Матфеё 27 - Библия - Пэ Балтитко Романи чиб (Романэс) 2019

Ису́со анги́л Пилато́стэ

¹ Ке́ли яця́ дывэ́с, пэ зло́ко, сарэ́ раша́нгирэ барыдыра́ и тхэмэ́скирэ годэпхурэ́, зракирдэпэ пэ Исусо́стэ, соб (кай) тэ мулякирэ́н Лэс;

² И, ке́ли пхандлэ Лэс, лыджинэ́ Лэс и здынэ Пилатоскэ, тхэмэ́скирэ барыдырэскирэскэ (правителёскэ).

Юда́скиро Мэрибэ́н

³ Тэды Юда, кон здыя Лэс, дыкхи́, со Исусо́с сэндиндлэ, приґалыя пэ́скири банг и дыя́ палэ трия́нда рупувэ́ ловэ́ раша́нгирэ барыдырэ́нгэ и годэпхурэнгэ,

⁴ пхэни́: “Мэ кэрдём грэ́хо, пал-дова́ со здыём Манушэ́с, Савэ́стэ исын бибангипнаскиро рат.” Нэ ёнэ пхэндлэ́: “Со амэ́нгэ? Дава́ исын тыро́ рэ́ндо.”

⁵ И ёв чхурдыя́ рупувэ́ ловэ́ дрэ Кхангири́, гия́ яври́ и убладыя.

⁶ Нэ раша́нгирэ барыдыра́ ґаздынэ́ рупувэ́ ловэ́ и пхэндлэ́ “Нашты́ тэ чхувас лэн дрэ Кхангирья́кири пиралы́ (тыкнори), пал-дова́ со дава́ исын ратвалэ́ ловэ́.”

⁷ И зракирдэпэ и киндлэ пэ далэ́ ловэ́ фэ́лда пиритконэстыр (горшэчникостыр), соб (кай) тэ гаравэн чужонэ́ манушэ́н.

⁸ Палдова́ и кхарлапэ дая́ фэ́лда ‘Ратвалы фэ́лда’ кэ ададывэсатуно дывэ́с.

⁹ Тэды кэрдя́пэ кодова́, со пхэндя́ проро́ко Ереме́ё: “И ёнэ лынэ́ трия́нда рупувэ́ ловэ́, тими́н Екхэскири, Савэ́скэ дынэ́ тими́н Израилёскирэ чхавэ́,

¹⁰ и дынэ́ далэ́ ловэ́ пал пиритконэскири фэ́лда, сыр Дэвэ́л припхэндя́ Ма́нгэ.”

Пила́то Сыклякирэ́ла Исусо́с

¹¹ Нэ Ису́со сыс тэрдо́ анги́л Пилатостэ, тхэмэ́скирэ барыдырэстэ; и пхуця́ Лэ́стыр: “Ту сан Юдэ́нгиро Кра́ли?” И пхэндя́ Ису́со: “Адя́кэ, сыр ту пхэндя́н.”

¹² И ке́ли бангякирэнас Лэс раша́нгирэ барыдыра́ и годэпхурэ́, Ёв на пхэндя́ нисо́.

¹³ Тэды пхэндя́ Лэ́скэ Пила́то: “Ту на шунэса, сыр бут ёнэ пэ Ту́тэ допхэнэна?”

¹⁴ И Ёв на отпхэндя́ Лэ́скэ ни екх лав, палдава́ тхэмэскиро барыдыро́ древа́н здивиндяпэ.

Пила́то Сэндякирэ́ла Исусо́с пэ Мэрибэ́н

¹⁵ Нэ пэ свэ́нко тхэмэскиро барыдыро́ присыклыя тэ отмэкэ́л екхэ манушэ́с штарибнастыр пир манушэ́нгиро выкэдыбэн, кон сыс пир ило́ лэ́нгэ.

¹⁶ Тэды сыс лэ́ндэ славу́тно штарибнари пир лав Варава.

¹⁷ Палдава́, ке́ли скэдынэ́пэ кхэтанэ́, Пила́то пхэндя́ лэ́нгэ: “Конэ́с тумэ́ камэ́на, соб (кай) мэ тэ отмэкав тумэ́нгэ: Варавас ци Исусо́с, савэ́с кхарна Христо́со?”

