Marko 5 - Библия - Пэ Балтитко Романи чиб (Романэс) 2019

Ису́со Састякирэ́ла Манушэ́с, Савэ́стэ сыс Налачхэ́ Ду́хи (Фа́ны)

¹ Ису́со и Лэ́скирэ сыкляибны́тка явнэ́ пэ яви́р морёскири риг пэ штэ́то Гадарино.

² Сыр Ису́со выгия́ баркатыр пэ брэ́го, ада́й жэ анги́л Лэ́стэ маґилытконэ коплицэндыр выгия́ ману́ш, савэ́стэ сыс на́лачхо ду́хо (фа́но).

³ Адава́ ману́ш дживдя́ машки́р коплицы. И нико́н на могинэлас тэ пхандэл лэс аж зандирьенца (цэпэнца)

⁴ Пал-дова́ со бут мо́лы лэс пхандэнас пир васта́ и ґэра́ зандирьенца и вастытконэ састырэнца, и кажно мо́ло ёв розрискирэлас лэн. Ёв сыс адасаво́ зорало́, соб (кай) тэ зрикирэн лэс.

⁵ Дывэсэ́ и раты́, ёв псирэлас пир коплицы и бэ́рги, и годла́са марэлас пэс пир бара́.

⁶ Ёв дура́л дыкхця́ Исусо́с, подпрастандыя кэ Ёв и пыя́ пэ чанга́ анги́л Лэ́стэ;

⁷ и дыя́ го́дла зоралэ́с: “Со Ту́кэ трэй ма́ндыр, Ису́се, Най Вучэдырэскиро Дэвлэ́скиро Чхаво́! Совлаха́ Дэвлэ́са, со на мэнчынэса Ту ман?”

⁸ Пал-дова́ со Ису́со припхэндя́ налачхэ́ духоскэ: “Джа́ яври́ адалэ́ манушэ́стыр, на́лачхо ду́хо (фа́но)!”

⁹ Ису́со пхуця́: “Сыр тут кхарэ́на?” “Легионо – пхэндя́ одова́, – пал-дова́ со амэн исын бут.”

¹⁰ Ёв лыя́ древа́н тэ мангэ́л Исусо́с тэ на вытрадэл налачхэ́ ду́хи далэ́ штэто́стыр.

¹¹ Пашы́л бэ́рга дро дава́ часо чарадэпэ бут балычэ,

¹² налачхэ́ ду́хи помангнэ Исусо́с: “Мэк амэн тэ заджас дрэ балычэндэ.”

¹³ Ису́со екха́тыр (тотчас) домэкця, соб (кай) налачхэ́ ду́хи (фаны) тэ выджа́н адалэ́ манушэ́стыр и тэ заджа́н андрэ́ дрэ балычэндэ. Сарэ́ пашэ́ дуй бара́ (тысёнцы) шэрэ́ екха́тыр (сра́зу) чхурдынэпэ брэгоскирэ крутыматыр дро пани́ и тасадынэ.

¹⁴ Балычэнгирэ чараибнарья тэды попрастандынэ пир штэтытка гава́ тэ роспхэнэ́н пал дова́, со кэрдя́пэ. Э мануша́ гинэ́ тэ дыкхэ́н, со кэрдя́пэ.

¹⁵ И явэ́на кэ Ису́со и дыкхэ́на, со ману́ш, савэ́с рикирдя на́лачхо ду́хо (фа́но), сыс бэшто́ дро урибэ́н, дрэ пэ́скири годы́; кодова́-паць, дрэ савэ́стэ сыс бут налачхэ́ ду́хи. Ёнэ сарэ́ пиристрахадынэ.

¹⁶ И мануша́, савэ́ дыкхнэ́ дава́ саро́, роспхэнэнас, сыр саро́ сыс духэнца и балычэнца.

¹⁷ И ёнэ лынэ́ тэ мангэ́н Исусо́с, соб (кай) Ёв тэ джал криг лэ́нгирэ штэто́стыр.

¹⁸ Ке́ли Ису́со бэшэлас дрэ ба́рка, тэды ману́ш, савэ́стыр сыс вытрадынэ́ налачхэ́ ду́хи, мангэлас Исусо́с тэ лэл лэс Пэ́са.

¹⁹ Нэ Ису́со на дыя́ лэ́скэ тэ джал пал Лэ́стэ. “Джа́ кхэрэ́ – ракирэ́ла Ёв лэ́скэ”, – и роспхэн сарэ́нгэ, со ту́са кэрдя́ Рай Дэвэ́л, саво́ лачхипэ́н Ёв ту́кэ кэрдя́ и сыр потангиндя тут.’”

²⁰ И ёв гия́ и яця́ тэ роспхэнэл дрэ Дэшуфорья, со кэрдя́ лэ́скэ Ису́со. Сарэ́ дивиндлэ́пэ.

Патывалэ́-Тэрнэ́-Джувля́киро Отджидякирибэ́н и Насвалэ́-Джувля́киро Састякирибэ́н

²¹ Ке́ли Ису́со рисия́ палэ пэ яви́р риг дрэ ба́рка, кэ Ёв скэдынэ́пэ бут мануша́. Ёв яця́пэ пэ брэ́го.

