Ниеми́я 1 - Библия - Пэ Балтитко Романи чиб (Романэс) 2019

Ниеми́я Мангэлапэ пал Лэ́скирэ Манушэ́ндэ

¹ Лава́ Ниемияскирэ, Ахалииноскирэ чхавэ́скирэ. Дро чхон Кислев, дро бишто бэрш, со́мас мэ кэ Сузы, дро шэрутно фо́ро [крали́скири фэлатин-ю.о.].

² И явдя́ о Ханани, екх мирэ́ пшалэ́ндыр, ёв и вари-кицы́ мануша́ Юдэя́тыр. И пхуцёмпэ мэ лэ́ндыр пал Юдэ́ндэ, савэ́ ячнэ́пэ джидэ́ плено́стыр, и пал Ерусалимо.

³ И пхэндлэ́ ёнэ ма́нгэ: “Ячадэ мануша́, савэ́ ячнэ́ джидэ́ плено́стыр, исын одо́й, дро лэ́нгиро тхэм, дрэ бари би́да и дрэ напатыв; ва́нта Ерусалимо́скири исын пхагирды, и по́рты лэ́скирэ исын хачкирдэ́ яга́са.

⁴ Сыр мэ шундём, мэ бэсцём и зарондём, и со́мас мэ дрэ ту́га ада́кицы дывэса́, рикирдём мэ бокхало посто и мангдёмпэ анги́л болыбна́скирэ Дэвлэ́стэ,

⁵ и ракиравас мэ: “Раё Дэ́вла, болыбна́скиро, Дэ́вла баро́ и трашадо, Саво́ ракхэ́ла завето и ла́ска кэ сарэ́, савэ́нгэ Ту сан дро́го, и савэ́ рикирна Тырэ́ припхэныбэна́!

⁶ Тэ явэ́н Тырэ́ кана́ и якха́ Тырэ́ откэрдэ, соб (кай) тэ шунэ́с па́тери (моли́тва) Тырэ́ писхарискири, савья́са мэ мангавпэ анги́л Ту́тэ акана́ рат и дывэ́с пал Израилёскирэ чхавэ́ндэ, Тырэ́ писхарьендэ, и приґалёвавпэ мэ дрэ грэ́хи Израилёскирэ чхавэ́нгирэ, савэ́нца кэрдя́м амэ грэ́хо анги́л Ту́тэ, грешындям – и мэ и мирэ́-дадэ́скиро кхэр.

⁷ Амэ яця́м дошалэ́ анги́л Ту́тэ, и на зракхцям припхэныбэна́ и стату́ты (уставы) и сыклякирибэ́н, савэ́ Ту припхэндян о Мойза́скэ, Тырэ́ писхари́скэ.

⁸ Нэ ри́пир лав, саво́ Ту дыя́н дро припхэныбэ́н Мойза́скэ, Тырэ́ писхари́скэ, ракири́: “Ко́ли тумэ́ тэ кэрэнпэ прахарьенца, то Мэ росчхурдава тэ дживэ́н тумэн пир манушэ́ндэ;

⁹ а ко́ли рисёна тумэ́ кэ Мэ, и лэ́на тэ ракхэ́н Мирэ́ припхэныбэна́, и тэ кэрэ́н пир лэ́ндэ, тэ́ньчи, мэк тэ явэ́н вытырдынэ кэ болыбнытко яго́ро (краё), и одотхы́р Мэ скэда́ва тумэн и лыджа́ва пэ штэ́то, саво́ Мэ выкэдыём, соб (кай) тэ чхувэ́н одо́й Миро лав.

¹⁰ Ёнэ исын Тырэ́ писха́рья и народо Тыро́, саво́ Ту выкиндян Тырэ́ баря зорья́са и Тырэ́ зоралэ́ вастэ́са.

¹¹ Мэ манга́ва зоралэ́с Тут, Раё Дэ́вла! Тэ явэ́л Тыро́ кан откэрдо тэ шунэ́л па́тери (моли́тва) Тырэ́ писхарискиро и па́тери Тырэ́ писхарьенгиро, савэ́ камэ́на тэ лэн шукарипэ́н анги́л Тыро́ Лав. И тэ дэс Ту лачхыпэн Тырэ́ писхари́скэ акана́, и тэ дэс лэ́скэ ла́ска кадасавэ́ манушэ́стэ. Мэ со́мас моля́киро дыибна́ри (кучика́ри) крали́стэ.