Матфеё 11 - Библия - Пэ Балтитко Романи чиб (Романэс) 2019

Иа́но Болдэипна́ри (Крести́телё) Бичхавэ́ла Пэ́скирэ Сыкляибнытконэ́н кэ Ису́со

¹ И сыс адя́кэ: ке́ли кончындя Ису́со тэ дэл упхэныбэна́ дэшудуенгэ Пэ́скирэ сыкляибнытконэ́нгэ, Ёв гия́ криг одотхы́р тэ сыклякирэ́л и тэ пхэнэ́л лав дрэ лэ́нгирэ (Галилеякирэ) фо́рья.

² Нэ ке́ли Иа́но шундя́ дро штарибэ́н пал Исусо́скири буты́, ёв бичхадя́ лав пэ́скирэ сыкляибнытконэ́нца

³ тэ пхэнэ́л Лэ́скэ: “Ту сан Кодова́, Савэ́скэ трэй тэ явэ́л, ци явирэ́с амэ́нгэ тэ ужакирас?”

⁴ И отпхэндя́ лэ́нгэ Ису́со, ракири́ “Джа́н и пирипхэнэн Ианоскэ, со тумэ́ дыкхнэ́ и шундлэ́.

⁵ Корорэ́ мануша́ дыкхэ́на нэвэ́стыр и лангалэ псирэ́на; проказытка ячэ́на жужэ́, и кашукэ мануша́ шунэ́на, мулэ́ отджидёна, и богэнгэ пхэнэ́лапэ бахталы́ зан (звесь);

⁶ бахтало́ сыс кодова́, кон на хасякирэ́ла патяибэ́н дрэ Ма́ндэ.

⁷ А ке́ли ёнэ гинэ́ пэ́скэ, Ису́со лыя́ тэ ракирэ́л манушэ́нгэ пал Ианостэ: “Со псирдэ́ тумэ́ тэ дыкхэ́н пэ чхучи́ пхув? Сыр тришчынытко кашт (дрэ́во) тринскирлапэ балвалятыр?

⁸ Со тумэ́ псирдэ́ одори́к тэ дыкхэ́н? Манушэ́с, саво́ сыс уридо́ дрэ шука́р и́дя? Над; мануша́, савэ́ уридэ́ дрэ шука́р и́дя, дживэ́на дрэ кралитка фэлатиня́ (колова́).

⁹ Нэ, со ж тумэ́ псирдэ́ тэ дыкхэ́н? Пророко́с? Чачо́, Мэ ракира́ва тумэ́нгэ: ёв исын барэды́р пророкостыр:

¹⁰ дава́ исын кодова́, пал савэ́стэ исын чхиндло́: ‘Акэ, Мэ бичхава́ва Мирэ́ выкэдынэ́ Манушэ́с анги́л Ту́тэ, Саво́ кэрэ́ла дром Тыро́ анги́л Ту́тэ.’

¹¹ Чачэс, Мэ ракира́ва тумэ́нгэ: нанэ барэды́р Иано́стыр Болдэипнаристыр машки́р одолэ́ндэ, савэ́н джувля́ биянэна, нэ най тыкнэды́р дро Болыбна́скиро Раё исын барэды́р Иано́стыр.

¹² Ианоскирэ Болдэипнарискирэ дывэсэ́ндыр кэ/жы́ко какана́ Кралипэ́н дро Болыбна́скиро Раё зорья́са лэ́лапэ, нарта (упорна) мануша́ лэ́на лэс зорья́са.

¹³ Пал-дова́ со сарэ́ проро́ки и Зако́но ангилпхэнэнас анги́л Ианостэ.

¹⁴ И ко́ли тумэ́ закамэна тэ прилэ́н лэс, Иа́но исын сы́рбы Или́я, савэ́скэ трэиндя́ тэ явэ́л.

¹⁵ Конэ́стэ исын кана́, мэк тэ шунэ́л.

¹⁶ Со Мэ тэ пхэна́в, савэ́ кадалэ́ мануша́ исын? Ёнэ исын сы́рбы чхаворэ́, савэ́ исын бэштэ́ пашы́л тарги и ке́ли дэ́на го́дла машки́р пэ́стэ,

¹⁷ то ёнэ ракирэ́на: ‘Амэ башадям тумэ́нгэ пэ свиролька, тумэ́ на кхэлдэ; амэ багандям роибнытка гиля́, а тумэ́ на рундлэ.’

