Матфеё 22 - Библия - Пэ Балтитко Романи чиб (Романэс) 2019

Приме́ро (Сыкаибэ́н) пал Бьяв

¹ И отпхэнэ́лас лэ́нгэ Ису́со и ракирдя́ сыкаибнэнца:

² “Кралипэ́н дро Болыбна́скиро Раё исын сы́рбы кра́ли, саво́ кэрдя́ бьяв пэ́скирэ чхавэ́скэ,

³ и бичхадя́ пэ́скирэ дынарье́н тэ кхарэ́н одолэ́н, савэ́н кхардэ́ пэ бьяв: и ёнэ на камлэ́ тэ явэ́н.

⁴ Нэвэ́стыр ёв бичхадя́ явирэ дынарье́н, ракири́: ‘Пхэнэ́н одолэ́нгэ, савэ́н кхардэ́: акэ мэ кэрдём хабэ́н; гурува и тхулэ кхэри́тка мурдала́ зачхиндлэ́, и саро́ исын кэрдо́, явэ́н пэ бьяв.’

⁵ Нэ ёнэ на прилынэ́ лэ́скирэ лава́ дрэ годы́, гинэ́, кон пэ фэ́лда, кон тэ кофаринэл;

⁶ и сыс адасавэ́, савэ́ ухтылдэ́ лэ́скирэ дынарье́н, ладжакирдэ́ лэн и мулякирдэ́,.

⁷ И ке́ли кра́ли шундя́ пал дава́, древа́н холя́сыя, и ёв бичхадя́ пэ́скирэ халадэ́н и ёнэ мулякирдэ́ кадалэ́ замарибнарьен и хачкирдэ́ тэлэ́ фо́ро.

⁸ Тэ́ньци ёв пхэндя́ дынарье́нгэ: ‘Бьявитко сками́нд исын скэдыно́, нэ савэ́н кхардэ́, на сыс мол;

⁹ джа́н жэ пэ трушулытка дрома́, кай дрома́ зджанапэ, и кицы́ манушэ́н тумэ́ латхэ́на, ада́кицы кхарэ́н пэ бьяв.’

¹⁰ И гинэ́ пэ́скэ одолэ́ дына́рья пэ барэ́ дрома́ и скэдынэ́ сарэ́н, конэ́с латхнэ́: и чорэн и лачхэн; и бьявитко кхэр сыс пхэрдо́ манушэ́нца, савэ́ бэшэнас пашы́л.

¹¹ Нэ ке́ли кра́ли гия́ андрэ́, кай мануша́ сыс бэштэ́, ёв дыкхця́ екхэ манушэ́с, саво́ на сыс уридо́, сыр трэй пэ бьяв,

¹² и ёв пхэндя́ лэ́скэ: ‘Морэ? Сыр ту ги́ян адари́к дро урибэ́н, со исын на ваш бьяв?’ И ёв сыс штыл.

¹³ Тэ́ньци кра́ли пхэндя́ дынарье́нгэ: ‘Пхандэн лэ́скэ васта́ и ґэра́, и чхурдэ́н лэс яври́ дро цямлыпэ́н (калыпэн), одо́й явэ́ла роибэ́н и дандэнгири скрежыма.’

¹⁴ Пал-дова́ со исын бут, савэ́н кхардэ́, нэ исын на́бут, савэ́н выкэдынэ́.”

Ису́со Ракирэ́ла тэ Плэскирэ́н Мы́то Кесарёскэ

¹⁵ Тэ́ньци Фарисе́и гинэ́ и доракирдэпэ, сыр тэ ухтылэ́н Лэс дро лав.

¹⁶ И ёнэ бичхадэ́ кэ Ёв пэ́скирэ сыкляибнытконэ́н кхэтанэ́ Иродианэнца тэ пхучэ́н Лэ́стыр: “Сыклякирибна́скиро! Амэ джина́са, со Ту сан чачуно́ и сыклякирэса пал дром кэ Дэвлэ́скиро чачипэ́н, на дыкхи́ пэ манушэ́скиро штэ́то машки́р явирэ манушэ́ндэ, и Ту на дарэса никонэстыр, со Ту на дыкхэ́са пэ лэ́скиро штэ́то машки́р манушэ́ндэ;

¹⁷ тэды пхэн амэ́нгэ, сыр Ту думинэса: ци исын пир Зако́но тэ плэскирас намирья (подать) кесарёскэ ци над?”

¹⁸ Нэ Ису́со джиндя́ лэ́нгири дуемуиткима и пхэндя́: “Со́скэ тумэ́ Ман камэ́на тэ пропатякирэн, дуемуитка?

¹⁹ Сыкавэ́н Ма́нгэ ґасприн (капейка), савья́са тумэ́ плэскирэна намирья (подать)!” И ёнэ яндлэ́ Лэ́скэ динариё.

²⁰ И Ёв ракирэ́ла лэ́нгэ: “Конэ́скиро муй и лав исын вычхиндлэ́ ада́й?”

²¹ Ёнэ пхэндлэ́: “Кесарёскиро.” Тэды Ёв ракирэ́ла лэ́нгэ: “Отдэ́н жэ кесарёскиро Кесарёскэ, а Дэвлэ́скиро Дэвлэ́скэ.”

²² И ке́ли ёнэ шундлэ́ дава́, дынэпэ дивоскэ и гинэ́ криг Лэ́стыр.

