Матфеё 13 - Библия - Пэ Балтитко Романи чиб (Романэс) 2019

Приме́ро (Сыкаибэ́н) пал Сеиныбнаскирэ́стэ

¹ Дро дова́-паць дывэ́с Ису́со гия́ яври́ кхэрэ́стыр и сыс бэшто́ пашы́л мо́рё (дэрья́в).

² И скэдынэ́пэ пашы́л Лэ́стэ бут мануша́, палдава́ ёв гия́ андрэ́ ба́рка и сыс бэшто́, а сарэ́ мануша́ сыс тэрдэ́ пэ брэ́го.

³ И ракирдя́ лэ́нгэ бут сыкляибнытконэ примерэнца, ракири́: “Акэ, сеиныбнаскиро гия́ яври́ тэ чхувэ́л зя́рка дрэ пхув:

⁴ и, сыр ёв сеиндя, вари-савэ́ зя́рки пынэ́ пашы́л дром, и привурняндынэ чирикля́ и сханэ лэн;

⁵ нэ яви́р ж пынэ́ пэ барунэ́ штэ́ты, кай на сыс бут пхув, и екха́тыр (сра́зу) гинэ́ упрэ́, пал-дова́ со пхув на сыс хор,

⁶ а сыр уштыя́ кхам, шутькирдя лэн; пал-дова́ со, сыр на сыс лэ́ндэ ко́рни (рукха́), ёнэ зашутинэ;

⁷ нэ яви́р пынэ́ дрэ хру́сты сувьенца, и выбария чар и замардя́ лэн;

⁸ и яви́р пынэ́ пэ лачхи́ пхув, и дынэ́ прибарипэн дрэ шэл мо́лы, яви́р дрэ шовдэша́, и яви́р дрэ трия́нда.

⁹ Конэ́стэ исын кана́, мэк тэ шунэ́л.”

Саво́ Смы́сло исын дрэ далэ́ Приме́ры (Сыкаибэна́)?

¹⁰ Тэ́ньци сыкляибны́тка гинэ́ пашылэды́р и пхэндлэ́ Лэ́скэ: “Со́скэ Ту ракирэ́са лэ́нца примеренца (сыкаибнэнца)?”

¹¹ И Ёв отпхэнэ́лас лэ́нгэ: “Тумэ́нгэ исын дыно́ тэ джинэ́н гарадо́ чачипэ́н пал Кралипэ́н дро Болыбна́скиро Раё, а лэ́нгэ на дыно́;

¹² кодолэ́скэ, савэ́стэ исын, явэ́ла дыно́ и явэ́ла лэ́стэ бут бут, а конэ́стэ нанэ, кодолэстыр лэ́лапэ криг кодова́ на́бут, со исын лэ́стэ.

¹³ Палдава́ Мэ ракира́ва лэ́нца примерэнца (сыкаибэ́н), пал-дова́ со, сыр ёнэ дыкхи́, на дыкхэ́на, и шуны, на шунэ́на, и на ґалёна;

¹⁴ и сполнинэлапэ пэ лэ́ндэ ангилпхэныбэ́н Исаёскиро, саво́ ракирэ́ла: ‘Явэ́на тэ шунэ́н канэнца, и на ґалёна; тэ дыкхэ́н якхэ́нца, и на дыкхэ́на;

¹⁵ пал-дова́ со адалэ́ манушэ́нгиро ило́ кашталыя, и ёнэ шунэ́на фуес пэ́скирэ канэнца и якха́ пэ́скирэ закэрдэ, соб (кай) тэ на дыкхэ́н якхэ́нца, и тэ на шунэ́н канэнца, и тэ на ґалён илэ́са, и тэ на рисён кэ Мэ, соб (кай) Мэ тэ высастякирав лэн.’

