Naumo 1 - Библия - Пэ Балтитко Романи чиб (Романэс) 2019

¹ Ангилпхэныбэ́н проти Ниневия. Лылвари́ пал Наумоскиро дыкхибэ́н, саво́ сыс Елкосостыр.

Дэвэ́л Зоралэ́с Холясола пэ Вэргэ́ндэ

² О Рай-Дэвэ́л исын зэвлыныпнаскиро Дэвэ́л, и Ёв отдэ́ла палэ сэндоса. Рай Дэвэ́л отдэ́ла палэ сэндоса, и Ёв исын древа́н дарано дрэ холы́. Рай Дэвэ́л отдэ́ла палэ сэндоса Лэ́скирэ намалэнгэ, и Ёв на потангинэла Лэскирирэ вэргэ́н [пригаравэла Лэ́скири бари холын пэ Лэ́скирэ вэргэ́ндэ-ю.о.].

³ Рай Дэвэ́л насыгэс холясо́ла (ґара́ / длу́гэс ужакирэ́ла) и Лэ́стэ исын баро́ зоралыпэ́н. И Ёв на ковлякирэла ило́ анги́л бибахталэндэ: сыр о Рай Дэвэ́л псирэ́ла, тэды ґаздэ́напэ рискирибнаскири балва́л и штормо, и о́блоки сыр пра́хо вурняна тэл Лэ́скирэ ґэра́.

⁴ Ёв штылякирэла мо́рё (дэрья́в) и шутькирэла лэс, и Ёв пиришутькирэла сарэ́ рэ́ки (лэня́): Васа́но и Кармило зашутёна и лулуди́ (цвэ́то) пэ Лива́но нашавэла масти́н (цвято).

⁵ Бэ́рги издрана анги́л Лэ́стэ, и бэ́ргицы биладёна; пхув кунинэлапэ анги́л Лэ́скиро явибэн [муй-р.с.]; свэ́то, и саро́, со дживэ́ла пэ свэ́то.

⁶ Кон дэ́ла ра́да тэ тэрдёл штылэ́с, ке́ли Рай Дэвэ́л зоралэ́с холясо́ла? Кон дэ́ла ра́да тэ вырикирэл мижэхипэн Лэ́скирэ холя́тыр? Лэ́скиро холякирибэ́н вычхувэлапэ сыр яг, и скалы (бэ́рги) пхарадёна пэ котэра́ анги́л Лэ́стэ.

⁷ О Рай Дэвэ́л исын лачхо́, и сы́рбы кхэр тэ гарадёл, сыр исын пхаро́ манушэ́скэ: Ёв джинэ́ла кодолэ́н, савэ́ допатяна Лэ́скэ.

⁸ Нэ барэ́-тасадыпнаскирэ паненца, савэ́ исын сыр потопо, Ёв янэ́ла хасибэ́н кэ ко́нцо (кэ яго́ро) далэ́ штэтоскэ Ниневиякэ, и калыпэ́н учхакирэ́ла Лэ́скирэ вэргэ́н.

⁹ Со тумэ́ придуминэна проти Растэ-Дэвлэ́стэ? Ёв хасякирэ́ла тумэн сарэ́са, пхарипэ́н на явэ́ла яви́р мо́ло.

¹⁰ На дыкхи́ пэ дова́, со тумэ́ спэнтындлэпэ кхэтанэ́ сыр пхусадытка хру́сты, и спинэпэ сыр матымарья, тумэ́ явэ́на тэ хачон сыр пхусэскири цецива (шуко пхус).

¹¹ Ту́тыр выгия́ одова́ ману́ш, саво́ придуминэла биба́хт (холы́) проти Растэ-Дэвлэ́стэ, ёв явэ́ла советнико (юнка́ро), саво́ дэ́ла годы́ тэ кэрэ́л фуипэ́н.

¹² Адя́кэ ракирэ́ла Рай-Дэвел Юдэякэ: “На дыкхи́ пэ дова́, со ёнэ, Асирия́кирэ халадэ́, исын бидарипнаскирэ и исын бут лэн, сароекх, лэн чингирэна пэ котэра́, и ёнэ хасёна. Сыр Мэ притасававас тут, то буты́р Мэ на ява́ва тэ кэра́в дава́ ту́кэ.

¹³ Акана́ Мэ пхагирава ґа́мо тырэ́ мэнятыр, со ёнэ чхудэ́ пэ ту́тэ, и Мэ пхаравава (роскушава) тырэ́ састыра́ пэ паша́.”

¹⁴ О Рай Дэвэ́л дыя́ припхэныбэ́н пал ту́тэ, Асуро: “Буты́р на явэ́ла ро́до тырэ́ лавэ́са; Мэ хасякира́ва вычхиндлэ́ муя́ кхэрэ́стыр, кай исын тырэ́ дэвлорэ́, и тырэ́ вычхудэ́ муя́. Мэ ґанавава ту́кэ маґила (кула), пал-дова́ со ту сан бэдо?’

¹⁵ Акэ, дыкхэ́н кодолэскирэ пирэ́ (сто́пы) пэ бэ́рга, саво́ пхэнэ́ла бахталы́ звесь (зан), саво́ ракирэ́ла зоралэ́с пал рама́нё (миро)! “О Юдэие! Кэр свэнкитка скаминда, выпхэрдякирэн пэ́скирэ совлаха́, пал-дова́ со буты́р ние́кх фуй ману́ш на проджа́ла пир ту́тэ: ёв исын сарэ́са хасякирдо.”