¹⁸ И Иа́но явдя́, на ха́ла, на пьела, и ёнэ ракирэ́на: ‘Лэ́стэ исын на́лачхо ду́хо (фа́но).’

¹⁹ Явдя́ и Чхаво́ Манушэ́скиро, ха́ла, и пьела, и ёнэ ракирэ́на: ‘Дава́ исын ману́ш, савэ́скэ исын пир ило́ тэ хал, тэ пьел, исын дру́го (мал) мытоскирэ скэдыибнарьенгэ и грэхэнгирэнгэ.’ Нэ Дэвлэ́скиро годьварипэн сыкавэ́ла пэ́скиро чачипэ́н манушэ́нгирэ рэндэ́нца (делэнца), савэ́ прилэ́на дава́ чачипэ́н.”

Фо́рья, Кай на Патяндынэ́ Исусо́скэ

²⁰ Тэ́ньци Ёв лыя́ тэ ладжакирэл фо́рья, дрэ савэ́ Ёв кэрдя́ буты́р явирэндыр Пэ́скирэ ди́вы, пал-дова́ со ёнэ на рискирдэ́ пэ́скиро джиибэ́н кэ Дэвэ́л:

²¹ “Бида ту́кэ, Хоразино! Бида ту́кэ, Вифсаида! Пал-дова́ со, ко́ли дасавэ́ ди́вы, со сыс кэрдэ́ дрэ тумэ́ндэ, тэ явэ́н кэрдэ́ дрэ Ти́ро и Сидоно, ёнэ ґара́ рискирэнас пэ́скиро джиибэ́н кэ Дэвэ́л дро урибэ́н балытконэ гонэстыр и дро пепло.

²² Нэ Мэ пхэна́ва тумэ́нгэ, со явэ́ла локхэды́р дро сэндоскиро дывэ́с Тироскэ и Сидоноскэ, сыр явэ́ла тумэ́нгэ.

²³ И ту, Капернаумо, кэ болыбэ́н ґаздэсапэ? Дро лю́но (адо) ту явэ́са чхурдыно́ тэлэ́: пал-дова́ со, ко́ли дасавэ́ ди́вы тэ явэ́н кэрдэ́ дро Содо́мо, сыр дрэ ту́тэ, ёв ячэласпэ кэ ададывэ́с.

²⁴ Мэ ракира́ва тумэ́нгэ, со явэ́ла локхэды́р дро сэндоскирэ дывэ́с Содомоскэ, сыр ту́кэ.”

Ису́со Кхарэ́ла Манушэ́н кэ Пэ тэ Откхинён

²⁵ Дро до-паць часо, ке́ли Ису́со отпхэнэ́лас лэ́нгэ, пхэндя́ Ёв дурэды́р: “Мэ славинава Тут, Да́до, Рай Дэвэ́л Болыбна́скиро и пхувья́киро, со Ту ґарадян дава́ годьварэндыр и барэ́-годякирэндыр, и откэрдян дава́ бияторэнгэ;

²⁶ Чачо́, Да́до, пал-дова́ со сыс адя́кэ, сыр Ту́кэ трэиндя́.

²⁷ Саро́ джиныбэ́н пал Пэ́стэ Дад Миро дыя́ Ма́нгэ, и нико́н сарэ́са на джинэ́ла Чхавэ́с апри́ч Дадэ́стэ и нико́н на джинэ́ла Дадэ́с апри́ч Чхавэ́стэ, и Ёв выкэдэ́ла одолэ́с, конэ́скэ Чхаво́ камэ́ла тэ откэрэл Дадэ́с.

²⁸ Явэ́н кэ мэ сарэ́, савэ́ кхинынэ пхарэ́ бутя́тыр и пхарипнастыр, – и Мэ да́ва откхиныбэн тумэ́нгэ.

²⁹ Лэн пэ пэ́стэ пхарипэ́н Мирэ́ джиибна́скиро и сыклён Ма́ндыр, пал-дова́ со Мэ сом ковлэ́-илытко и кандуно, и тумэ́ латхэ́на откхиныбэн ваш тумаро́ ило́;

³⁰ пал-дова́ со Миро джиибна́скиро пхарипэ́н локхэс тэ лыджа́н.”