Матфеё 7 - Библия - Пэ Балтитко Романи чиб (Романэс) 2019

Пал Сэндякирибэн

¹ На сэндинэ́н, и тумэн на явэ́на тэ сэндинэ́н,

² пал-дова́ со, сыр тумэ́ сэндинэна, адя́кэ-паць и тумэн явэ́на тэ сэндинэ́н; савэ́ мераса тумэ́ меринэна, дасавэ́-паць мераса тумэн явэ́на тэ меринэн.

³ Со́скэ ту дыкхэ́са пэ тыкны пхусинка дрэ якх тырэ́ пшалэскири, а баро́ бэрно на дыкхэ́са дрэ пэ́скири якх?

⁴ Ци, сыр ту пхэнэ́са пшалэ́скэ пэскирэскэ; ‘дэ, мэ вылава пхусинка тырэ́ якхатыр; а бэрно исын дрэ тыри́ якх?

⁵ Дуемуитко, вылэ англэды́р бэрно пэ́скирэ якхатыр, тэды дыкхэ́са, сыр тэ вылэс пхусинка тырэ́ пшалэ́скирэ якхатыр.

⁶ На дэн дова́, со исын свэ́нто, джуклэнгэ, на чхурдэ́н мутиня (жэмчуги) анги́л балычэндэ, соб (кай) ёнэ тэ на штакирэн лэн ґэрэ́нца, и тэ на рисён, и тэ на роскушэн тумэн.

Мангэ́н, Родэ́н и Марэ́н дро Вуда́р

⁷ Мангэ́н, и явэ́ла дыно́ тумэ́нгэ; родэ́н, и латхэ́на; марэ́н дро вуда́р, и псиравэна (отпхандэна) тумэ́нгэ.

⁸ Пал-дова́ со кажно, кон мангэ́ла, дорэсэ́ла пэ́скиро; кажно, кон родэ́ла, латхэ́ла; кажнонэ́скэ, кон марэла дро вуда́р, явэ́ла псирадо (отпхандло).

⁹ Ци исын вари-кон тумэ́ндыр, ко́ли лэ́скиро чхаво́ мангэ́ла лэ́стыр маро́, тэ дэл чхавэ́скэ бар?

¹⁰ И ке́ли мангэ́ла мачхо, тэ дэл лэ́скэ сапэс?

¹¹ Ко́ли тумэ́ сан налачхэ́, и джинэ́на тэ кэрэ́н лачхипэ́н пэ́скирэ чхавэ́нгэ, пэ кицы́ буты́р тумэ́ндыр тумаро́ Болыбна́скиро Дад кэрэ́ла лачхипэ́н одолэ́нгэ, савэ́ мангэна Лэ́стыр.

¹² Кэрэ́н дова́ явирэ́нгэ, со тумэ́нгэ исын пир ило́, соб (кай) и яви́р тэ кэрэ́н тумэ́нгэ; Зако́но и проро́ки сыклякирэ́на дава́-паць.

Цясно По́рта

¹³ Заджа́н дро цясно (танго) по́рта, пал-дова́ со буґлы исын по́рта и отпхандло исын дром, саво́ лыджа́ла дро хасякирибэн, и бут джа́на дро дава́ вуда́р.

¹⁴ Пал-дова́ со цясно исын по́рта и набуґло исын дром, саво́ лыджа́ла дро джиибэ́н, и на́бут латхэ́на лэс.

Кашт (Дрэ́во) и Лэ́скирэ Барьякирдэ́ (Пло́ды)

¹⁵ Ракхэ́нпэ хоханэ́ пророкэндыр, савэ́ явэ́на кэ амэ дрэ бакраны и́дя, нэ андра́л ёнэ исын холямэ́ рува́;

¹⁶ тумэ́ ґалёна лэн пир лэ́нгирэ барьякирдэ́. Ци скэдэ́на дылынэ́ чарьятыр винаградо (дракх) ци инжыро кодрилёстыр (дедоўникостыр)?

¹⁷ Адя́кэ-паць кажно лачхо́ кашт дэ́ла лачхэ́ барьякирдэ́ (пло́ды) и дылыно́ кашт дэ́ла дылынэ́ барьякирдэ́.

¹⁸ Лачхо́ кашт на могинэ́ла тэ дэл дылынэ́ барьякирдэ́, и дылыно́ кашт на дэ́ла лачхэ́ барьякирдэ́.

¹⁹ И кажно кашт, со на дэ́ла лачхэ́ барьякирдэ́, чингирэна тэлэ́ и чхурдэна дрэ яг.

²⁰ Адя́кэ пир лэ́нгирэ барьякирдэ́ тумэ́ ґалёна хоханэ́ пророкэ́н.

Дывэ́с, Ке́ли Явэ́ла Сэ́ндо

²¹ На кажно, саво́ ракирэ́ла Ма́нгэ: ‘Дэ́вла, Дэ́вла!’ – заджа́ла дро Кралипэ́н дро Болыбна́скиро Раё; нэ кодова́, саво́ кэрэ́ла пир во́ля Мирэ́ Дадэ́скири, Саво́ исын дро Болыбна́скиро Раё.

²² Бут мануша́ пхэнэ́на Ма́нгэ дро дова́ дывэ́с, ке́ли явэ́на тэ сэндинэ́н: ‘Дэ́вла, Дэ́вла! Ци на Тырэ́ лавэ́са амэ ангилпхэндям? Ци на Тырэ́ лавэ́са амэ вытрадасас налачхэ́ ду́хи? Ци на Тырэ́ лавэ́са бут ди́вы кэрасас?’

²³ Тэ́ньци Мэ пхэна́ва лэ́нгэ: ‘Мэ никели на джиндём тумэн; джа́н криг Ма́ндыр тумэ́, савэ́ кэрэ́на чорипэ́н.’

Ра́зна Кхэра́

²⁴ Кажно, кон шунэ́ла лава́ Мирэ́ и кандэ́ла лэн, исын сыр годьваро́ ману́ш, кон чхудя́ пэ́скиро кхэр пэ бар.

²⁵ И гинэ́ брышында, и ґаздынэ́пэ рэ́ки (лэня́), и лынэ́ тэ пхурдэ́н балваля, и саро́ пыя́ пэ дава́ кхэр; и ёв на пыя́, пал-дова́ со сыс чхудо́ пэ бар.

²⁶ Нэ кажно, кон шунэ́ла лава́ Мирэ́, и на кандэ́ла лэн, исын сыр балвалитко ману́ш, кон чхудя́ пэ́скиро кхэр пэ пра́хо;

²⁷ и гинэ́ брышында, и ґаздынэ́пэ рэ́ки (лэня́), и лынэ́ тэ пхурдэ́н балваля, и саро́ пыя́ пэ дава́ кхэр. И пыя́ кхэр, и роспыяпэ сарэ́са.’”

Исусо́скиро Право

²⁸ И сыс адя́кэ: ке́ли Ису́со кончындя далэ́ лава́, мануша́ дивиндлэ́пэ Лэ́скирэ сыклякирибнастыр,

²⁹ пал-дова́ со Ёв сыклякирдя́, сыр Одова́, Савэ́стэ исын право, а на сыр лылвари́тка (кни́жники).