Матфеё 24 - Библия - Пэ Балтитко Романи чиб (Романэс) 2019

Пал Кхангирья́киро Роспхагирибэ́н

¹ И ке́ли Ису́со выгия́ Кхангирья́тыр и кэдэласпэ тэ джал Пэ́скэ, подгинэ́ кэ Ёв Лэ́скирэ сыкляибны́тка, соб (кай) тэ сыкавэ́н Лэ́скэ саро́ кэрибэн Кхангирья́киро.

² Ёв ракирэ́ла лэ́нгэ адя́кэ: “Дыкхэ́на дава́ саро́? Чачэс, Мэ ракира́ва тумэ́нгэ: на ячэ́лапэ ада́й ни екх бар пэ бар, саво́ тэ на явэ́л пхагирдо́.”

Пал Пхарэ́ Пиридживипэна́ и Традыпэна́

³ И ке́ли Ёв сыс бэшто́ пэ Оливи́тко бэ́рга, подгинэ́ Лэ́скирэ сыкляибны́тка кэ Ёв екхджинэ и пхучнэ́: “Пхэн амэ́нгэ, ке́ли дава́ саро́ явэ́ла, и сави́ ґерты́к (знаме́ниё) явэ́ла анги́л, сыр Ту явэ́са и ваш свэтоскиро ко́нцо (яго́ро)?”

⁴ И отпхэндя́ Ису́со и пхэндя́ лэ́нгэ: “Ракхэ́нпэ, соб (кай) нико́н тэ на хохавэ́л тумэн.

⁵ Пал-дова́, со бут явэ́на Мирэ́ лавэ́са, ракири́: ‘Мэ сом Христо́со,’ и хохавэна бут манушэ́н.

⁶ И тумэ́ явэ́на тэ шунэ́н пал марибэ́н и ракирибэна пал марибэна. Дыкхэ́н, на страхадён; саро́ дава́ трэй тэ явэ́л, нэ дава́ ишчо (инкэ́) на ко́нцо (на яго́ро).

⁷ Пал-дова́ со ґаздэ́напэ мануша́ пэ манушэ́ндэ и кралипэ́н пэ кралипэ́н, и бокха явэ́на, и мэрибнытка фра́нсы и пхув явэ́ла тэ тринскирэлпэ пир штэ́ты.

⁸ Саро́ кадава́ явэ́ла анги́л сы́рбы дукха́, дрэ саво́ нэво́ свэ́то бияндёла.

⁹ Тэды явэ́на тэ здэн тумэн пэ мэ́ньки и мулякирэна тумэн, и явэ́на тэ на сыкавэ́н паты́в тумэ́нгэ пал Миро лав.

¹⁰ И бут тумэ́ндыр мэкэ́на тэ патя́н, и явэ́на тэ здэн екх екхэ́с, и явэ́на тэ на сыкавэ́н паты́в екх екхэ́скэ;

¹¹ и явэ́на бут хоханэ́ проро́ки и хохавэна бут манушэ́н;

¹² и пал-дова́ со явэ́ла буты́р чорипэ́н, бут мануша́ мэкэ́на тэ сыкавэ́н паты́в екх екхэ́скэ.

¹³ Нэ кон вырикирэ́ла саро́ кэ ко́нцо (кэ яго́ро), кодова́ зракхэ́лапэ.

¹⁴ И явэ́ла тэ пхэнэлпэ бахталы́ зан (звесь) пал Дэвлэ́скиро Кралипэ́н пир саро́ свэ́то сыр допхэныбэ́н ваш сарэ́ на́цыи; и тэды явэ́ла ко́нцо (яго́ро)!

Ису́со Ракирэ́ла пал Замэкибна́скири Бры́ткима

¹⁵ Палдава́, ке́ли тумэ́ дыкхэ́на голотынякиро джунгалыпэ́н (брыткима), саво́ явэ́ла тэ тэрдёл пэ свэ́нто штэ́то, со ракирдя́ проро́ко Дание́лё, (кон гинэ́ла, мэк тэ ґалёл),

¹⁶ тэды кодолэ́, савэ́ исын дрэ Юдэ́я, мэк тэ нашэ́н дрэ бэ́рги;

¹⁷ и кон исын пэ кхэри́тко стрэ́ха (чхаки́н), мэк тэ на джал тэлэ́ тэ лэл вари-со кхэрэ́скирэ миштыпна́стыр,

¹⁸ и кон исын пэ фэ́лда, мэк тэ на рисёл палэ тэ лэл пэ́скиро урибэ́н.

