Матфеё 19 - Библия - Пэ Балтитко Романи чиб (Романэс) 2019

Ису́со Сыклякирэ́ла пал Розгиибэ́н Ромня́са

¹ И сыс адя́кэ: ке́ли Ису́со пирияця́ тэ ракирэ́л далэ́ лава́, Ёв гия́ криг Галилеятыр и явдя́ пэ штэ́ты Юдэя́кирэ пэ яви́р Иорданоскирэ – рэкакири (лэнякири) риг пэ Иорда́но;

² и бут мануша́ гинэ́ пал Лэ́стэ, и Ёв высастякирдя́ лэн.

³ И подгинэ́ кэ Ёв Фарисе́и и пропатякирэнас Лэс и пхучэнас: “Ци пал кажно рэ́ндо (де́ло) сашты́ (можна) манушэ́скэ тэ розлыджалпэ пэ́скирэ ромняся?

⁴ И Ёв отпхэндя́, ракири́: “Нау́што на гиндлэ́ тумэ́, со Дэвэ́л дро англыпэ́н (начало) свэтоскиро создыя́ лэн муршэса и джувля́са?

⁵ И пхэндя́: ‘Палдава́ мэкэ́ла ману́ш дадэ́с и да и приячэла кэ пэ́скири ромны́, и явэ́на ёнэ сыр екх лоч (плоть);

⁶ адя́кэ со ёнэ ужэ на дуйджинэ́, а екх лоч? Со Дэвэ́л чхудя́ кхэтанэ́, мэк ману́ш тэ на розлыджал.”

⁷ Ёнэ ракирэ́на Лэ́скэ: “Со́скэ ж Мо́йза припхэндя́ тэ чхинэл лыл пал розгиибэн тэ отмэкэ́л ромня́.”

⁸ Ёв ракирэ́ла лэ́нгэ: “Мо́йза дыя́ во́ля тумэ́нгэ тэ отмэкэн ромня́ пал тумарэ́ холямэ́ илэ; нэ анги́л дава́ адя́кэ на сыс.

⁹ Нэ, Мэ пхэна́ва тумэ́нгэ: ко́ли вари-кон мэкэ́ла пэскирья́ ромня́ на пал блэ́ндо и лэ́ла явирья, одова́ кэрэ́ла биладжаипэ́н.”

¹⁰ Пхэнэ́на Лэ́скэ сыкляибны́тка: “Нэ ко́ли дасаво патяибэ́н исын машки́р ромэстэ и ромня́тэ, фэды́р тэ на лэспэ сарэ́са.”

¹¹ Ёв жа пхэндя́ лэ́нгэ: “На сарэ́ ґалёна далэ́ лава́, нэ екх кодолэ́, конэ́скэ дыно́;

¹² пал-дова́ со исын скопцы, савэ́ исын дасавэ́ да́кирэ бияныпнастыр; нэ исын кодолэ́, савэ́н мануша́ кэрдэ́ дасавэнца; и исын мурша́, савэ́ на лэнапэ ваш Кралипэ́н, Саво́ исын дро Болыбна́скиро Раё. Кон могинэ́ла тэ ґалёл, мэк тэ ґалёл.”

Ису́со Бахтякирэ́ла Биятэ́н

¹³ Тэ́ньци яндлэ́ биятэ́н кэ Ёв, соб (кай) Ёв тэ чхувэ́л васта́ пэ шэро́ лэ́нгэ и тэ помангэлпэ; нэ сыкляибны́тка на мэкэнас лэн.

¹⁴ Нэ Ису́со пхэндя́: “Мэкэ́н биятэ́н и на тэрдён пэ дром лэ́ндэ тэ явэ́н кэ Мэ; пал-дова́ со Кралипэ́н дро Болыбна́скиро Раё явэ́ла ваш адасавэ́ манушэ́нгэ, савэ́ исын сыр кадалэ́ бияты (чхаворэ́)”,

¹⁵ и сыр Ёв чхудя́ васта́ пэ шэро́ лэ́нгэ бахтякирибнаса, то гия́ одотхы́р.