Пал Отджидыипэ́н Мэрибна́стыр

²³ Дро дова́-паць дывэ́с подгинэ́ кэ Ёв Садукеи, савэ́ ракирэ́на, со нанэ отджидыипэн мэрибна́стыр, и пхучнэ́ Лэ́стыр,

²⁴ ракири́: “Сыклякирибна́скиро! Мо́йза (Моисеё) пхэндя́: ‘Ко́ли ману́ш мэрэ́ла, и на сыс лэ́стэ чхаворэ́н, мэк лэ́скиро пшал тэ лэл лэ́скирэ ромня́ палоро́м, соб (кай) тэ рискирэ́л палэ мулэ́-пшалэскиро ро́до.’

²⁵ Акэ, сыс амэ́ндэ эфта́ пша́ла: пхурэды́р пшал сыр лыяпэ, мыя́ би чхаворэнгиро и мэкця́ ёв пэскирья́ ромня́ пэ́скирэ пшалэ́скэ;

²⁶ и адя́кэ сыс явирэса, тритонэса кэ эфта́то.

²⁷ Пал лэ́ндэ сарэ́ндэ и мыя́ джувлы́.

²⁸ Сыр явэ́ла отджидыипэн мэрибна́стыр, конэ́скири ромны́ ёй явэ́ла эфтандыр? Пал-дова́ со ёй сыс палоро́м пал сарэ́ндэ.”

²⁹ Нэ Ису́со отпхэндя́ и пхэндя́ лэ́нгэ: “Тумэ́ дэнапэ дукха́, пал-дова́ со на джинэ́на ни Свэ́нто Чхиныбэ́н, ни зор Дэвлэ́скири.

³⁰ Пал-дова́ со, сыр явэ́ла отджидыипэн мэрибна́стыр, на явэ́на тэ лэнпэ и тэ выджа́н палоро́м, а явэ́на сыр Янго́лы дро Болыбна́скиро Раё.

³¹ Нэ пал отджидыипэн мэрибна́стыр, нау́што тумэ́ на гиндлэ́, со Дэвэ́л пхэндя́ тумэ́нгэ:

³² ‘Мэ сом Аврамоскиро Дэвэ́л, и Исако́скиро Дэвэ́л, и Яково́скиро Дэвэ́л’? Ёв исын Дэвэ́л джидэ́-манушэ́нгиро, а на мулэнгиро.”

³³ И ке́ли мануша́ шундлэ́ дава́, ёнэ дивиндлэ́пэ пэ Лэ́скиро сыклякирибэ́н.

Ису́со Ракирэ́ла пал Най Барыды́р Припхэныбэ́н

³⁴ И ке́ли Фарисе́и шундлэ́, со Ёв зачхудя Садукеен тэ явэ́н штыл (ти́ха), скэдынэ́пэ пашы́л Лэ́стэ.

³⁵ И екх лэ́ндыр, Законоскиро сыклякирибнари, пхуця́ Лэ́стыр, соб (кай) тэ пропатякирэн Лэс:

³⁶ “Сыклякирибна́скиро, саво́ исын най барэды́р припхэныбэ́н дро Зако́но?”

³⁷ И Ёв пхэндя́ лэ́скэ: “Рикир сыр Дро́гима Рас-Дэвлэ́с тырэ́с сарэ́ илэ́са пэскирэса и сарэ́ тырэ́ духо́са, и сарэ́ тырэ́ годя́са.”

³⁸ Дава́ исын най барэды́р и пэ́рво припхэныбэ́н.

³⁹ Яви́р исын дасаво сыр пэ́рво: ‘Сыка́в паты́в пэ́скирэ пашатунэ́ манушэ́скэ сыр кокоро́ пэ́скэ.’

⁴⁰ Пэ кадалэ́ дуй припхэныбэна́ рикирэ́лапэ саро́ Зако́но и пророкэнгиро сыклякирибэ́н.”

Пхучыбэ́н пал Месия́стэ

⁴¹ И ке́ли Фарисе́и скэдынэ́пэ, Ису́со пхуця́ лэ́ндыр:

⁴² пхэни́: “Со тумэ́ думинэ́на пал Христосо́стэ? Конэ́скиро Чхаво́ исын Ёв?” Ёнэ ракирэ́на Лэ́скэ: “Давидо́скиро.”

⁴³ Ёв ракирэ́ла лэ́нгэ: “Сыр тэды Дави́до, сыр лэ́скэ упхэндя Ду́хо (Фа́но), кхардя́ Лэс’ Раё Дэ́вла’, ракири́:

⁴⁴ ‘Пхэндя Рай Дэвэ́л Ра́скэ-Дэвлэ́скэ мирэ́скэ: ‘Бэш пир чачо́ васт Ма́ндыр, анги́л, сыр Мэ чхува́ва вэргэ́н тэл ґэра́ Тырэ́?’

⁴⁵ Ко́ли тэды Дави́до кхардя́ Лэс ‘Раё Дэ́вла’, сыр жа Ёв исын чхаво́ лэ́скиро?”

⁴⁶ И нико́н на могиндя́ тэ отпхэнэл Лэ́скэ ни лав, и долэ́ дывэсэ́стыр никонэстэ буты́р на сыс муршыпэн тэ пхучэл Лэ́стыр буты́р.