¹⁸ Пал-дова́ со ёв джиндя́, со ёнэ здынэ Лэс зэвлыныпнастыр.

¹⁹ Ке́ли Пила́то сыс бэшто́ пэ сэндарискиро штэ́то, лэ́скири ромны́ бичхадя́ лэ́скэ лав, пхэни́: “На кэр нисо́ Кадалэскэ Патяибнытконэ Манушэ́скэ; мэ бут пиридживдём дро суно́ (сунэ́) пал Лэ́стэ.”

²⁰ Нэ раша́нгирэ барыдыра́ и годэпхурэ́ патякирдэ манушэ́н, соб (кай) тэ мангэ́н Варавас, нэ тэ мулякирэ́н Исусо́с.

²¹ Тэды барыдыро́ пхуця́ лэ́ндыр, пхэни́: “Конэ́с камэ́на тумэ́ дуендыр тэ отмэкав мэ?” Ёнэ пхэндлэ́: “Варавас.”

²² Ракирэ́ла лэ́нгэ Пила́то: “Со ма́нгэ то кэра́в Исусо́са, Савэс кхарэ́на Христо́со?” И ёнэ пхэндлэ́: “Тэ примарэн Лэс пэ трушу́л.”

²³ Нэ ёв пхэндя́: “Саво́ ж чорипэ́н Ёв кэрдя́?” Нэ ёнэ дэ́нас го́дла буты́р: “Тэ примарэн Лэс пэ трушу́л!”

²⁴ И ке́ли Пила́то дыкхця́, со нисо́ на помогинэла, нэ, хай, шумо годлэнца кэ бу́нто ґаздэ́лапэ, ёв лыя́ пани́ и вымордя васта́ анги́л манушэ́ндэ, ракири́: “Мэ на сом банго́ пал адалэ́ Манушэ́скиро рат, тумэ́ ж дыкхэ́н!”

²⁵ Нэ сарэ́ отпхэндлэ́: “Мэк тэ явэ́л дава́ бангипэн пал Лэ́скиро рат пэ амэ́ндэ и амарэ́ чхаворэндэ!”

²⁶ Тэ́ньци ёв отмэкця́ лэ́нгэ Варавас, нэ Исусо́с пало́ дова́, сыр Лэс мардэ́ чупняса, здыя пэ трушу́л тэ примарэн.

Халадэ́ Проса́на Исусо́с

²⁷ Тэ́ньци тхэмэ́скирэ-барыдырэскирэ халадэ́ лынэ́ Исусо́с дрэ претория, кхардэ́ кхэтанэ́ пхэрдо́ халадэ́нгиро полко,

²⁸ и росчхудэ Лэс и уридэ́ пэ Лэ́стэ тёмнонэ-лоло́ плашчо,

²⁹ и ке́ли скхудэ вя́нка пхусадытконэ хрустостыр сыр коро́на, уридэ́ Лэ́скэ пэ шэро́, чхудэ́ Лэ́скэ тришчынытко дэсто́ дро чачо́ (право) васт, и тэрдёнас пэ чанга́ анги́л Лэ́стэ, просанас Лэс, пхэни́: “Яв джидо́, Кра́ли Юдэ́нгиро!”

³⁰ И чунгардэнас пэ Лэ́стэ, и лынэ́ дэсто́ и мардэ́ лэ́са Лэс пир шэро́.

³¹ И коригэды́р (позжэды́р), сыр ёнэ сандлэпэ холямэс (здекиндлэпэ пэ Лэ́стэ), ёнэ злынэ Лэ́стыр лоло́ плашчо, уридэ́ пэ Лэ́стэ Лэ́скиро урибэ́н, и лыджинэ́ пэ трушу́л тэ примарэн.

Исусо́с Примарэ́на пэ Трушу́л

³² И сыр ёнэ джа́нас, одотхы́р стрэниндлэ манушэ́с Киринеятыр, савэ́с кхардэ́ Си́моно; и зачхудэ лэс тэ лыджа́л Христосо́скиро трушу́л.

