Marko 6 - Библия - Пэ Балтитко Романи чиб (Романэс) 2019

Джиибна́рья Назарето́стыр на́ Прилэ́на Исусо́с

¹ И Ису́со гия́ одотхы́р и явдя́ палэ дро пэ́скиро фо́ро, каты́р Ёв сыс родоса; и Лэ́скирэ сыкляибны́тка гинэ́ пал Лэ́стэ.

² Ке́ли явдя́ са́вато (субо́та), Ёв лыя́ тэ сыклякирэ́л дрэ синагога; сарэ́ шундлэ́ Лэс и дивиндлэ́пэ: “Каты́р Лэ́стэ саро́ дава́ исын? Каты́р исын дасави́ бари годы́? Сыр Ёв кэрэ́ла дасавэ́ ди́вы Пэ́скирэ вастэ́нца!

³ Ци дава́ на Ёв исын скаминда́ри, Марьякиро чхаво́, а пша́ла Лэ́стэ Яково, Ёза, Юда и Си́моно? И пхэня́ Лэ́скирэ исын ада́й.” Дава́ холякирдя лэн.

⁴ И Ису́со пхэндя́ лэ́нгэ: “Мануша́ кутякирэна (патывакирэна) пророкэ́н на пэ пэ́скири пхув, дро пэ́скиро кхэр и машки́р пэ́скирэ сэмэнцэндэ”

⁵ На Ёв на могиндя́ тэ кэрэ́л одо́й барэ́ ди́вы пал лэ́нгиро напатяибэн, на гины на́бут насвалэн, пэ савэ́ндэ Ёв чхувэлас упрэ́ васта́ и высастякирдя́ лэн.

⁶ Ёв дивиндяпэ долэ́стыр, со дрэ лэ́ндэ нанэ патяибэ́н. И Ёв яця́ тэ псирэ́л пир пашатунэ́ гава́ тэ сыклякирэ́л.

Ису́со Бичхавэ́ла Дэшудуе́н Апостолэ́н

⁷ Ёв кхардя́ кхэтанэ́ Дэшудуен сыкляибнытконэ́н и бичхадя́ лэн пир дуендэ; дыи лэ́нгэ зор тэ традэ́н яври́ налачхэ́ ду́хи;

⁸ и дыя́ лэ́нгэ, акэ, саво́ припхэныбэ́н: “На лэн пэ́са нисо́, апри́ч дэсто́; ни хабэ́н, ни гоно́, ни ловэ́ пал кусты́к,

⁹ а тэ урьен цуру́ли (цэндали), и на лэн пэ́са дуй гада.

¹⁰ И Ёв ракирдя́ дурэды́р лэ́нгэ: “Карик тумэ́ тэ на заджанас дро кхэр, ячэ́нпэ одо́й, пака тумэ́ джа́на криг долэ́ форо́стыр;

¹¹ и ко́ли тумэн на прилэ́на, ци на закамэна тэ шунэ́н, тэды джа́н яври́, стринскирэн бла́та тумарэ́ ґэрэндыр сыр допхэныбэ́н ваш лэ́нгэ.”

¹² И ёнэ гинэ́ и ячнэ́ тэ пхэнэ́н лав манушэ́нгэ пал рисибэн грэхэ́ндыр кэ Дэвэ́л.

¹³ И ёнэ традэнас яври налачхэ́ ду́хи и састякирэнас бутэ́ насвалэн, чхуви оливи́тко дзэт пэ лэ́ндэ.

Иано́скирэ-Болдэипнари́скиро Мэрибэ́н

¹⁴ И шундя́ кра́ли Иродо пал дава́, пал-дова́ со Исусо́скиро лав яця́ джиндло́; и мануша́ ракирдэ́: “Иа́но Болдэипнари отджидыя́ мулэ́ндыр, и палдава́ лэ́стэ исын дасави́ зор.

¹⁵ А яви́р ракирдэ́; “Дава́ исын Или́я.” А трита ракирдэ́: “Адава́ исын екх ґаратунэ́ пророкэндыр.”

¹⁶ Ке́ли Иродо шундя́ далэ́ ракирибэна, ёв пхэндя́: “Иа́но, савэ́скэ мэ отчингирдём шэро́, отджидыя́ мулэ́ндыр.”

¹⁷ Пал-дова́ со Иродо кокоро́ припхэндя́ тэ лэн Ианос и тэ чхувэ́н лэс дро штарибэ́н пал Иродиадатэ, лэ́скирэ-пшалэ́скирэ Филипоскирэ ромня́тэ, конэ́с ёв лыя́ палоро́м.

¹⁸ Пал-дова́ со Иа́но ракирдя́ Иродоскэ: “Ту́кэ нашты́ тэ лэспэ пэ́скирэ-пшалэ́скирэ ромня́са.”

