Матфеё 10 - Библия - Пэ Балтитко Романи чиб (Романэс) 2019

Дэшуду́й Апо́столы

¹ И ке́ли Ису́со кхардя́ дэшудуен сыкляибнытконэ́н кэ Пэ, Ёв дыя́ лэ́нгэ зор пэ налачхэ́ ду́хи, соб (кай) тэ традэ́н яври́ лэн манушэ́ндыр и састякирэн кажно насвалыпэн и дукх.

² Акэ, дэшудуенгирэ – Апостолэнгирэ лава́: пэ́рво Си́моно, савэ́с кхардэ́ Пэ́три, и Ендри (Андреё), пшал лэ́скиро, Заведеёскиро Яково, и Иа́но, пшал лэ́скиро.

³ Филипо и Варфаламеё; Тамашо и Матфеё, мытоскиро скэдыибнари, Алфеёскиро Яково и Фадеё,

⁴ Си́моно Кананито и Юда Искариото, саво́ здыя Лэс.

Дэшуду́й Сыкляибны́тка Кэрэ́на Исусо́скири Буты́

⁵ Ису́со бичхадя́ адалэн дэшудуен и дыя́ лэ́нгэ строга упхэныбэна́: “На заджа́н дрэ штэ́ты, кай На́юды дживэ́на, на заджа́н дро Самаритянэнгиро фо́ро;

⁶ а джа́н фэды́р кэ мануша́ Израилёскирэ кхэрэ́стыр, савэ́ исын хасякирдэ́ сыр бакрэ́.

⁷ И ке́ли тумэ́ заджа́на, пхэнэ́н лав пал Дэвлэ́стэ, ракири́: ‘Явдя́ пашылэды́р Кралипэ́н дро Болыбна́скиро Раё, Савэ́са хулаинэла Дэвэ́л.’

⁸ Састякирэн насвалэн, жужакирэн проказытконэн, отджиджякирэн мулэн, традэ́н яври́ налачхэ́ ду́хи (фаны); би ловэнгиро дорэснэ́, би ловэнгиро отдэ́н.

⁹ На лэн пэ́са ни сувнака́й, ни руп, ни харко́ма (медь) дрэ кисыка пэ кусты́к,

¹⁰ ни саква (сумка) пэ дром, ни дуй ґа́да, ни ґэритка, ни дэсто́. Пал-дова́ со бутярно исын мол тэ хал.

¹¹ И дро вари-саво́ фо́ро ци гав тумэ́ тэ на заджа́н, уджинэ́н, кон исын патывало ману́ш дро дава́ фо́ро, и ячэ́нпэ одо́й анги́л, сыр тэ джа́н.

¹² И сыр заджа́на дро кхэр, пхэнэ́н ‘рама́нё’ (миро) манушэ́скэ, ракири́: ‘Тэ явэ́л рама́нё тумарэ́ кхэрэ́скэ’;

¹³ и ко́ли тумэн лачхэ́с прилэ́на дро дава́ кхэр, мэк рама́нё (миро), со тумэ́ мангнэ́ Дэвлэ́стыр, тэ ячэ́лпэ дро кхэр; ко́ли над, мэк тумаро́ лав мангипнаса Дэвлэ́скэ тэ рисёл палэ кэ тумэ́.

¹⁴ Нэ кон на прилэ́ла тумэн и на шунэ́ла лав тумаро́, триинскирэн пыло тумарэ́ ґэрэндыр, сыр явэ́на тэ джа́н яври́ кхэрэ́стыр ци форо́стыр.

¹⁵ Чачэс, Мэ ракира́ва тумэ́нгэ: локхэды́р явэ́ла манушэ́нгэ Содомостыр и Гомора́тыр дро дывэ́с, ке́ли Дэвэ́л явэ́ла тэ сэндинэл, сыр кадалэ́ фороскэ.

Мануша́ Явэ́на тэ Традэ́н Апостолэ́н

¹⁶ Акэ, Мэ бичхава́ва тумэн сыр бакрэ́н машки́р рувэндэ; явэ́н годьварэ́ сыр сапа, и бибангипнаскирэ сыр голумбы.

¹⁷ Нэ ракхэ́нпэ манушэ́ндыр: пал-дова́ со явэ́на тэ здэн тумэн пэ сэ́ндо, и явэ́на тэ марэ́н тумэн чупняса дрэ лэ́нгирэ синагоги;

¹⁸ и тырдэна тумэн кэ тхэмэ́скирэ барыдыра́ и кэ кра́лья пал Миро лав, соб (кай) тэ допхэнэн пал Ма́ндэ лэ́нгэ и Наюдэ́нгэ.

¹⁹ Нэ сыр ёнэ здэна тумэн, на пиридживэн, сыр и со тэ пхэнэ́н тумэ́нгэ: пал-дова́ со явэ́ла дыно́ тумэ́нгэ, со тэ пхэнэ́н дрэ дова́-паць мардо́ (шту́нда);

²⁰ пал-дова́ со дава́ на тумэ́ явэ́на тэ ракирэ́н, нэ тумаро́ Болыбна́скирэ-Дадэ́скиро Ду́хо (Фа́но) явэ́ла тэ ракирэ́л дрэ тумэ́ндэ.

²¹ И пшал здэла пшалэ́с пэ мэрибэ́н, и дад пэ́скирэ чхавэ́с; и чхавэ́ ґаздэ́напэ пэ дадэндэ и мулякирэна лэн.

²² И сарэ́ мануша́ явэ́на тэ на сыкавэ́н паты́в тумэ́нгэ пал лав Миро, нэ кон явэ́ла тэ тэрдёл твардэс кэ ко́нцо (кэ яго́ро), кодова́ зракхэ́лапэ.

