Mihiejo 4 - Библия - Пэ Балтитко Романи чиб (Романэс) 2019

Рай Дэвэ́л Явэ́ла тэ Раинэл пэ Сио́но

¹ И явэ́ла адя́кэ дрэ палатунэ́ (последня) дывэса́, со бэ́рга Дэвлэ́скирэ Кхэрэ́стыр явэ́ла чхуды́ пэ бэргэнгиро най вучэды́р штэ́то и ёй явэ́ла вучэды́р сарэ́ бэргицэндыр, и мануша́ явэ́на тэ джа́н кэ ёй сыр рэ́ки (лэня́).

² Бут на́цыи явэ́на и пхэнэ́на: “Явэ́н, и, ґаздасапэ пэ Ра́скирэ-Дэвлэ́скири бэ́рга, дро кхэр Яково́скирэ-Дэвлэ́скиро, соб (кай) Ёв тэ сыклякирэ́л амэн, сыр тэ джива́с пир Лэ́скиро, и соб (кай) амэ тэ псирас пир Лэ́скирэ шпэры (сцежки).’ Пал-дова́ со Сионо́стыр выджа́ла Зако́но, и Ерусалимо́стыр лав Ра́скирэ-Дэвлэ́скиро.”

³ И явэ́ла Ёв тэ сэндякирэ́л бут манушы́тка на́цыи и сыкавэ́ла Ёв банг зоралэ́-нацыенгири, савэ́ исын дур, ёнэ пирикэрэна курталы пэ плуги (пхарадя), и лэ́нгирэ чхурдыбнытка бустя́ (коп΄и) пэ серпы (чхиндлэ́); соб (кай) нацыя тэ на ґаздэл курта́ла проти яви́р нацыя, и соб (кай) ёнэ тэ на сыклён буты́р тэ марэ́нпэ.

⁴ Нэ кажно (сва́ко) ману́ш явэ́ла тэ бэшэ́л тэл винаграды́тко хру́сто и тэл лэ́скирэ-инжыритко кашт (дрэ́во), и нико́н на явэ́ла тэ трашавэл лэн, пал-дова́ со янголэ́нгирэ-болыбна́скиро Рай Дэвэ́л дыя́ лав пал дава́.

⁵ Сарэ́ мануша́ псирэ́на и мангэ́напэ лавэ́са лэ́нгирэ дэвлорэндыр, нэ амэ ява́са тэ псирас, и мангаспэ Ра́скирэ-Дэвлэ́скирэ лавэ́са, амарэ́ Дэвлэскирэса пэ сарэ́ ве́ки.

Сио́но Явэ́ла тэ Бахталёл

⁶ “Дро дова́ дывэ́с”, – ракирэ́ла Рай Дэвэ́л, – “Мэ кэдава кхэтанэ́ кодолэ́н, савэ́ исын лангалэ, и Мэ скэда́ва кодолэ́н, савэ́н лыджинэ́ дро пле́но, и кодолэ́н, савэ́н Мэ притасадём (яндём би́да).

⁷ И Мэ кэра́ва лангалэндыр Миро отячибэн, и Мэ кэра́ва одолэ́ндыр, савэ́н традынэ дур, зоралы́ нацыя.’ И явэ́ла Рай Дэвэ́л тэ раинэл пэ бэ́рга Сио́но, ададывэсатунэ дывэсэ́стыр и пэ сарэ́ ве́ки.”

⁸ И ту, вучарды́, (башня) соб (кай) тэ дыкхэ́н пал бакрэ́нгирэ ста́ды, бэ́ргица Сионоскирэ-чхакири, кэ ту явэ́ла и рисёла палэ раипэн, саво́ сыс вагэдыр (англэды́р), кралипэ́н Сионоскирэ-чхакири.

⁹ Акана́ со́скэ ту дэ́са го́дла зоралэ́с? Нау́што нанэ кра́ли машки́р тумэ́ндэ? Ци со, хасия́ тыро́ юнкаро (годы́-дыибнаскиро)? Пал-дова́ со дукха́ ухтылдэ́ тут сы́рбы джувля́, савьякэ трэй тэ биянэ́л.

¹⁰ Ячпэ дрэ дукха́, и крэнцынпэ пхарипнастыр, сы́рбы джувлы́, сави́ сыг биянэ́ла, чхай Сионо́скири, пал-дова́ со акана́ ту́кэ трэй тэ джас криг форо́стыр, и ту ячэсапэ тэ дживэ́с пэ фэ́лда, и ту доджаса кэ Вавило́но. Одо́й зракхэна тут, одо́й Рай Дэвэ́л выракхэла тут вастэ́стыр тырэ́-вэргэнгирэндыр.

¹¹ Акана́ бут на́цыи скэдынэ́пэ проти ту́тэ, савэ́ ракирэ́на: “Мэк ёй тэ явэ́л магирды, и мэк амарэ́ якха́ тэ дыкхэ́н пэ Сио́но.”

¹² Нэ ёнэ на джинэ́на, со думинэ́ла Рай Дэвэ́л, и ёнэ на ґалёна, ке́ли Ёв дэ́ла лачхи́ годы́ лэ́нгэ, со Ёв кэдыя кхэтанэ́ лэн сыр ґарбы (снопы) пэ гиваобкэрибнаскири шу́рна.

¹³ “‘Газдэпэ и обкэр гив, о чхаё Сионо́скири, пал-дова́ со Мэ кэра́ва ту́кэ саструно шынг (ро́го), и Мэ кэра́ва ту́кэ харкунэ́ (меди́тка) ная (копыты), и ту розмарэса пэ котэра́ бут манушы́тка на́цыи,’ и ту отдэса сыр обсвэнцындлэ лэ́нгиро дорэсыбэ́н Ра́скэ-Дэвлэ́скэ, со ёнэ лынэ́ явирэндыр, и лэ́нгиро миштыпэ́н Барэ́ Ра́скэ пир сари́ пхув.”