¹⁹ Мэ́ньки явэ́на тэды пэралэ джувленгэ, и джувленгэ, савэ́ чаравэна колынэса тыкнэ́ биятэ́н дрэ долэ́ дывэса́.

²⁰ Мангэ́нпэ Дэвлэ́скэ, соб (кай) тэ на явэ́л трэй тэ нашэ́н иванта(тэс)киро (зимакиро) ци саватонэ́ (суботонэ́):

²¹ пал-дова́ со тэды явэ́ла дасави́ биба́хт, сави́ на сыс свэто́скирэ англыпна́стыр, и со буты́р на явэ́ла ние́кхвар;

²² И ко́ли далэ́ дывэса́ тэ на явэ́нас кроткэдыр, нико́н джидэндыр на зракхэласпэ; нэ ваш манушэ́нгэ, савэ́н Дэвэ́л выкэдыя́, явэ́на кроткэдыр далэ́ дывэса́.

²³ Тэ́ньци, ко́ли вари-кон пхэнэ́ла тумэ́нгэ: ‘Акэ, исын Христо́со’ ци ‘одо́й’, на патя́н.

²⁴ Пал-дова́ со явэ́на хоханэ́ христосы, хоханэ́ проро́ки и ёнэ сыкавэ́на барэ́ ґертыка́ и кэрэ́на ди́вы, соб (кай) тэ хохавэн аж кодолэ́н, савэ́н Дэвэ́л выкэдыя́, ко́ли сашты́ явэ́ла.

²⁵ Акэ, Мэ тумэ́нгэ ангилпхэндём.

²⁶ Палдова́, ко́ли ёнэ пхэнэ́на тумэ́нгэ: ‘А́кэ, Ёв исын пэ чхучэ́ прахи’, на джа́н яври́; ко́ли ёнэ пхэнэ́на: ‘А́кэ, Ёв исын дро андратуны́ шту́ба’, на патя́н.

²⁷ Пал-дова́ со, сыр блискавица джа́ла вастоко́стыр и яснэдыр явэ́ла кэ западо, адя́кэ явэ́ла Чхаво́.

²⁸ Кай явэ́ла тру́по, одо́й скэдэ́напэ орлы (киды).

Сыр Нэвэ́стыр Явэ́ла Чхаво́ Манушэ́скиро

²⁹ И екха́тыр (сра́зу) пало́ дая́ пхари́ би́да дрэ долэ́ дывэса́ кхам мурдёла, чхон на явэ́ла тэ свэнцынэл, и чэргэня́ пэрэ́на болыбна́стыр, и болыбна́скирэ зорья явэ́на триинскирдэ

³⁰ И тэды сыкадёла ґерты́к пэ болыбэ́н, сави́ дэ́ла манушэ́нгэ джиныбэ́н, со явэ́ла Чхаво́ Манушэ́скиро, и тэ́ньчи сарэ́ манушы́тка ро́ды явэ́на то ровэ́н пхарэ́с и дыкхэ́на Чхавэ́с Манушэскирэс, Саво́ явэ́ла тэ джал тэлэ́ дрэ о́блоки барэ́ зорья́са и ярконэ Дэвлэ́скирэ слава́са.

³¹ И бичхавэ́ла Ёв Пэ́скирэ Янголэн барэ́ рогоса (трубаса), и скэдэ́ла кхэтанэ́, конэ́с Ёв выкэдыя́, штарэ́ ригэ́ндыр и екхэ болыбнытконэ ягоро́стыр (краёстыр) кэ яви́р.

Сыклякирибэ́н пал Инжыри́тко Кашт

³² Сыклён сыкаибэ́н (приме́ро) инжыритконэ каштэ́стыр: ке́ли лэ́скирэ рандя́ (вэ́тки) ячэ́напэ ковлэ́ и мэкэ́на патря (листы), джинэ́н, со сыг явэ́ла лынай.

