Mihiejo 1 - Библия - Пэ Балтитко Романи чиб (Романэс) 2019

¹ Акэ, сыс лав Ра́скирэ-Дэвлэ́скиро, саво́ явдя́ Михеёскэ Морасфеёстыр дрэ долэ́ дывэса́, ке́ли сыс трин кра́лья Юдэя́кирэ: Иофа́мо, Аха́зо и Езэки́я. Дава́ лав Дэвэ́л сыкадя́ лэ́скэ дрэ сунэ́, со явэ́ла Самарияса и Ерусалимоса.

Сэ́ндо, со Явэ́ла пэ Израилё

² ‘Шунэ́н, сарэ́ манушы́тка на́цыи (народы), пхув и саро́, со исын пэ ла́тэ! Мэк тэ явэ́л Рай Дэвэ́л сыр якхи́тко (свидетелё) проти тумэ́ндэ, о Рай Дэвэ́л Лэ́скирэ свэнтонэ́ Кхангирья́тыр.

³ Дыкхэ́н! Акэ, Рай Дэвэ́л выджа́ла Лэ́скирэ штэто́стыр; Ёв джа́ла тэлэ́, и Ёв явэ́ла тэ штавэл (тэ тэрдёл) пир вучэ́ штэ́ты пэ пхув.

⁴ Бэ́рги явэ́на тэ билавэн тэл Лэ́стэ, и долы явэ́на тэ пхарадён, сы́рбы мом анги́л яг, сы́рбы паня́, со чхувэнапэ крутыматыр (вучипна́стыр).

⁵ Саро́ дава́ пал Яково́скиро чорипэ́н, и пал грэ́хи, со кэрдя́ кхэр Израилёскиро. Саво́ исын чорипэ́н Яково́скиро? Ци дава́ на пал Сама́рия? Савэ далэ́ исын вучэ́ штэ́ты дрэ Юдэ́я? Ци дава́ саро́ исын на Ерусалимо́стыр?

⁶ “Палдава́ Мэ кэра́ва Самариятыр груда руинэндыр пэ фэ́лда, – штэ́то, соб (кай) тэ почхувэн винаградо: Мэ вычхурдава ла́кирэ бара́ пэ до́ло, и Мэ отчхакирава ла́кирэ фундаменты.

⁷ Сарэ́ ла́кирэ вычхиндлэ́ муя́ явэ́на пхагирдэ́ пэ котэра́ (куски), и сарэ́ ла́кирэ да́ры, сыр биладжакунэ́ джувлякирэ, явэ́на хачкирдэ́ яга́са. Мэ хасякира́ва сарэ́ ла́кирэ и́долы, пал-дова́ со ёй (Сама́рия) кэрдя́ лэн пал да́ры, со дэнапэ биладжакунэ́ джувля́кэ, и кадалэ́ да́ры рисёна ваш да́ры явирэ биладжакунэ́ джувля́кэ.”

Михеё Тугинэла Зоралэ́с пал Израилё и Юдэ́я

⁸ Палдава́ мэ, Михеё, ява́ва тэ обровав и тэ тугинав ясвэ́нца, мэ джа́ва обрискирдо и нанго; Мэ ява́ва и тэ выинав сыр шакалы, и тэ тугинав ровибнаса сыр страусы.

⁹ Пал-дова́ со Самариякирэ фра́нсы (раны) исын насастякирибнытка, пал-дова́ со ёнэ догинэ́ кэ Юдэ́я; ёнэ догинэ́ кэ по́рта мирэ́ манушэ́нгири, кэ Ерусалимо.

¹⁰ На пхэнэ́н дава́ дрэ Гефо, на ровэ́н зоралэ́с одо́й, нэ учхакирэн пэс прахоса дро форицо Офра.

¹¹ Джа́н тэ дживэ́н пэ яви́р штэ́то, кон дживэ́ла кэ Шафиро, нангэ кэ ладж; на нашэла, кон дживэ́ла кэ Цаано (Цаанано), Эцэль (Бэт-Эцэль) тугинэла зоралэ́с; дава́ ровибэн на мэкэ́ла тумэн тэ тэрдёл дрэ лэ́стэ.

¹² Кон дживэ́ла кэ Марофа (Марат), занасвалынэ пал лачхипэ́н, нэ биба́хт явдя́ тэлэ́ Ра́стыр-Дэвлэ́стыр кэ по́рта Ерусалимо́скири.

¹³ Кон дживэ́ла кэ Лахисо, дэ андрэ́ ґэнштэн дро вурдэ́н марибны́тко; пал-дова́ со чорипэ́н Израилёскиро латхнэ́ дрэ ту́тэ.

¹⁴ Палдава́ ту явэ́са тэ дэс почасту́нки (да́ры) кэ Морешэф-Геф: нэ кхэра́ дро Ахзиво явэ́на хоханэ́с тэ притырдэн кралье́н Израилёстыр.

¹⁵ Нэ Мэ яна́ва миштыпэ́н-прилыибнаскирэс (наследникос) кэ ту, манушние Морешоскири; и барипэ́н Израилёскиро пириджала кэ Одоламо.

¹⁶ Кэр пэ́скэ плешка [злэ пэ́стыр бала́-р.с.] и обчхин пэ́скирэ бала́, ке́ли ило́ тыро́ явэ́ла тэ дукхал пал дрогонэ́ чхавэ́ндэ тырэндэ. Барьякир пэ́скири плешка сы́рбы о́рло (ки́до), пал-дова́ со ёнэ джа́на дро пле́но ту́тыр.