Матфеё 15 - Библия - Пэ Балтитко Романи чиб (Романэс) 2019

Ису́со Роспхэнэ́ла пал Ѓаратунэ́ Юды́тка Сыклякирибэна́

¹ Пало́ дава́ явнэ́ кэ Ису́со Фарисе́и и лылвари́тка Ерусалимо́стыр и пхэндлэ́:

² “Со́скэ Тырэ́ сыкляибны́тка на кандэ́на годэпхурэнгирэ припхэныбэна́? Пал-дова́ со на морэна пэ́скирэ васта́, анги́л сыр тэ хан маро́.”

³ И Ёв отпхэндя́ лэ́нгэ, ракири́: “Со́скэ ж тумэ́ на кандэ́на Дэвлэ́скирэ припхэныбэна́ пал пэ́скиро присыклякирибэн?

⁴ Палдова́ со Дэвэ́л ж пхэндя́: ‘Кутякир дадэ́с и да’, и, ‘Кон ракирэ́ла чорипэ́н пэ пэ́скирэ Дадэ́стэ и датэ, тэ мэрэ́л адава́ ману́ш.’

⁵ Нэ тумэ́ ракирэ́на: Ко́ли манушэ́стэ исын да́ро, саво́ ёв могинэлас тэ дэл дадэ́скэ ци да́кэ, тэды ёв на дэ́ла, нэ ёв ракирэ́ла: ‘Дава́ исын Дэвлэ́скиро’,

⁶ адасаво́ ману́ш на кутякирэла пэ́скирэ дадэ́с ци пэскирья́ да. Адя́кэ тумэ́ парудэ лав Дэвлэ́скиро пэ пэ́скиро присыклякирибэн.

⁷ Тумэ́ сан, дуемуитка! Шука́р ангилпхэндя пал тумэ́ндэ Исаё:

⁸ ‘Кадалэ́ мануша́ кутякирэна Ман уштэ́нца пэскирэнца, нэ ило́ лэ́нгиро исын дур Ма́ндыр;

⁹ нэ ивья́ (напра́снэс) клонинэнапэ Ма́нгэ, пал-дова́ со ёнэ сыклякирэ́на припхэныбэна́, со мануша́ придуминдлэ.’

Ису́со Пирипхэнэ́ла, Со́стыр Ману́ш Ячэ́лапэ Андра́л На́жужо Анги́л Дэвлэ́стэ

¹⁰ И кхардя́ Ёв манушэ́н кэ Пэ, и пхэндя́ лэ́нгэ: “Шунэ́н и ґалён:

¹¹ ‘На дова́, со заджа́ла дрэ манушэ́скирэ ушта́, кэрэ́ла Лэс магирдэса анги́л Дэвлэ́стэ, нэ дова́, со джа́ла яври́ лэ́стыр, акэ, исын, дава́, со кэрэ́ла Лэс магирдэса.”

¹² Тэ́ньци подгинэ́ сыкляибны́тка и ракирэ́на Лэ́скэ: “Ту на джинэ́са, со Фарисе́и, сыр шундлэ́ дава́ лав, мэкнэ́ тэ патя́н Ту́кэ?”

¹³ Ёв жа отпхэндя́: “Кажно раслина, сави́ Миро Болыбна́скиро Дад на чхудя́ дрэ пхув, явэ́ла рискирды корне́нца (рукхэ́нца).

¹⁴ Мэк лэн; ёнэ исын корорэ́ лыджаибна́скирэ. Ко́ли короро́ ману́ш лыджа́ла корорэс, дуйджинэ́ пэрэ́на дрэ ґанби́н (яма).”

¹⁵ Нэ Пэ́три отпхэндя́ Лэ́скэ: “Роспхэн амэ́нгэ, со дава́ приме́ро значынэ́ла”

¹⁶ Ёв жа пхэндя́: “Нау́што и тумэ́ адя́кэ-паць на ґалёна?

¹⁷ На ґалёна тумэ́, со саро́, со заджа́ла дро муй, джа́ла дурэды́р дро пэр и чхурдэлапэ яври́?

¹⁸ Нэ со джа́ла яври́ мо́стыр, дова́-паць джа́ла илэ́стыр, и кадава́ кэрэ́ла манушэ́с магирдэса.

¹⁹ Палдова́ со чорэ́ ду́мы, замарибэн, биладжаипэ́н, блэ́ндо, чорибэна, хохано́ допхэныбэ́н, калякирибэн.

²⁰ Кадава́ саро́ кэрэ́ла манушэ́с магирдэса анги́л Дэвлэ́стэ, нэ тэ хал намордэ вастэ́нца на кэрэ́ла манушэ́с магирдэса.”