³³ И ке́ли ёнэ явнэ́ пэ штэ́то, саво́ кхарлапэ ‘Ѓолгофа’, со значынэ́ла: ‘Чэрепнытко штэ́то,’

³⁴ ёнэ дынэ́ Лэ́скэ тэ пьел мол (вино) кхэтанэ́ жэлучоса и коригэды́р, сыр Ёв коштындя, Ёв на камдя́ тэ пьел буты́р.

³⁵ И ке́ли ёнэ примардэ Лэс пэ трушу́л, ёнэ роскэрдэ урибэ́н Лэ́скиро, чхурдыи жре́биё,

³⁶ И бэшындой, ракхэнас Лэс одо́й.

³⁷ И ёнэ кэрдэ́ упра́л Лэ́скирэ шэрэстыр Лэ́скиро зачхиныбэн, дро со Ёв сыс банго́: “Дава́ исын Ису́со, Кра́ли Юдэ́нгиро.”

³⁸ Тэ́ньци ёнэ примардэ пэ трушу́л пашы́л Лэ́стэ дуе розмарибнарьен: екхэ́с чачэ́ рига́тыр, явирэ́с зэрвонэ (левонэ) рига́тыр.

³⁹ И кодолэ́, савэ́ проджанас пашы́л Лэ́стэ, калякирэнас Лэс, кунины шэрэнца;

⁴⁰ и ракири́: “Ту ж кадава́ сан, Саво́ роспхагирэлас Кхангири́ и пир трин дывэса́ ґаздэсас ла нэвэ́стыр. Зра́кх Кокоро́ Пэс. Ко́ли Ту сан Чхаво́ Дэвлэ́скиро, джа́ тэлэ́ трушулэстыр.”

⁴¹ Адя́кэ-паць раша́нгирэ барыдыра́, кхэтанэ́ лылваритконэнца и годэпхурэнца сандлэпэ холямэс Лэ́стыр, ракири́:

⁴² “Явирэ́н Ёв зракхэлас; нэ Ёв на могинэ́ла тэ зракхэ́л Пэс, Ёв ж кра́ли Юдэ́нгиро: мэк какана́ тэ джал трушулэстыр, и амэ ява́са тэ патяс дрэ Лэ́стэ.

⁴³ Ёв патя́ла зоралэ́с дрэ Дэвлэ́стэ, мэк Дэвэ́л зракхэ́ла Лэс, ко́ли камэ́ла. Пал-дова́ со Ёв жа пхэндя́: ‘Мэ сом Чхаво́ Дэвлэ́скиро.’”

⁴⁴ Адя́кэ-паць и розмарибнарья, савэ́ сыс примардэ кхэтанэ́ Лэ́са, ладжакирэнас Лэс.

Исусо́скиро Мэрибэ́н

⁴⁵ Шовтонэ (дэшудуйтонэ) мардэстыр (штундатыр) яця́ калыпэ́н пир сари́ пхув и рикирдяпэ кэ/жы́ко еня́то (биекхэ́скиро дэ́што) мардо́;

⁴⁶ пашэ́ ж еня́то (биекхэ́скиро дэ́што) мардо́ Ису́со дыя́ го́дла зоралэ́с Юдыткэс: “Эли, Эли, лама сабактхани?” Дава́ исын Романэс: ‘Миро Дэ́вла, Миро Дэ́вла, со́скэ Ту мэкцян Ман?’

⁴⁷ И вари-савэ́ кодолэндыр, савэ́ сыс тэрдэ́ ада́й, ке́ли ёнэ шундлэ́ дава́, лынэ́ тэ ракирэ́н: “Адава́ ману́ш кхарэ́ла Илияс.”

⁴⁸ И екха́тыр екх лэ́ндыр подпрастандыя, лыя́ губка, киндькирдя ла дро шутлы мол, чхудя́ ла пэ дэстоскири (каштэскири) вострима, и подыя тэ пьел Лэ́скэ.

⁴⁹ Нэ яви́р пхэндлэ́: “Ужакирэн! Дыкхаса, сыр явэ́ла Или́я тэ зракхэ́л Лэс.”

