Матфеё 5 - Библия - Пэ Балтитко Романи чиб (Романэс) 2019

Пхэныбэ́н пэ Бэ́рга

¹ Ке́ли Ису́со дыкхця́ манушэ́н, Ёв гия́ пэ бэ́рга, и, сыр бэсця́, сыкляибны́тка (учэники) Лэ́скирэ подгинэ́ кэ Ёв,

² и Ёв откэрдя Пэ́скирэ ушта́ и лыя́ тэ сыклякирэ́л лэн, ракири́:

Чачуны́ Бахт

³ “Бахталэ́ исын одолэ́, савэ́ джинэ́на, со лэ́нгирэ духоскэ трэй Дэвэ́л; лэ́нгиро сыс Кралипэ́н дро Дэвлэ́скиро Раё.

⁴ Бахталэ́ исын одолэ́, савэ́ ровэна, пал-дова́ со Дэвэ́л подрикирэ́ла лэ́нгиро ду́хо (фа́но).

⁵ Бахталэ́ исын ковлэ́-илы́тка, пал-дова́ со пхув явэ́ла лэ́нгири.

⁶ Бахталэ́ исын одолэ́, конэ́скиро ило́ исын бокхало пал Дэвлэ́скиро лав и сыр пани́ древа́н родэ́ла чачипэ́н. Дэвэ́л чалякирэла лэ́нгиро ило́.

⁷ Бахталэ́ исын одолэ́, савэ́ примангэна банг манушэ́нгэ, пал-дова́ со лэ́нгэ явэ́ла примангло.

⁸ Бахталэ́ исын одолэ́, савэ́ндэ исын жужо́ (чы́сто) ило́, пал-дова́ со ёнэ дыкхэ́на Дэвлэ́с.

⁹ Бахталэ́ исын одолэ́, савэ́ кэрэ́на рама́нё (миро), пал-дова́ со явэ́на тэ кхарэ́н лэн ‘Дэвлэ́скирэ чхавэ́.’

¹⁰ Бахталэ́ исын одолэ́, конэ́с традэ́на пал чачипэ́н; лэ́нгиро исын Кралипэ́н дро Дэвлэ́скиро Раё.

¹¹ Бахталэ́ сан тумэ́, ке́ли мануша́ явэ́на тэ кошэн тумэн и тэ традэ́н, и явэ́на тэ ракирэ́н налачхэ́ лава́ пэ тумэ́ндэ пал Ма́ндэ.

¹² Явэ́н бахталэ́ и радынэ́нпэ, пал-дова́ со баро́ отдыибэ́н Дэвлэ́стыр ужакирэ́ла тумэн дро Болыбна́скиро Раё: адя́кэ традэнас и пророкэ́н, савэ́ сыс анги́л тумэ́ндэ.

Лонд и Яг

¹³ Тумэ́ исын сыр лонд ваш сарэ́ манушэ́нгэ. Ко́ли ж лонд нашавэла пэ́скиро лондыпэн, нисыр нашты́ тэ кэрэ́с, соб (кай) нэвэ́стыр лонд тэ явэ́л лондо; лэ́стэ буты́р ни саво́ лачхипэ́н нанэ, екх со тэ вычхурдэс лэс яври́ тэ штавэн мануша́ ґэрэ́нца.

¹⁴ Тумэ́ исын сыр яг ваш сарэ́ манушэ́нгэ. Фо́ро, со исын пэ бэ́рга пэ вучипэ́н, на могинэ́ла тэ ґарадёл.

¹⁵ И ке́ли захачкирэна момолы́ (све́чка), на чхувэ́на ла тэл пири́, а дро шандало (подсвечнико) тэ свэнцынэл яг пир саро́ кхэр.

¹⁶ Адя́кэ мэк тэ свэнцынэл тумари́ яг анги́л манушэ́ндэ, соб (кай) ёнэ тэ дыкхэ́н тумарэ́ лачхэ́ рэ́нды и тэ славинэ́н Дадэ́с тумарэс Болыбнаскирэс.

Пал Зако́но

¹⁷ На думинэн, со Мэ явдём тэ отпарував Зако́но ци пророкэ́н, нэ тэ кэра́в кэ ко́нцо/яго́ро (тэ сполнинав).

