскирэ чхавэ́ндыр, Кадмиило,

¹⁰ и лэ́нгирэ пша́ла: Шэвания, Годия, Клита, Фелаия, Ханано,

¹¹ Миха, Рехово, Хашавия,

¹² Закхуро, Шэревия, Шэвания,

¹³ Годия, Ваниё, Венинуё.

¹⁴ Манушэ́нгирэ шэралэ́: Парошо, Пахавор-Моа́во, Эламо, Зафу, Вания,

¹⁵ Вуниё, Азгадо, Беваё,

¹⁶ Адония, Бигваё, Адино,

¹⁷ Атеро, Езэки́я, Азуро,

¹⁸ Годия, Хашумо, Бецаё,

¹⁹ Харифо, Анафофо, Неваё,

²⁰ Магпиашо, Мешуламо, Хезиро,

²¹ Мешэзаведо, Садоко, Ядуё,

²² Фелатия, Ханано, Анания,

²³ Осия, Ханания, Хашуво,

²⁴ Лохешо, Пилха, Шовеко,

²⁵ Рехумо, Хашавна, Маасея,

²⁶ Ахия, Ханано, Анано,

²⁷ Малухо, Харимо, Ваана.

²⁸ И яви́р мануша́, рашая́, Леви́ты, и мануша́, савэ́ ракхнэ по́рта, багаибнаскирэ Нефинеи, и сарэ́ мануша́, савэ́ отгинэ́ дрэ риг явирэ-тхэмэ́скирэ манушэ́ндыр кэ Дэвлэ́скиро Зако́но, лэ́нгирэ джувля́, лэ́нгирэ чхавэ́ и лэ́нгирэ чхая́, сарэ́, савэ́ могиндлэ́ тэ ґалён,

²⁹ ёнэ приячнэ кэ пэ́скирэ пша́ла, кэ лачхэ́-родоскирэнгэ (патывалэдырша) лэ́ндыр, и гинэ́ дро отпхэныбэ́н совлахаса и прокошыбнаса – тэ кэрэ́н пир Дэвлэ́скиро Зако́но, саво́ сыс дыно́ Мойзаса Дэвлэ́скирэ-писхарискирэ вастэ́са, и тэ зракхэн, и тэ сполнинэн амарэ́ Ра́скирэ-Дэвлэ́скирэ, Дэвлэ́скирэ сарэ́ запхэныбэна, и Лэ́скирэ припхэныбэна́, и Лэ́скирэ упхэныбэна́,

³⁰ и тэ на отдэ́н пэскирэн чхае́н манушэ́нгэ явирэ тхэмэстыр, и лэ́нгирэ чхае́н тэ на лэн пал пэ́скирэ чхавэ́ндэ;

³¹ и ко́ли явэ́на мануша́ явирэ тхэмэстыр тэ янэ́н товары (арци́кулы) и саро́ ваш бикныбэн дро са́вато (субо́та), тэ на лэн лэ́ндыр дро са́вато, и дро свэ́нто дывэ́с, и пэ эфта́то бэрш тэ ячкирэн вужлипэна (длуги), савэ́ тэ на явэ́н.

³² И чхудям амэ пэ́скэ дро Зако́но тэ дас пэ́стыр пир трин шэ́кели дро бэрш ваш трэ́бима ваш амарэ́-Дэвлэ́скиро Кхэр:

³³ ваш свэ́нта марэ́, ваш кажно-дывэсы́тко маруно́ яныбэ́н и ваш кажно-дывэсы́тко цэ́ло схачкирибэ́н, ваш са́ваты, ваш нэвочхон, ваш свэ́нки, ваш свэ́нта рэ́нды и ваш свэ́нта дыибэна́, соб (кай) тэ жужакирэнпэ Израилёскэ грэхостыр, и ваш саро́, со кэрэ́лапэ дро амарэ́-Дэвлэ́скиро Кхэр.

³⁴ И чхурдыям амэ жре́биё, конэ́скэ тэ янэ́н кашта́: рашая́, Леви́ты и мануша́, ке́ли, и савэ́скэ амарэ́ родо́скэ дрэ упхэндло́ часо кажно бэрш, тэ янэс лэн кэ амарэскирэ-Дэвлэ́скиро Кхэр, соб (кай) ёнэ тэ хачон ваш амарэ́ Ра́скэ-Дэвлэ́скэ свэ́нто дыибэ́н, сыр исын зачхиндло́ дро Зако́но.

³⁵ И дыям амэ лав кажно бэрш тэ янас дро Ра́скирэ-Дэвлэ́скиро Кхэр пэ́рва (англатунэ́) барьякирдэ́ (пло́ды) кажнонэ́ дрэвостыр (каштэ́стыр);

³⁶ адя́кэ-паць тэ янас дро амарэ́-Дэвлэ́скиро Кхэр кэ рашая́, кэ мануша́, савэ́ дынаринэна дрэ амарэ́-Дэвлэ́скиро Кхэр, амарэ́ англатунэн чхавэ́н амарэн чхавэ́ндыр и амарэ́ кхэритконэ́ мурдалэ́ндыр (ското́стыр), сыр исын зачхиндло́ дро Зако́но, и англатунэ́ амарэ́ барэ́ и тыкнэ́ мурдалэ́ндыр (ското́стыр).

³⁷ И тэ янас англатуно́ амаро́ маро́, и свэ́нто яныбэ́н амаро́ и барьякирдэ́ (пло́ды) кажнонэ́ вэшэ́стыр мол (вино) и ксил амэ ява́са тэ янас рашангэ ваш амарэ́ Ра́скирэ-Дэвлэ́скири пиралы́ и дэшэнгири амарэ́ пхувья́тыр Левитэ́нгэ. Ёнэ, Леви́ты, явэ́на тэ лэн дэшэнгири дрэ сарэ́ фо́рья, кай амэ́ндэ исын пхув.

³⁸ Пашы́л Левитэндэ, ке́ли ёнэ явэ́на тэ лэн дэшэнгири, явэ́ла тэ явэ́л раша́й, Ароноскиро чхаво́, соб (кай) Леви́ты тэ лыджа́н дэшэнгири пэ́скирэ дэшэнгирьятыр дро амарэ́-Дэвлэ́скиро Кхэр, дрэ шту́бы, савэ́ выкэдынэ́ ваш пиралы́;

³⁹ пал-дова́ со дрэ далэ́ шту́бы сыр Израилёскирэ чхавэ́, адя́кэ и Леви́ты исын бангэ́ тэ янэ́н свэ́нто дыибэ́н; маро́, мол (вино) и ксил. Одо́й свэ́нта кхорэ́ (сасу́ды), и рашая́, савэ́ дынаринэна, и мануша́, савэ́ исын тэрдэ́ пашы́л по́рта, и багаибнаскирэ. И амэ на ячкираса амарэ́-Дэвлэ́скиро Кхэр.