²² И явэ́лас Иаиро, екх барыдыро́ синагогатыр, и, сыр дыкхця́ Исусо́с,

²³ то пыя́ кэ Лэ́скирэ ґэра́, и яця́ тэ мангэ́л Лэс: “Мири́ чхай мэрэ́ла, яв и чхув упрэ́ васта́ пэ ла́тэ, соб (кай) ёй тэ высастёл и тэ дживэ́л!”

²⁴ И Ёв (Ису́со) гия́ лэ́са; пал Лэ́стэ гинэ́ бут мануша́, тасави Лэс.

²⁵ И сыс джувлы́, сави́ дэшуду́й бэрш сыс насвалы ратвалыпнаса,

²⁶ ёй вырикирдя бут, пал-дова́ со састякирэласпэ бутэндэ састыпнарьендэ (докторэндэ), роздыя пэ састякирибэн бут ловэ́, а заме́ст фэдырипэн, ла́киро насвалыпэн яця́ фуеды́р.

²⁷ Ке́ли ёй шундя́ пал Исусо́стэ, ёй подги́я кэ Ёв палалэстыр машки́р манушэ́ндэ и чиладя́ Лэ́скиро урибэ́н;

²⁸ “Ко́ли Ма́нгэ екх урибэ́н Лэ́скиро тэ чилавав, тэды мэ высастёвавас”, – ракирдя́ ёй;

²⁹ и ада́й жэ ла́киро рат пирияця́ тэ джал, и ёй шундя́ дро пэ́скирэ маса́, со ёй састия пэ́скирэ насвалыпнастыр.

³⁰ Ису́со екха́тыр ґалыя́, со Лэ́стыр выгия́ зор, Ёв рисия и пхуця́: “Кон чиладя́ Миро урибэ́н?”

³¹ И Лэ́скирэ сыкляибны́тка ракирдэ́ Лэ́скэ: “Трусця́л (кругом) Ту́тэ исын ада́кицы мануша́ и Ту пхучэса, кон Тут чиладя́?”

³² Ису́со облыджия манушэ́н дыкхибнаса, соб (кай) тэ дыкхэ́л, кон дава́ кэрдя́.

³³ А джувлы́, сыр ґалыя́, со сыс ла́са и триинскири дара́тыр, подги́я, пыя́ кэ Лэ́скирэ ґэра́ и роспхэндя́ саро́ чачипэ́н.

³⁴ Ёв пхэндя́ ла́кэ: “Чха́е Мири́! Патяибэ́н тыро́ зракхця́ тут! Джа́ бахтяса, яв састы тырэ́ насвалыпнастыр.”

³⁵ Пака Ису́со ракирдя́ джувля́са, явнэ́ синагогакирэ-барыдырэскирэ Иаироскирэ кхэрэ́стыр мануша́, савэ́н бичхадэ́, и ракирэ́на Лэ́скэ: “Чхай Тыри́ мыя́, палсо́ ишчо (инкэ́) тэ пхарьякирэс Сыклякирибнаскирэс?”

³⁶ Нэ Ису́со, сыр шундя́ дова́, со ракирдэ́, пхэндя́ синагогакирэ барыдырэ́скэ: “На андырша, фэ́ни (то́ка) патя!”

³⁷ И Ёв на домэкця никонэ́с тэ джал Лэ́са, апри́ч Пэтристэ, Яковостэ и лэ́скирэ пшалэ́стэ Ианостэ.

³⁸ И, акэ, ёнэ явнэ́ дро Иаироскиро кхэр и одо́й дыкхнэ́ пхэрдо́ манушэ́н, машки́р савэ́ндэ сыс шумо годлэнца; ёнэ годлэнас, и рондлэ́ ясвэ́нца.

³⁹ Сыр Ёв загия́ дро кхэр, то пхэндя́ лэ́нгэ: “Палсо́ тумэ́ кэрэ́на шумо и ровэна; патывалы́ тэрны́ джувлы́ на мыя́, ёй исын суты.”

⁴⁰ И ёнэ сандлэпэ Лэ́стыр. Ису́со пхэндя́ сарэ́нгэ тэ джа́н яври́, нэ Кокоро́ Ёв патывалэ́-тэрнэ́-джувлякирэ дадэ́нца и тринэ́ сыкляибнытконэ́нца загия́ дрэ шту́ба, кай патывалы́ тэрны́ джувлы́ сыс пашты.

⁴¹ Лыи ла пал васт, Ису́со пхэндя́ патывалэ́ тэрнэ́ джувля́кэ: “Талита куми!” (Со значынэ́ла Романэс: “Тэрны́ Джувли́е, Ту́кэ ракира́ва, ушты́!”).

⁴² Патывалы́ тэрны́ джувлы́ екха́тыр уштыя́ и яця́ тэ псирэ́л; ла́кэ сыс дэшуду́й бэрш. И сарэ́ екха́тыр ячнэ́ штыл дивостыр.

⁴³ Ису́со шылалэс припхэндя́ лэ́нгэ никонэ́скэ тэ на ракирэ́н пал дава́, со сыс; а патываля-тэрня-джувля́ пхэндя́ тэ чалякирэн.