¹⁹ Иродиада рикирдя холы́ пэ Ианостэ и родэлас саштыпэн (возможность) тэ хасякирэ́л лэс, нэ ёй на могиндя́,

²⁰ пал-дова́ со Иродо дардяпэ Иано́стыр и ракхэлас лэс; Иродо джиндя́, со Иа́но сыс чачуно́ и свэ́нто ману́ш; бут далэ́стыр, со ракирдя́ Иа́но, зачхувэлас Иродос тэ задуминэлпэ, и Иродо усае́кх мангдя́ тэ шунэ́л лэс.

²¹ Нэ сыг, акэ, дасаво дывэ́с явдя́, ке́ли Иродостэ сыс бияныпнытко дывэ́с, ёв кхардя́ пэ свэ́нко пэ́скирэ барвалэ́ пашатунэ́ ран, тысёнцэнгирэ-халадытконэ барыдырэ́н и самонэ патывалэ́ манушэ́н дрэ Галиле́я,

²² тэды Иродиадакири чхай загия́ и адя́кэ кхэлдя, со кокоро́ Иродо и лэ́скирэ гости явнэ́ дрэ бари ра́дыма; и кра́ли пхэндя́ раклорьякэ: “Пхуч, со ту́кэ исын пир ило́? Саро́ ту́кэ мэ да́ва!”

²³ И ёв совлахадя́ ла́кэ: “Манг ма́ндыр дова́, со ту́кэ исын пир ило́, саро́ ту́кэ отда́ва! Аж кэ паш миро кралипэ́н!”

²⁴ Ёй выгия́ кэ дай тэ пхучэл, со тэ мангэ́л. “Манг Ианоскирэ-Болдэипнарискиро шэро́”, – сы́гэс пхэндя́ одоя.

²⁵ И ада́й жэ раклы рисия муршканэ́с кэ кра́ли и мангдя́: “Мангав, соб (кай) ту какана́ ма́нгэ тэ дэс Ианоскирэ-Болдэипнарискиро шэро́ пэ чаро́.”

²⁶ Кра́ли зоралэ́с лыя́ дро шэро́ пэ́скэ, нэ тэ отпхэнэл ла́кэ на закамдя́, адя́кэ сыр ёв дыя́ совла́х анги́л сарэ́ндэ, кон сыс пал сками́нд.

²⁷ И екха́тыр (сра́зу) кра́ли бичхадя́ катос и припхэндя́ лэ́скэ тэ янэл Ианоскиро шэро́. И ёв гия́ и отчингирдя шэро́ лэ́скэ дро штарибэ́н,

²⁸ и яндя́ Лэ́скиро шэро́ пэ чаро́ и отдыя́ лэс раклорьякэ; а раклори пэ́скирэ да́кэ.

²⁹ Ке́ли Ианоскирэ сыкляибны́тка уґалынэ пал дава́, ёнэ явнэ́, закэдынэ лэ́скиро тру́по и ґарадэ́ лэс.

Ису́со Чалякирэ́ла Пандж Тысёнцы Манушэ́н Панджэ́ Марэ́нца и Дуе Мачхэ́нца

³⁰ Апо́столы скэдынэ́пэ кэ Ису́со, и роспхэндлэ́ Лэ́скэ саро́, со ёнэ кэрдэ́, пал со ёнэ сыклякирэнас манушэ́н.

³¹ И Ёв пхэндя́ лэ́нгэ: “Джа́н пэ биманушэнгиро штэ́то, тумэ́нгэ трэй тэ явэ́н екхджинэ и тэ откхинён.” Пал-дова́, со сыс одо́й бут мануша́, савэ́ явэ́нас и джа́нас, лэ́ндэ на сыс аж часо тэ хан.

³² И ёнэ отплывиндлэ (дынэ́ пли́ма дурэдыр) пэ ба́рка (лодка) пэ штэ́то, кай никонэ́с на сыс.

³³ Нэ мануша́ дыкхнэ́, со ёнэ дурьёнас, и бут уджиндлэ́ пал дава́ и прастанас одори́к сарэ́ форье́ндыр и явнэ́ анги́л лэ́ндэ.

³⁴ Ке́ли Ису́со выгия́ пэ брэ́го и дыкхця́ бут манушэ́н, Ёв потангиндя лэн, пал-дова́ со ёнэ сыс сыр бакря́ би чхупнарискиро; и Ёв яця́ лэн тэ сыклякирэ́л.

³⁵ Сыр явдя́ бэльвэ́ль, сыкляибны́тка подгинэ́ кэ Ису́со и ракирэ́на: “Ѓа́да, ужэ баро́ часо и штэ́то ада́й исын биманушэнгиро.

³⁶ Отмэк манушэ́н, мэк ёнэ тэ джа́н дрэ пашатунэ́ гава́, соб (кай) тэ кинэн пэ́скэ вари-со хабнастыр.”

³⁷ Нэ Ису́со отпхэндя́: “Тумэ́ дэн лэ́нгэ тэ хан.” Сыкляибны́тка ґаздынэ́пэ: “Нау́што Ту мыслинэса дро ило́, соб (кай) амэ тэ закинас маро́ пэ дуйшэла́ динарии тэ дас тэ хан адалэ́ манушэ́нгэ?”

