Матфеё 18 - Библия - Пэ Балтитко Романи чиб (Романэс) 2019

Кон исын Барыды́р?

¹ Дрэ дова́-паць мардо́ (шту́нда) подгинэ́ сыкляибны́тка кэ Ису́со, пхэни́: “Кон исын барэды́р дро Кралипэ́н дро Болыбна́скиро Раё?”

² И выкхари анги́л биято́с (чхаворэс), Ёв чхудя́ лэс машки́р лэ́ндэ,

³ и пхэндя́: “Чачэс, Мэ ракира́ва тумэ́нгэ: ко́ли тумэ́ на парудёна и на ячэ́на сыр бияты, тумэ́ никели на заджа́на дро Кралипэ́н дро Болыбна́скиро Раё.

⁴ Палдова́, кон тыкнякирэла пэс сыр одова́ явэ́ла бия́то, явэ́ла най барэды́р дро Кралипэ́н дро Болыбна́скиро Раё,

⁵ и кон прилэ́ла адасавэ́ биято́с ваш Миро лав, прилэ́ла Ман.

Со Тырдэ́ла Манушэ́н кэ Грэ́хо

⁶ И ко́ли вари-кон отрискирэла мэк екхэ адасавэс тыкнэндыр, кон патя́ла дрэ Ма́ндэ, тэды фэды́р явэ́лас кадасавэ́ манушэ́скэ, ко́ли лэ́скэ урьенас сявитко (мельницытко) бар (бэлэдин) пэ мэн, и тасадякирэнас лэс дро морёскиро (дэрьявэ́скиро) хорипэ́н.

⁷ Бида свэтоскэ злыджаибнэндыр! Пал-дова́ со амэ на дживаса би лэ́нгиро, нэ би́да кодолэ́ манушэ́скэ, саво́ явирэ́н тырдэла кэ грэ́хо!

⁸ Дыкх жа, ко́ли васт тыро́ ци ґэро́й тыри́ злыджала тут, отчингир лэн и чхурдэ лэн пэ́стыр; фэды́р ту́кэ екхэ вастэ́са ци ґэрьяса тэ заджас дро джиибэ́н ве́чно, сыр дуе вастэ́нца и дуе ґэрэ́нца тэ явэс чхурдыно́ дро ве́чно яг.

⁹ И ко́ли тыри́ якх злыджала тут, куш яври́ ла и чхурдэ пэ́стыр: фэды́р ту́кэ екхэ якхаса тэ заджас дро джиибэ́н ве́чно, сыр дуе якхэ́нца тэ явэс чхурдыно́ дрэ ве́чно яг.

Пал Бакря́тэ, Сави́ Хасия́

¹⁰ Дыкхэ́н, на дыкхэ́н вучипна́стыр ни пэ конэ́стэ кадалэ́ тыкнэндыр: пал-дова́ со лэ́нгирэ Янго́лы, савэ́ исын дро болыбэна, дыкхэ́на кажно мо́ло Дадэ́с Мирэс, Саво́ исын дро Болыбна́скиро Раё.

¹¹ Палдава́ со Чхаво́ Манушэ́нгиро явдя́ тэ латхэл, и тэ зракхэ́л хасибнытконэн.

¹² Сыр тумэ́нгэ здэлапэ? Ко́ли вари-савэ́ манушэ́стэ явэ́лас шэл бакря́, и екх лэ́ндыр заблэндындяпэ, тэды со ёв на ячкирэлас енядэша еня́ (биекхэ́скиро шэл) бакря́ дрэ бэ́рги, и на джа́лас тэ родэ́л кодоля, сави́ заблэндындяпэ?

¹³ И ко́ли выджа́ла лэ́скэ тэ латхэл ла, ёв радынэ́лапэ пал ла́тэ бутэды́р, сыр пал енядэша енендэ, савэ́ на хасинэ́.

¹⁴ Дава́ значынэ́ла, со нанэ пэ дава́ тумарэ́ Дадэ́скири во́ля, Саво́ исын дро Болыбна́скиро Раё, соб (кай) тэ хасёл екх кадалэ́ тыкнэндыр.

Пшал, Саво́ Кэрэ́ла Грэ́хо

¹⁵ Ко́ли ж кэрэ́ла грэ́хо тыро́ пшал анги́л ту́тэ, джа́, сыка́в лэ́скири банг лэ́скэ екх пэ екх. Ко́ли ёв кандэ́ла тут, тэды ёв явэ́ла тыро́ пшал нэвэ́стыр.

¹⁶ Нэ ко́ли на явэ́ла тэ кандэл пшал тыро́, лэ пэ́са ишчо (инкэ́) екхэ́с ци дуе́н, соб (кай) кажно лав, савэ́са ту бангякирэса Лэс, тэ чхувэ́н зор адалэ́ дуй ци трин якхи́тка.

¹⁷ Нэ ко́ли ёв отпхэнэлапэ тэ кандэл лэн, тэды пхэн дрэ Кхангири́; и ко́ли на закамэ́ла Кхангири́ тэ кандэл, мэк тэ явэ́л ёв ту́кэ сыр Наюдо и мытоскиро скэдыибнари.

