Marko 7 - Библия - Пэ Балтитко Романи чиб (Романэс) 2019

Ѓаратуно́ Юды́тко Сыкляибэ́н пал Жужо́ и На́жужо

¹ Екхвар явнэ́ Фарисе́и и вари-савэ́ лылваритконэндыр, савэ́ явнэ́ Ерусалимо́стыр, и скэдынэ́пэ пашы́л Лэ́стэ.

² И дыкхнэ́, со вари-савэ́ Лэ́скирэ сыкляибны́тка ха́на “мэлалэ вастэ́нца”, со значынэ́ла, “на мо́ри васта́.”

³ Рэ́ндо (де́ло) дро дова́, со сарэ́ Фарисе́и и сарэ́ Юды пририкирэнпэ кэ пхурэнгирэ-шэралэнгирэ присыкляибэна: ёнэ на бэшэна тэ хан, пака на выморна васта́,

⁴ и ке́ли ёнэ явэ́на таргостыр, ёнэ на бэшэна тэ хан, пака на выморэна васта́; сыс и бут яви́р припхэныбэна́ тэ ракхэ́н: тэ морэн тахтая́ (чашы), мусэра (стаканы) и харкунэ́ (меди́тка) пирья;

⁵ палдова́ Фарисе́и и лылвари́тка пхучнэ́ Исусо́стыр: “Со́скэ Тырэ́ сыкляибны́тка на кэрэ́на пир ґаратунэ́-манушэ́нгирэ присыкляибэна? Со́скэ ёнэ ха́на маро́ намордэ вастэ́нца?”

⁶ И Ёв пхэндя́ лэ́нгэ: “Чачипэ́н пхэндя́ проро́ко Исаё, сыр ёв ракирдя́ пал тумэ́ндэ, дуемуитконэндэ: ‘Адалэ́ мануша́ кутякирэна ман пэ лава́, а чачунэ́с илэ лэ́нгирэ исын дур Ма́ндыр;

⁷ лэ́нгиро кутякирибэн Ма́нгэ нисо́ на мол. Ёнэ сыклякирэ́на дова́, со мануша́ придуминдлэ.’”

⁸ Тумэ́ ячкирдэ́ припхэныбэна́ Дэвлэ́скирэ и кэрэ́на фэ́ни (то́ка) пир манушы́тка присыкляибэна.

⁹ Тумэ́ шука́р могинэ́на тэ отпарувэн Дэвлэ́скирэ припхэныбэна́ пэ пэ́скирэ присыкляибэна”, – ракирдя́ Ису́со.

¹⁰ Мо́йза ж пхэндя́: “Кутякир дадэ́с пэ́скирэс и пэскирья́ да”, и, “Кон ракирэ́ла нашукар пэ дадэ́стэ пэскирэстэ ци датэ, тэ мэрэ́л адава́ ману́ш.

¹¹ Нэ тумэ́ сыклякирэ́на, со ко́ли манушэ́стэ исын вари-со тэ помогинэл лэ́скирэ да́кэ ци дадэ́скэ и ёв пхэнэ́ла: ‘Дава́ исын Корбано (дава́ значынэ́ла, со дава́ исын да́ро Дэвлэ́скэ)’,

¹² тэды тумэ́ далэ́са самонэса сыклякирэ́на манушэ́н тэ на кэрэ́н буты́р нисо́ ваш пэ́скирэ дадэ́нгэ,

¹³ тумэ́ отпарувэна далэ́са Дэвлэ́скиро лав пэ́скирэ присыкляибнэнца , и дасавэ́ примеры (сыкаибэна) сашты́ тэ явэ́н тэ дав бут.”

¹⁴ И Ису́со нэвэ́стыр кхардя́ кэ Пэ манушэ́н и пхэндя́: “Шунэ́н Ман и сарэ́ причхувэ́н зор тэ ґалён:

¹⁵ Нисо́ далэ́стыр, со джа́ла андрэ́ яврэстыр дрэ манушэ́стэ, на могинэ́ла тэ кэрэ́л манушэ́с нажужэса; нажужэса манушэ́с бутэды́р кэрэ́ла дова́, со джа́ла яври́ лэ́стыр.”

¹⁶ [Конэ́стэ исын кана́, мэк тэ шунэ́л!-ю.о.]

¹⁷ И ке́ли Ёв мэкця́ лэн и гия́ дро кхэр, Лэ́скирэ сыкляибны́тка пхучнэ́ Лэ́стыр пал приме́ро (сыкаибэ́н).