Джувля́киро Патяибэ́н

²¹ И гия́ пэ́скэ Ису́со одотхы́р и дурия пэ Тироскирэ и Сидоноскирэ штэ́ты;

²² и, акэ, Хананеенгири джувлы́, сави́ сыс до-паць штэто́стыр, гия́ анги́л и задыя го́дла: “Потангинэ (пожалин) ман, Раё Дэ́вла, Чхаво́ Давидо́скиро, на́лачхо ду́хо (фа́но) древа́н рикирэ́ла зор пэ мирэ́ чхатэ.”

²³ Нэ Ёв нисо́ на отпхэндя́ ла́кэ. И Лэ́скирэ сыкляибны́тка подгинэ́ кэ Ёв и помангнэ Лэс: “Отмэк ла, пал-дова́ со ёй адя́кэ дэ́ла го́дла пал амэ́ндэ.”

²⁴ Нэ Ёв отпхэндя́: “Мэ сом бичхадо́ фэ́ни кэ хасибны́тка бакрэ́ Израилёскирэ кхэрэ́стыр.”

²⁵ Нэ ёй подги́я и поклониндяпэ Лэ́скэ и ракирдя́: “Раё Дэ́вла! Помогин ма́нгэ!”

²⁶ Нэ Ёв отпхэндя́: “Намишто тэ лэс маро́ чхаворэндыр и тэ чхурдэс джуклэнгэ.”

²⁷ Нэ ёй пхэндя́: “Чачо́, Раё Дэ́вла; нэ и джукэла ха́на крохэндыр, со пэрэ́на лэ́скирэ-хула́скирэ скаминдэстыр.”

²⁸ Тэ́ньци Ису́со отпхэндя́ ла́кэ: “Джувли́е, баро́ исын тыро́ патяибэ́н; мэк тэ явэ́л, сыр ту камэ́са.” И екха́тыр ла́кири чхай яця́ састы.

Ису́со Высастякирэ́ла Бутэ́ Манушэ́н

²⁹ И гии одотхы́р, Ису́со джа́лас пашы́л мо́рё (дэрья́в) Галилеякиро и гия́ упрэ́ пэ бэ́рга и бэсця́ одо́й;

³⁰ и бут мануша́ явнэ́ кэ Ёв, яндлэ́ пэ́са лангалэн, корорэн, калечнонэн, бичибитконэн и явирэ насвалэн, и чхудэ́ лэн тэлэ́ анги́л Исусо́скирэ ґэра́, и Ёв высастякирдя́ лэн;

³¹ адя́кэ, со мануша́ древа́н дивиндлэ́пэ, ке́ли дыкхнэ́, со бичибитка ракирэ́на, калеки састэ, лангалэ псирэ́на, и корорэ́ дыкхэ́на; и ёнэ славиндлэ Дэвлэ́с Израилёскирэс.

Ису́со Чалякирэ́ла Штар Тысёнцы Манушэ́н

³² И Ису́со кхардя́ кэ Пэ Лэскирэн сыкляибнытконэ́н и пхэндя́: “Ма́нгэ исын танго (жалко) адалэ́ манушэ́н: пал-дова́ со ужэ трин дывэса́ ёнэ ячэнаспэ Ма́нца, и нанэ нисо́ лэ́ндэ тэ хан, и Мэ на кама́м тэ мэкав Пэ́стыр лэн дро дром бокхалэнца, соб (кай) ёнэ тэ на здэн зорья́тыр дро дром.”

³³ И сыкляибны́тка ракирэ́на Лэ́скэ: “Кай тэ лас амэ́нгэ ада́кицы лабы маро́ пэ чхучи́ пхув, соб (кай) тэ чалякирас ада́кицы манушэ́н?”

³⁴ И пхэндя́ лэ́нгэ Ису́со: “Кицы́ лабы маро́ тумэ́ндэ исын?” И ёнэ пхэндлэ́: “Эфта́ (битринэ́нгиро дэш) и на́бут мачхорэ.”

³⁵ И припхэндя́ манушэ́нгэ тэ бэшэ́н пэ пхув;

³⁶ и лыя́ кадалэ́ эфта́ лабы маро́ и мачхорэ, и бахтякири парикирибнаса Дэвлэ́с, роспхагирдя́, и дэ́лас сыкляибнытконэ́нгэ, а сыкляибны́тка дынэ́ манушэ́нгэ.

³⁷ И ёнэ сарэ́ ханэ́, и чалынэ; и ёнэ скэдынэ́ котэра́, со ячнэ́пэ, эфта́ пхэрдэ́ корзи́ны (кхудэ́);

³⁸ и ханэ́ штар тысёнцы мурша́, апри́ч джувлендэ и биятэндэ.

³⁹ Тэ́ньци Ёв розмэкця манушэ́н, бэсця́ дрэ ба́рка и явдя́ пэ штэ́ты Магдалиноскирэ.