Ису́со Ракирэ́ла пал Лэ́нгири Зор тэ Дэн Во́ля и тэ Припхэнэ́н тэ на Кэрэ́н

¹⁸ Чачэс, Мэ ракира́ва тумэ́нгэ, со тумэ́ припхэнэна пэ пхув тэ на кэрэ́н, явэ́ла припхэндло дро Болыбна́скиро Раё; и со тумэ́ домэкэна пэ пхув, явэ́ла домэкно дро Болыбна́скиро Раё.

¹⁹ Ишчо Мэ пхэна́ва чачипэ́н тумэ́нгэ, со, ко́ли дуйджинэ́ тумэ́ндыр явэ́на дрэ кхэтаны́ годы́ пэ пхув тэ мангэ́н пал вари-со, явэ́ла дыно́ лэ́нгэ Мирэ́ Дадэ́стыр, Саво́ исын дро Болыбна́скиро Раё.

²⁰ Пал-дова́ со, кай дуй ци трин явнэ́ кхэтанэ́ ваш Миро лав, одо́й Мэ сом машки́р лэ́ндэ.”

Приме́ро (Сыкаибэ́н) пал Дынари́стэ, Саво́ на́ Примангдя Явирэ́нгэ

²¹ Тэ́ньци подги́я Пэ́три и пхэндя́: “Раё Дэ́вла, кицы́ мо́лы ма́нгэ трэй тэ примангав пшалэ́скэ, ко́ли ёв явэ́ла тэ кэрэ́л грэ́хо анги́л ма́ндэ? Кэ эфта́ (кэ битринэ́нгиро дэш) мо́лы?”

²² Ису́со ракирэ́ла Лэ́скэ: “Мэ на ракира́ва ту́кэ эфта́ мо́лы, нэ кэ эфтадэша́ эфта́ мо́лы.

²³ Пал-дова́ со Болыбна́скиро Раё, кай Дэвэ́л явэ́ла Кра́ли, исын сыр кра́ли, саво́ закамдя́ тэ розгинэлпэ пэ́скирэ писхарье́нца.

²⁴ И ке́ли ёв лыя́ тэ гинэл, яндлэ́ кэ ёв екхэ манушэ́с, саво́ сыс вужло лэ́скэ дэш тысёнцы тала́нты.

²⁵ И сыр лэ́стэ на сыс со́са тэ плэскирэл, тэды кра́ли припхэндя́ тэ бикнэл лэс, и ромня́ и чхаворэ́н, и саро́, со лэ́стэ сыс, соб (кай) тэ заплэскирэл вужлыпэ́н.

²⁶ Тэды дына́ри пыя́ пэ чанга́ и лыя́ тэ мангэ́л лэс, ракири́: “Раё! ‘Ужакир миро вужлыпэ́н, и мэ саро́ выплэскирава ту́кэ.”

²⁷ И кра́ли, кодолэ́ писхарискиро, потангиндя и мэкця́ лэс и примангдя лэ́скэ вужлыпэ́н.

²⁸ Нэ адова писха́ри, сыр гия́ одотхы́р, латхя́ екхэ пэ́скирэ малэс пир буты́, саво́ сыс вужло лэ́скэ шэл динарии. И ухтылдя лэс и лыя́ тэ тасавэл лэс, ракири́: ‘Заплэскир саро́, со ту сан вужло.’

²⁹ Нэ дру́го (мал) лэ́скиро пыя́ пэ чанга́ и лыя́ тэ мангэ́л лэс, ракири́: ‘Ужакир миро вужлыпэ́н и мэ выплэскирава ту́кэ.’

³⁰ Нэ одова́ на закамдя́, нэ гия́ и здыя лэс дро штарибэ́н, анги́л, сыр ёв выплэскирэла кодова́, со сыс вужло.

³¹ Нэ ке́ли мала́ лэ́скирэ дыкхнэ́, со кэрдя́пэ, древа́н пынэ́ дро ду́хо (фа́но), явнэ́ и роспхэндлэ́ сари́ зан (звесь), со кэрдя́пэ, крали́скэ.

³² Тэ́ньци лэ́скиро кра́ли кхардя́ лэс кэ пэ и ракирэ́ла: ‘Ту сан злыдня писха́ри, Мэ примангдём ту́кэ дова́ вужлыпэ́н, сыр ту мангдян ман;

³³ нау́што на трэиндя́ ж и ту́кэ тэ потангинэс друго́с (малэ́с) пэ́скирэс, сыр и мэ ту́кэ примангдём?’

³⁴ И сыр холя́сыя кра́ли, и здыя лэс катэнгэ, анги́л, сыр ёв выплэскирэла саро́ пэ́скиро вужлыпэ́н.

³⁵ Адя́кэ-паць и кэрэ́ла тумэ́нгэ Дад Миро Болыбна́скиро, ко́ли кажно тумэ́ндыр на примангэла илэ́стыр пэ́скирэ пшалэ́скэ.”