¹⁶ Тумарэ́ ж якха́ исын бахталэ́, со дыкхэ́на, и кана́ тумарэ́, со шунэ́на,

¹⁷ Чачэс, Мэ ракира́ва тумэ́нгэ: бут проро́ки и чачунэ́ мануша́ камлэ́ древа́н тэ дыкхэ́н дова́, со тумэ́ дыкхэ́на, и на дыкхнэ́, и тэ шунэ́н дова́, со тумэ́ шунэ́на, и на шундлэ́.

Ису́со Пирипхэнэ́ла Приме́ро (Сыкаибэ́н) пал Сеиныбнаскирэ́стэ

¹⁸ Палдава́ шунэ́н, пал со исын кадава́ сыкаибэ́н (приме́ро) пал сеиныбнаскирэстэ.

¹⁹ Ке́ли вари-кон, кон шунэ́ла лав пал Дэвлэ́скиро Кралипэ́н, и на ґалёла, тэды явэ́ла на́лачхо и чорэла лэ́скирэ илэ́стыр кодова́, со сыс почхудо: кадасаво́ ману́ш исын сы́рбы зя́рка, сави́ сыс чхуды́ пашы́л дром.

²⁰ Нэ савэ́ сыс чхудэ́ пэ барунэ́ штэ́ты, сыкавэ́на манушэ́с, саво́ шунэ́ла лав, прилэ́ла лэс екха́тыр (сра́зу) дро ило́ радыма́са;

²¹ нэ сыр дава́ лав на заджа́ла хор дро ило́ и патяибэ́н исын кротко, тэды, ке́ли явэ́на мэ́ньки и традыпэн пал лав, екха́тыр ёв мэкэ́ла тэ патял.

²² Нэ савэ́ сыс чхудэ́ дрэ дылыны чар, сыкавэ́на кодолэ́с, саво́ шунэ́ла лав, нэ векоскири суе́та, тырдыпэ́н кэ барвалыпэ́н пиризорьякирэна дро лэ́нгиро ило́, и ёв ячэ́ла би барьякирдэскиро.

²³ Нэ савэ́ сыс чхудэ́ пэ лачхи́ пхув, сыкавэ́на манушэ́с, саво́ шунэ́ла лав и ґалёла лэс, ёнэ дэ́на барьякирдэскиро (плодоскиро) и прибарипэн екх дрэ шэл мо́лы, яви́р дрэ шовдэша́, нэ яви́р дрэ трия́нда мо́лы.”

Приме́ро (Сыкаибэ́н) пал Дылыны́ Чар

²⁴ Яви́р сыкляибны́тко сыкаибэ́н роспхэндя́ Ису́со манушэ́нгэ, ракири́: “Кралипэ́н дро Болыбна́скиро Раё исын сы́рбы ману́ш, саво́ чхудя́ лачхи́ зя́рка пэ пэ́скири фэ́лда.

²⁵ Ке́ли мануша́ сыс сутэ́, явдя́ вэ́рго и чхудя́ дылыны чар машки́р гив и гия́ криг.

²⁶ Нэ ке́ли лачхи́ зя́рка ўзгия и дыя́ прибарипэн, дылыны чар адя́кэ-паць сыкадыя́.

²⁷ И хула́скирэ писха́рья явнэ́ и пхэндлэ́ лэ́скэ: ‘Раё, ту ж чхудя́н лачхи́ зя́рка пэ фэ́лда? Каты́р лыяпэ дылыны чар?’

²⁸ И ёв отпхэндя́ лэ́нгэ: ‘Вэ́рго ману́ш кэрдя́ дава́.’ Лэ́скирэ писха́рья ракирна лэ́скэ: ‘Ко́ли камэ́са, амэ джа́са и выкэдаса лэн яври́.’

²⁹ Ёв раки́рла: ‘Над, соб (кай) тэ на вырискирэн кхэтанэ́ дылынэ́ чарьяса гив, сыр тумэ́ явэ́на тэ вырискирэн яври́ дылыны чар.