³³ Адя́кэ-паць и тумэ́, сыр явэ́на тэ дыкхэ́н, со саро́ дава́ кэрэ́лапэ, джинэ́н, со Ёв исын на́дур, пашы́л вудара́.

³⁴ Чачэс, Мэ ракира́ва тумэ́нгэ: на проджа́ла дава́ манушы́тко ро́до анги́л дова́, сыр саро́ дава́ кэрэ́лапэ.

³⁵ Болыбэ́н и пхув проджа́на, а лава́ Мирэ́ на проджа́на.

Нико́н на Джинэ́ла ни Дывэ́с, ни Мардо́ (Шту́нда)

³⁶ Нэ нико́н на джинэ́ла ни дывэ́с, ни мардо́, ке́ли саро́ дава́ явэ́ла, ни болыбна́скирэ Янго́лы, ни Чхаво́, а екх Дад джинэ́ла.

³⁷ И, сыр сыс дрэ долэ́ дывэса́, ке́ли сыс Ноё, адя́кэ-паць явэ́ла Чхаво́ Манушэ́скиро.

³⁸ Палдава́ со, сыр анги́л потопо мануша́ ханэ́ и пинэ́, лынэпэ и джа́нас палоро́м анги́л дова́ дывэ́с, дро саво́ Ноё загия́ дро ковчэго,

³⁹ и на ґалёнас, пака яця́ патопо и на лыджыя пэ́са лэн сарэ́н, адя́кэ-паць явэ́ла Чхаво́ Манушэ́скиро.

⁴⁰ Тэды явэ́на дуй мануша́ пэ фэ́лда: екхэ́с Рай Дэвэ́л лэ́ла, явирэ́с ячкирэ́ла,

⁴¹ ци дуй джувля́, со мелинэна жэрновонэ барэ́нца (бэлэдиненца): екха Рай Дэвэ́л лэ́ла, явирья ячкирэ́ла.

⁴² Ракхэ́нпэ, пал-дова́ со на джинэ́на, ке́ли явэ́ла тумаро́ Рай Дэвэ́л.

⁴³ Тумэ́ ж джинэ́н дава́, со, ко́ли кхэрэ́скиро хула́й джинэлас, ке́ли раты́ явэ́ла чор, ёв на явэ́лас суто́ и на дэ́лас, соб (кай) чор тэ под΄ганавэлпэ тэл лэ́скиро кхэр.

⁴⁴ Палдава́ явэ́н тумэ́ адя́кэ-паць скэдынэ́, пал-дова́ со Чхаво́ Манушэ́скиро явэ́ла дрэ дасаво мардо́ (шту́нда), со тумэ́ на думинэ́на.

Патяибны́тко и Напатяибны́тко Писха́ри

⁴⁵ Кон тэды исын патяибны́тко и годьваро́ писха́ри (ра́бо), конэ́скэ лэ́скиро хула́й дыя́ зор пэ лэ́скирэ бутярнэндэ, соб (кай) тэ дэл тэ хал лэ́нгэ дро часо, саво́ трэй?

⁴⁶ Бахтало́ исын кодова́ писха́ри, конэ́скиро хула́й, сыр явэ́ла, латхэ́ла, со ёв кэрэ́ла адя́кэ, сыр исын упхэндло́ лэ́скэ.

⁴⁷ Чачэс, Мэ ракира́ва тумэ́нгэ: ёв дэ́ла лэ́скэ зор пэ саро́ лэ́скиро миштыпэ́н.

⁴⁸ Нэ ко́ли адава́ фуй писха́ри пхэнэ́ла пэ́скэ: ‘Миро рай зарикирэлапэ’,

⁴⁹ и лэ́ла тэ шулякирэл пэ́скирэ малэн-писхарье́н, и хал и тэ пьел матыбнарьенца,

⁵⁰ тэды явэ́ла писхарискиро хула́й дро дова́-паць мардо́ (шту́нда), пал саво́ ёв на джинэ́ла,

⁵¹ и росчингирэла хула́й лэс пэ паш и дэ́ла лэ́скэ дасаво тала́но, сыр дуе́муитконэнгэ: одо́й явэ́ла роибэ́н и дандэнгири скрежыма.