¹⁸ Чачэс, Мэ ракира́ва тумэ́нгэ: пака на явэ́ла ко́нцо (яго́ро) болыбнаскэ и пхувьякэ, ни екх тыкны буквица ни чэрта буквакири на отлэлапэ Законо́стыр анги́л, сыр Зако́но тэ кэрэ́лпэ.

¹⁹ Адя́кэ, ко́ли вари-кон отпарувэла хоць екх лав припхэныбнастыр и сыклякирэ́ла адя́кэ манушэ́н, одова́ явэ́ла най тыкнэды́р дро Кралипэ́н дро Болыбна́скиро Раё. Нэ кон кандэ́ла и кэрэ́ла пир лав, явэ́ла най барэды́р дро Кралипэ́н дро Болыбна́скиро Раё.

²⁰ Палдова́ Мэ ракира́ва тумэ́нгэ: ко́ли чачипэ́н тумаро́ нанэ бутэды́р сыр лылваритконэнгиро (книжникэ́нгиро) и Фарисеенгиро чачипэ́н, тумэ́ никели на заджа́на дро Кралипэ́н дро Болыбна́скиро Раё.

Пал Холякирибэн

²¹ Тумэ́ шундлэ́, со ракирдэ́ дро пхурано́ часо: ‘На замар (на умар), кон жа замарэла, тэл сэ́ндо джа́ла.”

²² Нэ Мэ ракира́ва тумэ́нгэ: ‘Кажно, кон холясо́ла пэ пэ́скирэ пшалэ́стэ ни палсо́, джа́ла тэл сэ́ндо. Кон жа пхэнэ́ла пэ́скирэ пшалэ́скэ ‘дылыно́’, явэ́ла дрэ дар Синедрионостыр. И кон пхэнэ́ла ‘бигодякиро’, явэ́ла дрэ дар, со джа́ла дро лю́но (адо) яга́са.

²³ Адя́кэ, ко́ли ту янэса пэ́скиро да́ро кэ алта́рё, и одо́й пририпирэса, со тыро́ пшал исын холямо́ пэ Ту́тэ,

²⁴ мэк пэ́скиро свэ́нто дыибэ́н анги́л алта́рё и джа́, анги́л кэр рама́нё (миро) пэ́скирэ пшалэса, тэ́ньчи джа́ и ян пэ́скиро свэ́нто дыибэ́н.

²⁵ Кэр ‘рама́нё’ (миро) пэ́скирэ манушэ́са сыгэды́р, пака ту ишчо (инкэ́) сан пэ дром лэ́са, соб (кай) ману́ш тэ на отдэ́л тут сэндарискэ, а сэнда́ри тэ на отдэ́л тут дынари́скэ (слуга́скэ), и одова́ тэ на чхурдэл тут дро штарибэ́н.

²⁶ Чачэс, Мэ ракира́ва ту́кэ: ту на выджаса одотхы́р, пака ту отдэса кэ най тыкнэды́р ґасприн’

Пал Биладжаипэ́н

²⁷ Тумэ́ шундлэ́, сыр сыс пхэндло́ дро ґаратуно часо: ‘На кэр биладжаипэ́н.’

²⁸ Нэ Мэ ракира́ва тумэ́нгэ, со кажно, кон дыкхэ́ла пэ джувля́тэ налачхэ́ камибнаса, одова́ ужэ кэрэ́ла биладжаипэ́н дро пэ́скиро ило́.

²⁹ Ко́ли ж чачи́ якх злыджала тут кэ грэ́хо, ри́скир ла яври́ и вычхурдэ; пал-дова́ со фэды́р ваш ту́кэ тэ нашавэс екх якх, сыр саро́ тэ джал дро лю́но (адо).

³⁰ Ко́ли ж чачо́ (пра́во) васт лыджа́ла тут кэ грэ́хо, отчингир лэс и вычхурдэ; пал-дова́ со фэды́р ваш ту́кэ тэ нашавэс екх васт, сыр сарэ́ маса́ тэ джа́н дро лю́но.

Пал Розгиибэн

³¹ Адя́кэ-паць сыс пхэндло́: ‘Ко́ли вари-кон розджалапэ пэ́скирэ ромня́са, мэк тэ дэл ла́кэ лыл пал розгиибэн.’

³² Нэ, Мэ ракира́ва тумэ́нгэ: ‘Кон мэкэ́ла пэ́скирэ ромня́ апри́ч сыр пал напатяибнытко банг, одова́ ячэ́лапэ банго́, ко́ли ёй кэрэ́ла биладжаипэ́н; а кон лэ́ла пал пэ́стэ джувля́, сави́ исын розлыджины ромэса, одова́ сы́рбы кокоро́ исын банго́ дро напатяибэн.