³⁰ Мэк тэ барьён кхэтанэ́ кэ счхиныбэн; и дро часо, сыр тэ счхинэн, мэ пхэна́ва жнецэнгэ: ‘Скэдэ́н англэды́р дылыны чар и пхандэн лэн дрэ пучки, соб (кай) тэ хачкирэ́н; а гив тэ скэдэ́н дрэ Мири́ шу́рна.’”

Приме́ро (Сыкаибэ́н) пал Гарчы́чно Зя́рка

³¹ Яви́р сыкляибны́тко сыкаибэ́н роспхэндя́ Ису́со лэ́нгэ, ракири́: “Кралипэ́н дро Болыбна́скиро Раё исын сы́рбы гарчычно зя́рка, сави́ ману́ш лыя́ и почхудя пэ пэ́скири фэ́лда,

³² ёй исын тыкнэды́р сарэ́ зяркэндыр, нэ ке́ли выбарьёла, ячэ́лапэ барэды́р сарэ́ явирэ хрустэндыр и ячэ́лапэ сыр кашт, адя́кэ со чирикля́ болыбны́тка кхувэна гня́зды (ку́фы) дрэ лэ́скирэ рандя́.”

Приме́ро (Сыкаибэ́н) пал Дро́жджы

³³ Яви́р сыкляибны́тко приме́ро роспхэндя́ лэ́нгэ Ису́со: “Кралипэ́н дро Болыбна́скиро Раё исын сы́рбы дрожджы (рожчына), савэ́ джувлы́ лыя́ и замешындя дрэ вядра (нэмра) яржэса, пака саро́ хумэр (цясто) яця́ шутло.”

³⁴ Акэ, саро́ Ису́со пхэндя́ манушэ́нгэ примерэнца (сыкаибнэнца); и нисо́ Ёв на ракирдя́ лэ́нгэ би примерэнгиро,

³⁵ соб (кай) тэ сполнинэ́лпэ, со сыс пхэндло́ пир пророкостэ: “Мэ откэрава ушта́ Мирэ́ дрэ примеры (сыкаибэна); выпхэнава дова́, со гарадо́ одолэ́стыр, сыр свэ́то сыс создыно́.”

Ису́со Пирипхэнэ́ла Приме́ро (Сыкаибэ́н) пал Дылыны́ Чар

³⁶ Тэ́ньци Ёв мэкця́ манушэ́н и гия́ дро кхэр. И подгинэ́ кэ Ёв сыкляибны́тка Лэ́скирэ и пхэндлэ́: “Пирипхэн амэ́нгэ приме́ро (сыкаибэ́н) пал дылыны чар пэ фэ́лда.”

³⁷ И Ёв пхэндя́ дро отпхэныбэ́н: “Кон сеинэла (чхувэ́ла) дрэ пхув лачхи́ зя́рка исын Чхаво́ Манушэ́скиро;

³⁸ фэ́лда исын свэ́то; лачхи́ зя́рка-дава́ исын чхавэ́ Кралипнаскирэ, кай хулаинэла Дэвэ́л; дылыны чар-дава́ исын чхавэ́ налачхэскирэ,

³⁹ вэ́рго, саво́ почхудя лэн-дава́ исын на́лачхо, счхиныбэн-дава́ значынэ́ла векоскиро ко́нцо (яго́ро), жнецы исын Янго́лы.

⁴⁰ Палдава́, сыр выкэдэна дылынэ́ чарья́ и схачкирэна яга́са, адя́кэ-паць явэ́ла дро векоскиро ко́нцо (яго́ро):

⁴¹ бичхавэ́ла Чхаво́ Манушэ́скиро Пэ́скирэ Янголэн, и скэдэ́на Лэ́скирэ Кралипнастыр саро́, со злыджала манушэ́н кэ грэ́хо, и сарэ́н, кон кэрэ́ла на пир Зако́но;

⁴² и чхурдэна лэн дро бов яга́са; одо́й явэ́ла роибэ́н и дандэнгири скрежыма.

⁴³ Тэ́ньци патяибнытка явэ́на тэ зяинэн сыр кхам дро лэ́скирэ Дадэ́скиро Кралипэ́н. Конэ́стэ исын кана́, мэк тэ шунэ́л.

