Mihiejo 2 - Библия - Пэ Балтитко Романи чиб (Романэс) 2019

Бида пэ Бибахталэ́ Манушэ́ндэ

¹ Бида пэ одолэ́ндэ, савэ́ придуминэна чорипэ́н и савэ́ выдуминэна биба́хт пэ пэ́скирэ чхуибэна! Пэ зло́ко, ке́ли дывэсёла, ёнэ кэрэ́на дова́, пал-дова́ со саро́ дава́ исын дро лэ́нгиро васт.

² Ёнэ исын ґалка (скэмпа) кэ фэ́лды, и ёнэ лэ́на лэн зорья́са. Ёнэ исын ґалка кэ кхэра́, и ёнэ откэдэна лэн манушэ́ндыр. И ёнэ притасавэ́на (обкэдэна) манушэ́с и лэ́скиро кхэр, и манушэ́с кокорэс, и лэ́скиро мэкно́ миштыпэ́н.

³ Палдава́ адя́кэ ракирэ́ла Рай Дэвэ́л: “Акэ, Мэ придуминава кадасави биба́хт проти кадая́ сэ́м΄я (ири́), со тумэ́ на могинэ́на (на саштынэна) тэ дурьякирэн (тэ злэн) далэ́ бибахтятыр тумарэ́ мэня; и тумэ́ на явэ́на тэ задэнпэ, (тэ псирэ́н маму́й); пал-дова́ со дава́ часо исын бибахтало́.

⁴ Дро дова́ дывэ́с мануша́ явэ́на тэ ракирэ́н притча пал тумэ́ндэ, и ёнэ явэ́на тэ ракирэ́н зоралэ́с киркэ ясвэ́нца, и тэ пхэнэ́н: ‘Амэ хасиям сарэ́са, о Дэвэ́л парудя амари́ до́ля [отдыя́ явирэ́нгэ-р.с.]: сыр тэ рисёл амари́ до́ля? Ёв роскэрдя́ амарэ́ фэ́лды машки́р амарэ́ вэргэ́ндэ.’”

⁵ Палдава́ тумэ́ндэ на явэ́ла ние́кх ману́ш, соб (кай) тэ чхурдэл жре́биё и тэ обмеринэл шэлэса тумарэ́ ме́жы пэ скэдыибэ́н анги́л Растэ-Дэвлэ́стэ.

Хоханэ́ Проро́ки

⁶ “На ангилпхэнэн, проро́ки, – тумэ́ ракирэ́на кодолэ́нгэ, савэ́ ангилпхэнэна, на ангилпхэнэн лэ́нгэ, соб (кай) ладжаипэ́н тэ на ячэ́лпэ [тэ на латхэл тумэн-р.с.].

⁷ Тумэ́, савэ́ кхарэнапэ кхэр Яково́скиро: ‘Ци Ра́скирэ-Дэвлэ́скиро Ду́хо тыкныя? Ци саро́ дава́ чорипэ́н лэ́стыр? Ци на кэрэ́на лачхипэ́н Лэ́скирэ лава́ кодолэ́скэ, саво́ дживэ́ла дэвлыткэс [кон кэрэ́ла чачунэ́с-р.с.]?”

⁸ “На΄гара тумэ́, кон са́нас Мирэ́ мануша́, ґаздынэ́пэ сыр вэ́рги проти Ма́ндэ – тумэ́ злэна зорья́са упратуно урибэ́н и тэлатуны и́дя манушэ́ндыр, савэ́ джа́на пашы́л бидаракирэс, савэ́ рисёна марибнастыр.

⁹ Тумэ́ традэ́на яври́ джувле́н Мирэ́ манушэнгирэн лэ́нгирэ екхорэ кхэрэндыр, савэ́ исын лэ́нгэ пир ило́, тумэ́ откэдэна лэ́нгирэ чхаворэндыр бахталыпэ́н Миро.

¹⁰ Уштэ́н и джа́н адатхы́р; пал-дова́ со ада́й тумэ́ на откхинёна. Кадава́ штэ́то исын магирдо́, и хасякирэ́ла тумэн, и дава́ хасякирибэн явэ́ла кэ ко́нцо (кэ яго́ро).

¹¹ Ко́ли тэ явэ́л балвалитко ману́ш, и тэ пхэнэ́л хохаибэ́н кадасавэ́ лавэ́нца: ‘Мэ ява́ва тэ ангилпхэнав пал мол (вино) и пал зорало́ пибэ́н (сикера), аж и ёв явэ́лас куч проро́ко ваш кодолэ́ манушэ́нгэ.

Израилё Нэвэ́стыр Явэ́ла Зорало́

¹² Нэ Мэ, чачэс, кэдава кхэтанэ́ сарэ́н тумэн, о Яково, Мэ чачипна́са скэда́ва ячкирдэ́ манушэ́н Израилёскирэн; Мэ чхува́ва кхэтанэ́ (кхэтанякирава) лэн сыр бакрэ́н дрэ Восора (Боцра) сы́рбы стада машки́р лэ́нгирэ чарьитка фэ́лды: ёнэ явэ́на зоралэ́с тэ дэн го́дла, пал-дова́ со лэн ада́кицы бут мануша́ исын.”

¹³ Анги́л лэ́ндэ халадо пхагирэ́ла ва́нты (сцяны): и ёнэ пхагирэна дова́, со сыс пэ дром лэ́ндэ, и ёнэ доджана кэ по́рта и джа́на пэ́скэ дурэды́р. Лэ́нгиро кра́ли явэ́ла тэ джал анги́л лэ́ндэ, и Рай Дэвэ́л явэ́ла анги́л лэ́ндэ.