Барвало́ Тэрно́ Ману́ш

¹⁶ И, акэ, подги́я вари-саво́ ману́ш кэ Ёв и пхэндя́: “Сыклякирибна́скиро! Саво́ лачхипэ́н ма́нгэ трэй тэ кэра́в, соб (кай) тэ дэл Дэвэ́л ма́нгэ ве́чно джиибэ́н?” И Ёв пхэндя́ лэ́скэ:

¹⁷ “Со́скэ ту пхучэса Ма́ндыр пал лачхипэ́н? Екх Дэвэ́л исын лачхо́. Нэ ко́ли ту́кэ исын дро́го ве́чно джиибэ́н Дэвлэ́стыр, тэды кэр пир припхэныбэна́.”

¹⁸ Ёв ракирэ́ла Лэ́скэ: “Савэ?” И Ису́со пхэндя́: “На замар (на умар), на кэр биладжаипэ́н, на чор, на дэ хохано́ допхэныбэ́н,

¹⁹ кутякир пэ́скирэ дадэ́с и да; и сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”

²⁰ Раки́рла Лэ́скэ тырно ману́ш: “Дава́ саро́ мэ кэрдём; со ишчо (инкэ́) на ухты́лла (на́доси) ма́нгэ?”

²¹ Ису́со пхэндя́ лэ́скэ: “Ко́ли ту́кэ исын пир ило́ тэ явэс бидошакиро, джа́, бикин саро́, со исын ту́тэ, и роздэ богэнгэ, соб (кай) тэ явэ́л ту́тэ кучипэ́н дро Болыбна́скиро Раё; яв’ и джа́ Ма́нца.”

²² Нэ ке́ли тырно ману́ш шундя́ дава́, ёв гия́ криг пхарипнаса пэ ило́, пал-дова́ со лэ́стэ сыс баро́ барвалыпэ́н.

²³ И пхэндя́ Ису́со Пэ́скирэ сыкляибнытконэ́нгэ: “Чачэс, Мэ ракира́ва тумэ́нгэ: пхаро́ явэ́ла барвалэскэ тэ заджа́л дро Кралипэ́н дро Болыбна́скиро Раё;

²⁴ и ишчо (инкэ́) Мэ пхэна́ва тумэ́нгэ: локхэды́р явэ́ла верблюдоскэ тэ проджал пир сувьякиро каноро, сыр барвалэскэ тэ заджа́л дро Кралипэ́н дро Болыбна́скиро Раё.”

²⁵ И ке́ли сыкляибны́тка шундлэ́ дава́, ёнэ древа́н дивиндлэ́пэ, пхэни́: “Кон тэды могинэ́ла тэ зракхэлпэ?”

²⁶ И сыр Ису́со подыкхця́ пэ лэ́ндэ, тэды пхэндя́: “Мануша́ на могинэ́на кокорэ́ тэ зракхэн пэс; екхэ Дэвлэ́стэ исын зор пэ саро́.”

²⁷ Тэ́ньци Пэ́три отпхэндя́ и пхэндя́: “Гада, амэ саро́ ячкирдям и гиям Ту́са, со явэ́ла амэ́нгэ?”

²⁸ И Ису́со пхэндя́ лэ́нгэ: “Чачэс, Мэ ракира́ва тумэ́нгэ: тумэ́, савэ́ гинэ́ Ма́нца дро нэво́ свэ́то, саво́ Дэвэ́л кэрэ́ла, ке́ли бэшэ́ла Чхаво́ Манушэ́скиро пэ славу́тно престоло, тэды бэшэна адя́кэ-паць и тумэ́ пэ дэшуду́й троны, соб (кай) тэ сэндинэ́н дэшуду́й ро́ды Израилёскирэ.

²⁹ И кажно, кон мэкця́ кхэра́ ци пшалэ́н, ци пхэнен ци да, ци ромня́, ци чхаворэ́н, ци фэ́лды ваш Миро лав, дорэсэ́ла дрэ шэл мо́лы буты́р и лэ́скэ явэ́ла дыно́ ве́чно джиибэ́н.

³⁰ Бут жа англатунэ́ явэ́на палатунэ́, а палатунэ́ явэ́на англатунэ́.