¹⁸ И Ёв пхэндя́ лэ́нгэ: “Нау́што и тумэ́ ишчо (инкэ́) на ґалёна? Нисо́, со джа́ла андрэ́ яврестыр дрэ манушэ́стэ, на могинэ́ла тэ кэрэ́л лэс нажужэса,

¹⁹ пал-дова́ со, дава́ джа́ла андрэ́ на дро ило́ Манушэ́скиро, а дрэ лэ́скиро кужум и джа́ла яври́ лэ́стыр.” (Далэ́ лавэ́нца Ису́со ракирэ́ла, со кажно хабэ́н исын жужо́).

²⁰ И Ёв ракирдя́: “Дова́, со выджа́ла манушэ́стыр, кодова́ кэрэ́ла манушэ́с нажужэса;

²¹ пал-дова́ со манушэ́скирэ илэ́стыр выджа́на налачхэ́ ду́мы, напатяибэн дрэ сэ́м΄я (ири́), чорибэн, замарибэн,

²² блэ́ндо, сквапныма, фротыма, холы́, ладжавэ рэ́нды, якхало, пхутькирибэ́н, дылныпэ́н.

²³ Саро́ дава́ фуипэ́н джа́ла яври́ манушэ́стыр, и кэрэ́ла лэс мэлалэса.”

Джувля́киро Патяибэ́н

²⁴ И уштыи, Ису́со гия́ одотхы́р дрэ Тироноскирэ штэ́ты. И ке́ли загия́ Ёв дро кхэр, Ёв на мыслйндя дро ило́, соб (кай) вари-кон тэ джинэ́л, со Ёв одо́й сыс; нэ Ёв на могиндя́ тэ ґарадёл.

²⁵ Мавлы́н (малва), со явдя́ Ису́со, розгия́пэ сы́гэс, и кэ Ёв явдя́ джувлы́, савьякирэ чхатэ сыс на́лачхо ду́хо (фа́но). Ёй явдя́ и пыя́ кэ Лэ́скирэ ґэра́;

²⁶ ада́я джувлы́ сыс гречанка (баламица) Сирофиниянкакирэ родо́стыр и яця́ тэ мангэ́л Исусо́с тэ вытрадэл на́лачхо ду́хо (фа́но) чхатыр.

²⁷ И Ёв ракирдя́ ла́кэ: “Мэк англэды́р тэ чалякирэн чалэ́с биятэ́н, пал-дова́ со на шука́р тэ лас криг маро́ биятэндыр и тэ чхурдас джуклэнгэ.”

²⁸ Нэ ёй отпхэндя́ и пхэндя́ Лэ́скэ: “Чачо́, Раё Дэ́вла, нэ и джукэла тэл сками́нд ха́на биятэнгирэ котэра́, со бияты мэкэ́на.”

²⁹ И Ёв пхэндя́ ла́кэ: “Пал дава́ лав, джа́; выгия́ на́лачхо ду́хо (фа́но) тырэ́ чхатыр.”

³⁰ Ёй рисия́ кхэрэ́, и чхай ла́кири сыс пашты дро чхуибэ́н, на́лачхо ду́хо (фа́но) выгия́ ла́тыр.

Ису́со Састякирдя́ Кашукэ́с

³¹ И нэвэ́стыр Ису́со выгия́ Тироноскирэ штэтэ́ндыр пирда́л Сидоно кэ Галилеякиро мо́рё (дэрья́в) пэ Дэшуфорьенгири пхув.

³² Одо́й кэ Ису́со яндлэ́ кашукэс и, саво́ ракирэ́лас пхарэ́с и мангнэ́ Лэс тэ чхувэ́л васта́ пэ лэ́стэ.

³³ Ису́со лыджия́ лэс дрэ риг, чхудя́ андрэ́ пэ́скирэ ангушта (пальцы) лэ́скэ дрэ кана́. Тэ́ньци Ёв чунгардыя и чиладя́ лэ́скири чиб,

³⁴ и ґаздыя́ ёв якха́ кэ болыбэ́н, пхарэ́с дыя́ ґондя́ (дыкхниндя дрэ пэ́стэ) и пхэндя́ манушэ́скэ: “Еффата!” (Со значынэ́ла: “Откэрпэ”).

³⁵ И лэ́скирэ кана́ откэрдэпэ, и лэ́скири чиб лыя́ шука́р и яснэс тэ ракирэ́л.

³⁶ Ису́со припхэндя́ лэ́нгэ тэ на роспхэнэ́н пал дава́ никонэ́скэ. Нэ, со буты́р Ёв припхэнэлас, адя́кэ ёнэ буты́р розлыджанас мавлы́н.

³⁷ И ёнэ зоралэ́с дивиндлэ́пэ и ракирдэ́: “Саро́ шука́р, со Ёв кэрдя́, Ёв аж кашукэн и бичибитконэн высастякирдя́.”