Naumo 2 - Библия - Пэ Балтитко Романи чиб (Романэс) 2019

Хасибэ́н пэ Ниневия

¹ Мулякирибнаскиро джа́ла пэ ту́тэ, Ниневие! Ракх форо́скирэ зорьякирдэ ва́нты! Дыкхэ́н цямкэс пало́ дром, зорьякирэн тумарэ́ фланги! Скэдэ́н бутэды́р тумари́ зор!

² Пал-дава́ со Рай Дэвэ́л чхувэ́ла дро зор нэвэ́стыр барипэ́н Яково́скиро, сыр барипэ́н Израилёскиро, пал-дова́ со вэ́рги ячкирдэ́ чхучэ́ штэ́ты лэ́ндэ, и ёнэ хасякирдэ́ дрэ руи́ны лэ́нгирэ винаграды́тка рандя́.

³ Шчыты Лэ́скирэ зоралэ́-муршэнгирэ исын лолэ́, Лэ́скирэ бидарипнаскирэ мурша́ (халадэ́) исын дро ярко лоло́ урибэ́н, а марибны́тка вурдэна́ явэ́на зяиндлэ састырэнца дро дова́ дывэ́с, ке́ли сарэ́ скэдэ́напэ пэ марибэ́н, и чхурдыбнытка бустя́ (коп΄и) кунинэнапэ.

⁴ Марибны́тка вурдэна́ вурняна годла́са пир га́сы [форуны́/пло́шча-р.с.], ёнэ шпулэна екх екхэ́с и кхарэнапэ екх анги́л явирэ́стэ пэ буґлэ дрома́: ёнэ зяинэна и отмарнапэ яга́са, ёнэ праста́на сы́гэс сыр блискавица.

⁵ Лэ́нгиро барыдыро́ кхарэ́ла кэ пэ лэ́скирэ выкэдынэ́ муршэ́н, ёнэ обштавэнапэ, гии пир дром; ёнэ праста́на сы́гэс пэ форо́скирэ ва́нты, и ёнэ ячнэ́ скэдынэ́ тэ отмарэнпэ.

⁶ По́рта пэ рэ́ки (лэня́) отпхандэлапэ, и бари фэлатин/колов (дворцо) роспхадёла.

⁷ И исын кадасаво́ упхэныбэ́н: чу́жа халадэ́ росчхувэна кра́лица и лыджа́на ла дро пле́но. Ла́кирэ-штубакирэ писхарицы явэ́на тэ тугинэн зоралэ́с пал ла́тэ голумбицэнгирэ занорьенца, мариндой (пэкави) пэс дро колы́н.

⁸ Ниневия сыс сыр вэндэри́н (прудо) пане́са самонэ пэрвонэ́ дывэсэ́ндыр, нэ акана́, мануша́ нашэ́на форо́стыр. “Тэрдён, тэрдён!” – вари-савэ́ годлэна, нэ ние́кх (нико́н) на рисёла палэ.

⁹ ‘Чорэн руп! Чорэн сувнака́й! Нанэ ме́ра миштыпнаскэ и барвалыпнаскэ дро кажно вучы пири́!

¹⁰ Ла́тыр яця́ чхучо́ штэ́то и хасякирдо штэ́то; ило́ биладёла и чанга́ издрана; зоралы́ дукх исын дро кажно пашваро, и муя́ сарэ́ндэ калынэ.

¹¹ Кай исын акана́ хашча (логово) шчэрэнгиро, и тэрнэ́-шчэрэнгиро чараибнытко штэ́то; пир саво́ псирдэ́ шчэр, шчэрица, и шчэроро, и нико́н на трашавэлас лэн?

¹² Шчэр (ле́во) кусця пэ котэра́, кицы́ трэй мас ваш лэ́скирэ шчэрорэндэ, и, тасадя ваш пэ́скирэ шчэрицатэ. Ёв пхэрдякирдя́ ґебара́ (пешчэры) масэса дрэ данда́, и лэ́скирэ хашчы (логовы) джидэ́ масэса.

¹³ “Акэ, Мэ джа́ва проти ту́тэ, Ниневие!”, – ракирэ́ла янголэ́нгирэ-болыбна́скиро Рай Дэвэ́л. “Мэ хачкирава тырэ́ марибны́тка вурдэна́ дро тхув, и курта́ла почингирэла тырэ́ тэрнэ́ шчэрэн; Мэ чхува́ва ко́нцо (яго́ро) пэ тыро́ дорэсыбэ́н пэ пхув, и буты́р на явэ́ла шундлы зан тырэ́-бичхаибнаскирэндыр.”