Marko 4 - Библия - Пэ Балтитко Романи чиб (Романэс) 2019

Пал Сеиныбнари́стэ

¹ Ису́со нэвэ́стыр (нэвэ́с) сыклякирэлас пэ морёскиро (дэрьявэ́скиро) брэ́го; пашы́л Лэ́стэ скэдынэ́пэ ада́кицы мануша́, со Ёв бэсця́ дрэ ба́рка, соб (кай) тэ явэ́л дро мо́рё (дэрья́в), а, соб (кай) сарэ́ мануша́ тэ ячэ́нпэ пэ пхув пэ брэ́го.

² Ису́со сыклякирэлас лэн бутэ́ примерэнца (сыкаибнэнца), ракири́:

³ “Шунэ́н! Екх гавитко выгия́ пэ фэ́лда тэ сеинэл

⁴ и сыс адя́кэ: ке́ли ёв росчхурдэлас зя́рки, тэды вари-савэ́ зя́рки пынэ́ пашы́л дром. Привурняндынэ чирикля́ и ханэ́ лэн.

⁵ Яви́р зя́рки пынэ́ пэ баруно штэ́то, кай сыс на́бут пхув; ёнэ баринэ упрэ́ сы́гэс, сыр на сыс хор дрэ пхув;

⁶ а ко́ли яця́ хачкирибэ́н кхамэстыр, ростки (шчуки) мурдалынэ (звяниндлэ) и зашутинэ, пал-дова́ со ко́рни (рукха́) лэ́ндэ на хор сыс.

⁷ Яви́р зя́рки пынэ́ дрэ дылыны чар, дылынэ́ чарья́ баринэ упрэ́ и замардэ́ лэн, и ёнэ на дынэ́ прибарипэн.

⁸ А яви́р зя́рки пынэ́ пэ лачхи́ пхув, дынэ́ прибарипэн дрэ трия́нда и дэшушовдэша и шэл мо́лы!”

⁹ И Ису́со ракирдя́ лэ́нгэ: “Конэ́стэ исын кана́, мэк тэ шунэ́л.”

Саво́ исын Смы́сло дрэ Исусо́скирэ Приме́ры (Сыкаибэна́)

¹⁰ Ке́ли мануша́ розгинэпэ и Исусо́са ячнэ́пэ дэшуду́й и яви́р мануша́, савэ́ шундлэ́ Лэс, ёнэ пхучнэ́ Лэ́стыр, со значынэна далэ́ примеры (сыкаибэна)?

¹¹ И Ёв ракирдя́ лэ́нгэ: “Гарадэ́ чачипэна́ Дэвлэ́скирэ Кралипнаскирэ дынэ́ тумэ́нгэ. Нэ кон исын дура́л Кралипнастыр, одолэ́нгэ ракирэлапэ примерэнца (сыкаибнэнца).

¹² Ёнэ дыкхэ́на якхэ́нца, и на дыкхэ́на, ёнэ шунэ́на, и на ґалёна; а ко́ли ёнэ рискирэнас пэ́скиро джиибэ́н кэ Дэвэ́л, тэды ёнэ явэ́нас примангнэ.”

Ису́со Роспхэнэ́ла Смы́сло дрэ Приме́ры (Сыкаибэна́)

¹³ Дурэды́р ракирэ́ла Ёв: “Нау́што и тумэ́ на ґалёна дава́ приме́ро (сыкаибэ́н)? Сыр тумэ́ тэды ґалёна сарэ́ примеры (сыкаибэна)?

¹⁴ Сеиныбнаскиро чхувэ́ла дрэ пхув Дэвлэ́скиро лав.

¹⁵ Исын мануша́, савэ́ исын сы́рбы дая́ зя́рка пашы́л дром. Сыр фэ́ни (то́ка) ёнэ шунэ́на лав, то явэ́ла на́лачхо и чорэла лэс лэ́ндыр.

¹⁶ Исын адасавэ́ мануша́, савэ́ исын сы́рбы дая́ зя́рка, сави́ посеиндлы пэ баруно штэ́то: ёнэ шунэ́на лав и екха́тыр (сра́зу), акэ, прилэ́на лэс радыма́са.

¹⁷ А адя́кэ, сыр ко́рни (рукха́) хор лэ́ндэ нанэ, тэды ёнэ сыс сарэ́са надлэнга. Ко́ли пал прилыно лав ёнэ дыкхэ́на традыпэн и пхарипэ́н, ёнэ мэкэ́на лав екха́тыр.

¹⁸ Яви́р зя́рки, савэ́ почхудэ дрэ дылыны чар, исын сы́рбы мануша́, савэ́ шунэ́на лав:

¹⁹ нэ кажно дывэсы́тко кошыбэ́н, хохаибэ́н пал барвалыпэ́н, яви́р мысли пэ ило́ явэ́на и мурдякирэна дрэ лэ́ндэ лав и кэрэ́на лэс бибарьякирдонэскирэса.

²⁰ Зя́рки, савэ́ почхудэ пэ лачхи́ пхув, исын сы́рбы мануша́, савэ́ шунэ́на лав, прилэ́на лэс и дэ́на прибарипэн дрэ трия́нда и дрэ шовдэша́ и дрэ шэл мо́лы.”