Приме́ро (Сыкаибэ́н) пал Гарады́ Дро́гима

⁴⁴ Кралипэ́н дро Болыбна́скиро Раё исын сы́рбы дро́гима дро кучипэ́н, со исын гарады пэ фэ́лда, саво́ ману́ш, сыр латхя́, гарадя, и радыма́тыр джа́ла и саро́ бикнэла, со лэ́стэ исын, и кинэла кодоя фэ́лда.

Приме́ро (Сыкаибэ́н) пал Мути́н

⁴⁵ Ишчо Кралипэ́н дро Болыбна́скиро Раё исын сы́рбы ку́пцо (тылга́ри), саво́ родэлас древа́н гожа мутиня;

⁴⁶ и сыр латхя́ екх куч мутин (жэмчуго), гия́ и бикиндя саро́, со лэ́стэ исын и киндя ла.

Приме́ро (Сыкаибэ́н) пал Кхуды́

⁴⁷ Ишчо Кралипэ́н дро Болыбна́скиро Раё исын сы́рбы бари кхуды́ (сетка), со чхурдынэ́ дро мо́рё (дэрья́в) и сави́ скэдыя́ ра́зна мачхэ́,

⁴⁸ и сыр кхуды́ сыс пхэрды́, мануша́ тырдынэ яври́ ла пэ брэ́го и бэшнэ́, скэдыи лачхэ́ мачхэ́ дрэ пирья, а налачхэ́ чхурдынэ́ яври́.

⁴⁹ Адя́кэ-паць явэ́ла дро векоскиро ко́нцо (яго́ро): джа́на тэлэ́ Янго́лы и роскэдэна налачхэн патяибнытконэндыр,

⁵⁰ и чхурдэна лэн дро бов яга́са; одо́й явэ́ла роибэ́н и дандэнгири скрежыма.”

Нэвэ́ и Пхуранэ́ Чачипэна́

⁵¹ “Ци ґалынэ́ тумэ́ дава́ саро́?” Ёнэ пхэндлэ́ Лэ́скэ: “Адя́кэ, Раё.”

⁵² и Ёв пхэндя́ лэ́нгэ: “Палдава́ кажно лылвари́тко (кни́жнико), саво́ сыклыя пал Кралипэ́н дро Дэвлэ́скиро Раё, исын сы́рбы ману́ш, саво́ исын кхэрэ́скиро хула́й, кон лыджа́ла яври́ пэ́скирэ кучипнаскирэ пиралятыр саро́ нэво́ и пхурано́.”

Ису́со дро Назарето

⁵³ И исын адя́кэ: ке́ли кончындя Ису́со далэ́ примеры (сыкаибэна), Ёв гия́ пэ́скэ одотхы́р.

⁵⁴ И сыр Ёв явдя́ дро Пэ́скиро фо́ро, сыклякирдя́ лэн дрэ синагога адя́кэ, со ёнэ древа́н дивиндлэ́пэ, ракири́: “Каты́р адалэ́ манушэ́стэ исын дасаво годыпэ́н и зоралыпэ́н?

⁵⁵ На Ёв исын скаминдарискиро Чхаво́? На Лэ́скирэ Да кхарэ́на Мари́я, и пшалэ́н Лэскирэн Яково и Ёза и Си́моно и Юда?

⁵⁶ и пхэня́ Лэ́скирэ нанэ сарэ́ машки́р амэ́ндэ? Каты́р жа Лэ́стэ саро́ дава́?”

⁵⁷ И на патянас Лэ́скэ. Нэ Ису́со пхэндя́ лэ́нгэ: “Сарэ́ мануша́ кутякирэна пророко́с, фэ́ни на дро Лэ́скиро фо́ро и на дро лэ́скиро кхэр”

⁵⁸ И Ёв на кэрдя́ бут ди́вы одо́й, пал-дова́ со ёнэ на патяндынэ́ Лэ́скэ.