²³ И ке́ли явэ́на тэ традэ́н тумэн дро екх фо́ро, нашэ́н дро яви́р; пал-дова́ со Мэ, чачэс, ракира́ва тумэ́нгэ: на кончынэна тумэ́ тэ обджан сарэ́ фо́рья Израилёскирэ, сыр явэ́ла Чхаво́ Манушэ́скиро.

²⁴ Сыкляибны́тко (учэнико) исын на барэды́р сыклякирибнаристыр, писха́ри (ра́бо) на барэды́р пэ́скирэ ра́стыр.

²⁵ Ухты́лла (до́си) ваш сыкляибнытконэскэ, соб (кай) ёв тэ явэ́л дасаво, сыр лэ́скиро сыклякирибна́скиро (учытелё), и писха́ри дасаво, сыр лэ́скиро рай. Ко́ли сэмякирэ хула́с прокхардэ Вельзэвуло, сыр бутэды́р налачхэ́ лавэ́нца кхарна хула́скирэ кхэритконэн?’

Дарэ́н Екхэ́ Дэвлэ́стыр

²⁶ На андыршан кадалэ́ манушэ́ндыр: пал-дова́ со нанэ нисо́ чорахано, соб (кай) тэ явэ́л гарадо́, и гарадо́, соб (кай) тэ на явэ́л джиндло́.

²⁷ Со Мэ пхэна́ва тумэ́нгэ екх пэ екх, ракирэ́н сарэ́нгэ, и со тумэ́нгэ мануша́ пхэнэ́на пэ кан, пхэнэ́н пэ кхэри́тко бэ́рга.

²⁸ На андыршан кодолэндыр, савэ́ мулякирна маса́, нэ савэ́ на могинэ́на тэ мулякирэ́н тумаро́ ду́хо (фа́но); нэ дарэ́н кодолэндыр, савэ́ могинэ́на тэ мулякирэ́н и ду́хо (фа́но) и маса́ дро лю́но (адо).

²⁹ Ци на дуй шпаки (вороб΄и) бикнэнапэ пал екх асариё? И ни екх лэ́ндыр на пэрэ́ла пэ пхув би волякиро тумарэ́ Дадэ́скиро.

³⁰ Тумэ́ндэ аж и бала́ пэ шэро́ сарэ́ гиндлэ́.

³¹ На андыршан жа: тумэ́ сан бут мо́лы кучэдыр, сыр кадалэ́ бут шпаки.

Кон исын пал Христосо́стэ, и Кон исын пэ Лэ́стэ

³² Палдава́ кажнонэс, кон приґалёла Ман и роспхэнэ́ла пал Ма́ндэ анги́л манушэ́ндэ, кодолэ́с Мэ приґалёвава анги́л Мирэ́ Дадэ́стэ, Саво́ исын дро Болыбна́скиро Раё;

³³ и вари-савэ́стыр, кон отпхэнэлапэ Ма́ндыр анги́л манушэ́ндэ, кодолэстыр Мэ адя́кэ-паць отпхэнавапэ анги́л Мирэ́ Дадэ́стэ, Саво́ исын дро Болыбна́скиро Раё.

Ису́со Янэ́ла на Рама́нё (Миро), а Марибэ́н

³⁴ На думинэн, со Мэ яндём рама́нё (миро) пэ пхув; Мэ явдём тэ янав на ‘рама́нё’, а марибэ́н.

³⁵ Пал-дова́, со Мэ явдём тэ дурьякирав манушэ́с лэ́скирэ дадэ́стыр, и чха ла́кирэ датыр, и борья сасятыр,

³⁶ манушэ́скирэ вэ́рги исын кодолэ́, савэ́ исын лэ́скирэ кхэрэ́стыр.

³⁷ Конэ́скэ исын дро́го лэ́скиро дад ци буты́р, сыр Мэ, кодова́ исын на́лачхо Ма́нгэ, и кодова́, савэ́скэ исын дро́го чхаво́ ци чхай буты́р, сыр Мэ, кодова́ исын на́лачхо Ма́нгэ,

³⁸ и вари-кон, кон на лэ́ла трушу́л пэ́скиро и на джа́ла Ма́нца, кодова́ исын на́лачхо Ма́нгэ,

³⁹ и вари-кон, кон ракхэ́ла пэ́скиро джиибэ́н, кодова́ хасякирэ́ла лэс; и вари-кон, кон мэрэ́ла пал Ма́ндэ, дорэсэ́ла ве́чно джиибэ́н.

Дэвлэ́скиро Отдыибэ́н пал Лачхо́ Прилыибэн

⁴⁰ И вари-кон, кон прилэ́ла тумэн, хай, Ман прилэ́ла, и ёв, саво́ прилэ́ла Ман, прилэ́ла Кодолэ́с, Саво́ бичхадя́ Ман.

⁴¹ И вари-кон, кон прилэ́ла пророко́с сыр пророко́с, кодова́ дорэсэ́ла (долэла) отдыибэ́н сыр проро́ко и вари-кон, кон прилэ́ла патяибнытконэ манушэ́с сыр патяибнытконэс, кодова́ дорэсэ́ла отдыибэ́н сыр патяибны́тко ману́ш.

⁴² И вари-кон, кон дэ́ла хоць тахта́й (чаша) шылало пани́ екхэ́скэ адалэ́ тыкнэндыр сыр сыкляибнытконэскэ, чачэс, Мэ ракира́ва тумэ́нгэ: ёв на хасякирэ́ла пэ́скиро отдыибэ́н.”