Пал Совла́х

³³ Ишчо шундлэ́ тумэ́, со сыс пхэндло́ дро ґаратуно часо: ‘На совлаха́, ко́ли ту на сан твардо; нэ кэр пир совлаха́ пэ́скирэ анги́л Дэвлэ́стэ!

³⁴ Нэ Мэ ракира́ва тумэ́нгэ: ‘На совлаха́ сарэ́са; ни болыбнаса, пал-дова́ со ёв исын Дэвлэ́скиро престоло;

³⁵ ни пхувья́са, пал-дова́ со ёй исын штэ́то тэл Лэ́скирэ ґэра́, ни Ерусалимоса, пал-дова́ со ёв исын фо́ро барэ́ Крали́скиро;

³⁶ на совлаха́ пэ́скирэ шэрэ́са, пал-дова́ со ни екх бал на могинэ́са тэ кэрэ́с ни парнэса, ни калэса.

³⁷ Мэк тэ явэ́л тумаро́ лав ‘ны, ны’, ‘над, над’, а со упрэдыр далэ́стыр, дова́ исын налачхэстыр.’

Пал Фуипэ́н

³⁸ Тумэ́ шундлэ́, со сыс пхэндло́: ‘Якх пал якх, и данд пал данд.’

³⁹ Нэ Мэ ракира́ва тумэ́нгэ: на кэр фуипэ́н палэ одолэ́скэ, кон кэрдя́ фуипэ́н ту́кэ; нэ кон пэкавэла тут дрэ тыри́ чачи́ (право) чам (шчока), тэ́ньчи ри́скир кэ ёв яви́р.

⁴⁰ Нэ кон закамэ́ла тэ сэндинэлпэ ту́са и тэ лэл ту́тыр гад, отдэ́ лэ́скэ и упратуно урибэ́н.

⁴¹ Нэ кон зачхувэла тут тэ джал лэ́са екх вэрста, джа́ лэ́са дуй.

⁴² Кон мангэ́ла ту́тыр, дэ, и на отрисёв одолэ́стыр, кон камэ́ла тэ залэл ту́тыр.

Паты́в кэ Вэ́рги

⁴³ Тумэ́ шундлэ́, со сыс пхэндло́: ‘Сыка́в паты́в пэ́скирэ пашатунэ́ манушэ́скэ и на сыка́в паты́в пэ́скирэ вэргэ́нгэ (врогэ́нгэ).’

⁴⁴ Нэ Мэ пхэна́ва тумэ́нгэ: сыкавэ́н паты́в пэ́скирэ вэргэ́нгэ, и мангэ́нпэ Дэвлэ́скэ пал одолэ́ндэ, савэ́ кошэна тумэн, кэрэ́н лачхипэ́н одолэ́нгэ, савэ́ древа́н на камэ́на тумэн и мангэ́нпэ Дэвлэ́скэ пал одолэ́ндэ, савэ́ нашукар отлыджанапэ кэ тумэ́ и традэ́на тумэн;

⁴⁵ соб (кай) тумэ́ могинэ́нас тэ явэ́н ‘чхавэ́ Болыбна́скирэ Дадэ́скирэ’, и Ёв зачхувэла Пэ́скиро Кхам тэ свэнцынэл пэ лачхэ́ и налачхэ́ манушэ́ндэ, и бичхавэ́ла брышы́нд пэ одолэ́ндэ, кон кэрэ́ла лачхипэ́н и кон кэрэ́ла фуипэ́н.

⁴⁶ Палдова́, ко́ли тумэ́ сыкавэ́на паты́в одолэ́нгэ, савэ́нгэ тумэ́ сан дро́га, саво́ отдыибэ́н Дэвлэ́стыр явэ́ла тумэ́нгэ? И мытоскирэ скэдыибнарья кэрэ́на адя́кэ.

⁴⁷ Нэ ко́ли тумэ́ дэ́на ‘добридим’ пэ́скирэ пшалэ́нгэ, со дасаво тумэ́ кэрэ́на? Аж На́юды кэрэ́на адя́кэ.

⁴⁸ Палдова́ явэ́н бидошакирэ, сыр бидошакиро исын тумаро́ Болыбна́скиро Дад.