Пал Момолы́

²¹ Ису́со пхэндя́ лэ́нгэ: “Ко́ли захачкирэна момолы, на чхувэ́на ла тэл пирискирды пири́ ци тэл чхуибэ́н? Нау́што на чхувэ́на ла дро шандало (подсвечнико)?

²² Пал-дова́ со нисо́ нанэ чорахано; соб (кай) тэ на явэ́л бицяло́ (дыцьло), нисо́ нанэ счхакирдо, соб (кай) тэ на выджа́л пэ дуд (свэ́то), пэ якха́ манушэ́нгэ.

²³ Конэ́стэ исын кана́, мэк тэ шунэ́л!”

²⁴ И ракирдя́ лэ́нгэ: “Рипирэн мишто́ дава́, со тумэ́ какана́ шунэ́на: савья́са мераса тумэ́ меринэна, адя́кэ тумэн явэ́на тэ меринэн и ишчо (инкэ́) буты́р.

²⁵ А конэ́стэ исын, одолэ́скэ ишчо (инкэ́) явэ́ла дыно́, а конэ́стэ нанэ, одолэ́стыр явэ́ла отлыно и дова́ на́бут, со исын.”

Приме́ро (Сыкаибэ́н) пал Зя́рка

²⁶ Ису́со ракирдя́ дурэды́р: “Дэвлэ́скиро Кралипэ́н исын сы́рбы екх ману́ш, саво́ сеинэла фэ́лда;

²⁷ и раты́ ману́ш исын суто́, пэ зло́ко (пэ ра́нко) уштэ́ла, и проджа́на (накхэна) дывэса́, зя́рки ґаздэ́напэ и барьёна, а ману́ш кокоро́ на джинэ́ла, сыр дава́ саро́ кэрэ́лапэ.

²⁸ А пхув кокори барьякирэ́ла. Анги́л сыкадёла ростко (шчуко), тэ́ньчи колосо, колосо пхэрдёла зяркаса.

²⁹ Ко́ли зя́рка выспяинэла, явэ́ла счхиныбэн, тэды гавитко явэ́ла серпоса (чхиндлэса) тэ чхинэл.”

Приме́ро (Сыкаибэ́н) пал Гарчы́чно Зя́рка

³⁰ Ису́со ракирэ́лас дурэды́р: “Со́са сашты́ (можна) тэ роўнинас Дэвлэ́скиро Кралипэ́н? Савэ примероса (сыкаибнаса) сашты́ лэс тэ сыкавас?

³¹ Ёв исын сыр гарчычно зя́рка, сави́ исын най тыкнэды́р сарэ́ зяркэндыр пэ пхув, и ману́ш чхувэ́ла ла дрэ пхув,

³² Нэ ке́ли ёй выбырьёла, тэ́ньчи явэ́ла барэды́р явирэндыр барьякирдонэ раслинэндыр. Тэл ла́кирэ барэ́ рандя́ чирикля́ могинэ́на тэ кхувэн гня́зды (ку́фы) дрэ ранденгири зэр (тенё).”

³³ Адя́кэ примерэнца (сыкаибнэнца) Ису́со сыклякирдя́ манушэ́н пэ ада́кицы, пэ кици ёнэ могиндлэ́ тэ ґалён;

³⁴ би примерэнгиро Ёв сарэ́са на сыклякирдя́, нэ ке́ли Ёв ячэласпэ екхджино́ пэ́скирэ сыкляибнытконэ́нца, Ёв саро́ пирипхэнэлас лэ́нгэ.

Ису́со Штылякирэ́ла Штормо́

³⁵ Дро дова́ дывэ́с, бэльвэле́, Ису́со пхэндя́ Ппэскирэ сыкляибнытконэ́нгэ: “Пириджаса пэ яви́р риг.”

³⁶ И ке́ли ёнэ отмэкнэ манушэ́н, ёнэ лынэ́ Лэс пэ́са дрэ дая́-паць ба́рка, кай Ису́со сыс; и яви́р барки сыс Лэ́са.

³⁷ И, акэ, пэ мо́рё (дэрья́в) ґаздыя́пэ зоралы́ балва́л. Пани марэлас зоралэ́с пир баркакиро борто и зачхувэлас ла.

³⁸ Ису́со дро дова́ часо сыс суто́ пэ корма, чхуви шэрандуны тэл шэро́. Сыкляибны́тка джангавэнас Лэс, и пхэндлэ́ Лэ́скэ: “Сыклякирибна́скиро! Ту́кэ со, усае́кх исын, со амэ хасёваса?”

³⁹ Ису́со уштыя́, припхэндя́ балвалякэ тэ на пхурдэл и пхэндя́ валнэнгэ: “Штыл! Пириячэн!” И балва́л штылыя и яця́ дивно штылыпэн.

⁴⁰ “Нэ, со тумэ́ страха́дынэ? – пхэндя́ Ёв лэ́нгэ, – кай исын тумаро́ патяибэ́н?”

⁴¹ Пиристрахадэ сыкляибны́тка пхучэнас екх екхэстыр: “Нэ кон Ёв исын адасаво́, со и балва́л и мо́рё (дэрья́в) Лэс кандэ́на?”