⁵⁰ И Ису́со нэвэ́стыр дыя́ го́дла зоралэ́ заня́са и мыя́.

⁵¹ И, акэ, шы́рма дрэ Кхангири́ роскусцяпэ пэ дуй паша́, упралэстыр кэ пхув; и пхув триинскирдяпэ, и барунэ́ бэ́рги пхарадынэ;

⁵² и коплицы отпхандлэпэ, и бут манушы́тка тру́пы, савэ́н Дэвэ́л выкэдыя́ и савэ́ мынэ́, отджидынэ,

⁵³ и выгинэ́ коплицэндыр коригэды́р (позжэды́р), сыр Ису́со отджидыя́, гинэ́ ёнэ дро свэ́нто фо́ро и сыкадынэ бутэнгэ.

⁵⁴ И шэлэнгирэ-халадэ́нгиро барыдыро́ и халадэ́, савэ́ кхэтанэ́ ракхэнас Исусо́с, сыр дыкхнэ́ пхувья́киро триинскрибэн и саро́, со кэрдя́пэ, страха́дынэ зоралэ́с, ракири́: “Чачэс, дава́ сыс Чхаво́ Дэвлэ́скиро.”

⁵⁵ И бут джувля́ дыкхэнас дурипнастыр, савэ́ джа́нас пал Исусо́стэ Галилеятыр, и савэ́ дынариндлэ́ (служындлэ) Лэ́скэ,

⁵⁶ машки́р савэ́ндэ сыс Мари́я Магдалина, и Мари́я, дай Яковоскири и Ёзаскири, Заведеёскири ромны́, дай лэ́скирэ чхавэ́нгэ.

Исусо́скиро Гараибэ́н

⁵⁷ Ке́ли явдя́ бэльвэ́ль, явдя́ барвало́ ману́ш Аримафеятыр пир лав Ёза (Иосифо), саво́ кокоро́ адя́кэ-паць сыс Исусо́скиро сыкляибны́тко.

⁵⁸ Адава́ ману́ш подги́я кэ Пила́то и мангдя́ Исусо́скиро тру́по. Тэ́ньци Пила́то припхэндя́ тэ отдэ́н Исусо́скиро тру́по.

⁵⁹ И Ёза лыя́ тру́по, закрэнцындя Лэс дро жужо́ (чысто) похтан,

⁶⁰ и чхудя́ Лэс дрэ пэ́скири нэви́ копли́ца, сави́ ёв вычингирдя дрэ ска́ла; и ке́ли прирадя баро́ бар кэ загиибэ́н дрэ копли́ца, гия́ криг.

⁶¹ И сыс одо́й Мари́я Магдалина и яви́р Мари́я, савэ́ сыс бэштэ́ анги́л копли́ца.

Халадэ́ Ракхэ́на Копли́ца

⁶² Пэ яви́р дывэ́с, саво́ сыс са́вато (субо́та), скэдынэ́пэ раша́нгирэ барыдыра́ и Фарисе́и кэ Пила́то,

⁶³ пхэни́: “Раё, амэ рипираса, со хохаибнари, сыр сыс ишчо (инкэ́) джидо́, пхэндя́: ‘Пир трин дывэса́ Мэ отджидёвава.’

⁶⁴ Палдава́ припхэн тэ ракхэ́н магила кэ/жы́ко три́то дывэ́с, соб (кай) сыкляибны́тка тэ на чорэн Лэс, ко́ли явэ́на и тэ на пхэнэ́н манушэ́нгэ ‘уштыя́ мулэ́ндыр,’ и явэ́ла палатуно́ хохаибэ́н фуеды́р Пэрвонэстыр.”

⁶⁵ Пхэндя лэ́нгэ Пила́то: “Тумэ́ндэ исын халадэ́-ракхибна́рья: мэк ёнэ тэ джа́н, тэ ракхэ́н, сыр тумэ́ джинэ́на.”

⁶⁶ И ёнэ гинэ́, и чхудэ́ халадэ́н тэ ракхэ́н копли́ца, чхуви чэргэнори́ (печать) кэ бар.