³⁸ “Кицы́ тумэ́ндэ исын лабы маро́?, – пхучэла Ису́со, джа́н, дыкхэ́н.” Ёнэ гинэ́, уґалынэ, и ракирэ́на: “Пандж марэ́ и дуй мачхэ́.”

³⁹ Ису́со пхэндя́ тэ бэшлякирэн манушэ́н рядэнца пэ зэлэно чар.

⁴⁰ Сарэ́ бэшнэ́ дрэ ряды пир пандждэша́ и пир шэл мануша́.

⁴¹ Ису́со лыя́ пандж марэ́ и дуй мачхэ́, ґаздыя́ якха́ пэ болыбэ́н и бахтякирдя́ хабэ́н, и пхагирдя́ лабы маро́ и лыя́ тэ пиридэл сыкляибнытконэ́нгэ и одолэ́ роздэнас манушэ́нгэ; и роскэрдя́ Ёв дуй мачхэ́ пэ сарэ́ндэ.

⁴² Сарэ́ ханэ́ и чалынэ.

⁴³ И ёнэ скэдынэ́ дэшуду́й корзи́ны (кхудэ́) марэ́са и мачхэнца котэрэндыр (кускэндыр), со ячнэ́пэ.

⁴⁴ И сыс пандж тысёнцы мурша́, савэ́ ханэ́ лабы маро́.

Ису́со Джа́ла пир Пани́

⁴⁵ Екха́тыр (сра́зу) пало́ дава́ Ису́со припхэндя́ Пэ́скирэ сыкляибнытконэ́нгэ тэ бэшэ́н дрэ ба́рка тэ пириплывинэн (дэ́нас пли́ма пирдал) пэ яви́р риг кэ Вифсаида, пака Ёв отмэкэ́ла манушэ́н.

⁴⁶ И ке́ли Ёв розяцяпэ и отмэкця́ манушэ́н, то гия́ упрэ́ пэ бэ́рга тэ мангэ́лпэ Дэвлэ́скэ.

⁴⁷ И ке́ли явдя́ бэльвэ́ль, ба́рка сыс машкира́л мо́рё (дэрья́в), а Ису́со сыс екхджино́ пэ брэ́го.

⁴⁸ И сыр Ёв дыкхця́, со ёнэ гребинэнас вёслэнца (ровленца) пир зор, пал-дова́ со балва́л сыс пэ лэ́ндэ – сыс машки́р три́то и шта́рто мардо́ (шту́нда) ратя́киро, ґа́да, Ёв лыя́ тэ джал кэ ёнэ, штавиндой пир мо́рё (дэрья́в); и Ёв мыслиндя дро ило́ тэ проджал пашэ́ лэ́ндэ дурэды́р,

⁴⁹ нэ ке́ли ёнэ дыкхнэ́, со Ёв джа́ла пир мо́рё (дэрья́в), ёнэ думиндлэ (дынэ́ годы пэскэ), со дава́ сыс зданки и задынэ го́дла.

⁵⁰ Пал-дова́ со ёнэ сарэ́ дыкхнэ́ Лэс и страха́дынэ; а Ису́со екха́тыр лыя́ тэ ракирэ́л лэ́нца: “Рикирэнпэ муршканэ́с, дава́ сом Мэ. На андыршан!”

⁵¹ И Ёв загия́ андрэ́ кэ ёнэ дрэ ба́рка, и балва́л штылыя. Ёнэ сыс древа́н здивиндлэ;

⁵² пал-дова́ со ёнэ ишчо (инкэ́) на ґалынэ́ ди́во марэ́са, лэ́нгирэ илэ сыс пхарэ́ тэ ґалён.

Ису́со Састякирэ́ла Насвалэ́н дро Генисаре́то

⁵³ И ке́ли ёнэ пириплывиндлэ (дэ́нас пли́ма пирдал) пэ яви́р риг пэ Генисаретоскири пхув, ёнэ тэрдинэ́ кэ брэ́го.

⁵⁴ Сыр ёнэ гинэ́ яври́ баркатыр, мануша́ екха́тыр уґалынэ Исусо́с;

⁵⁵ ёнэ прастандой обгинэ пир сарэ́ штэ́ты и сыг кэ Ису́со лынэ́ тэ янэ́н насвалэн пэ матрацы одори́к, кай ёнэ шундлэ́, со Ису́со сыс.

⁵⁶ И кай Ёв тэ на явэ́лас дрэ фо́рья ци дрэ гава́, мануша́ чхувэ́нас насвалэн пэ штэ́ты яври́ [таргитка штэ́ты-ю.о.] и мангэнас Лэс тэ мэкэл лэн и мэк фэ́ни (хоць) тэ чилавэн Лэ́скиро урибэ́н; сарэ́, кон чилавэнас, одолэ́ высастёнас.