Marko 3 - Библия - Пэ Балтитко Романи чиб (Романэс) 2019

Ису́со Састякирэ́ла Манушэ́с Шукэ́ Вастэ́са

¹ Ису́со нэвэ́стыр загия́ дрэ синагога, и сыс одо́й ману́ш шукэ́ вастэ́са.

² Дрэ синагога дыкхэнас ракхибны́ткэс пал Лэ́стэ, соб (кай) тэ бангякирэн Исусо́с, ци на састякирэлас Ёв адалэс манушэ́с дро са́вато.

³ И Ёв ракирэ́ла манушэ́скэ шукэ́ вастэ́са: “Ушты́ и тэрдёв машкира́л.”

⁴ Тэ́ньци Ёв ракирэ́ла лэ́нгэ: “Со сашты́ [пир Зако́но-ю.о.] тэ кэрэ́с дро са́вато: лачхипэ́н ци фуипэ́н, тэ ракхэ́с джиибэ́н ци тэ хасякирэс?” Ёнэ сыс штыл.

⁵ Тэды Ису́со облыджия лэн холямэ́ дыкхибнаса, и тугиндя пал лэ́нгирэ пхарэ́ илэ, и пхэндя́ калекаскэ: “Протырдэ тыро́ васт!” Ёв протырдыя́, и васт лэ́скиро яця́ састо́ сарэ́са.”

⁶ Фарисе́и выгинэ́, и кхэтанэ́ Иродианэнца лынэ́ тэ кэрэ́н зракирибэ́н тэ мулякирэ́н Лэс.

Ису́со Састякирэ́ла пэ Брэ́го

⁷ Ису́со сыкляибнытконэ́нца гинэ́ кэ мо́рё (дэрья́в); и пал лэ́ндэ гинэ́ бут мануша́ Галилеятыр, Юдеятыр,

⁸ Ерусалимо́стыр, Идумэятыр, палэ Иорданостыр, штэтэ́ндыр Тиростыр и Сидоностыр. Шуныбэна пал ди́вы, савэ́ кэрэ́лас Ису́со, розлыджинэпэ, и мануша́ зджанаспэ кэ Ёв.

⁹ Ёв пхэндя́ сыкляибнытконэ́нгэ тэ скэдэ́н ба́рка (лодка) Лэ́скэ, ко́ли мануша́ явэ́на тэ тасавэнпэ кэ Ёв.

¹⁰ Пал-дова́, со Ёв высастякирдя́ бут манушэ́н, сарэ́, савэ́ндэ сыс насвалыпэна (фра́нсы), чхурдэнаспэ кэ Ёв, соб (кай) тэ чилавэн Лэс.

¹¹ Савэ́ндэ сыс на́лачхо ду́хо (фа́но), дыкхи́ Лэс, пэрэнас анги́л Лэ́стэ пэ пхув и дэ́нас го́дла: “Ту сан Дэвлэ́скиро Чхаво́!”

¹² Нэ Ёв зорья́са припхэнэлас налачхэ́ духэнгэ тэ на ракирэ́н пал Лэ́стэ.

Ису́со Выкэдэ́ла Дэшудуе́н Апостолэ́н

¹³ Ису́со ґаздыя́пэ пэ бэ́рга и кхардя́ кэ пэ манушэ́н, савэ́н Ёв Кокоро́ выкэдыя́, и ёнэ явнэ́ кэ Ёв.

¹⁴ И Ёв выкэдыя́ дэшудуен, савэ́н Ёв кхардя́ Апостолэнца, соб (кай) тэ явэ́н Лэ́са, соб (кай) тэ бичхавэл лэн тэ пхэнэ́н Лэ́скиро лав,

¹⁵ соб (кай) лэ́ндэ тэ явэ́л зор тэ традэ́н налачхэ́ ду́хи:

¹⁶ ґа́да, исын лава́ адалэ́ дэшудуенгирэ: Си́моно (лэс Ису́со кхардя́ “Пэ́три”),

¹⁷ Яково и Иоано, Зеведеёскирэ чхавэ́, лэн Ису́со кхардя́ ґромоскирэ чхавэ́.

¹⁸ Ендри (Андреё), Филипо, Варфаламеё, Матфеё, Яково (чхавэ́ Алфеёскирэ) Фадеё, Си́моно Кананито

¹⁹ и Юда Искариото, саво́ и бикиндя Исусо́с.

Исусо́с Бангякирэ́нас, со Лэ́стэ исын На́лачхи Зор

²⁰ Ису́со рисия́ дро кхэр; и скэдынэ́пэ адакицык бут мануша́, со Лэ́скэ сыкляибнытконэ́нца сыс нашты́ аж тэ хан маро́.

²¹ Ке́ли Исусо́скири сэмэ́нца шундлэ́ пал дава́, ёнэ явнэ́ тэ лэн Лэс, пал-дова́ со мануша́ ракирдэ́: “Ёв исын на дрэ Пэ́скири годы́.”

²² Лылвари́тка (кни́жники), савэ́ явнэ́ Ерусалимо́стыр, допхэнэнас: “Дрэ Лэ́стэ исын Вельзэвуло. Ёв традэ́ла яври́ налачхэ́ ду́хи налачхэ́ зорья́са.”

²³ Тэды Ису́со откхардя лэн, яця́ примерэнца (сыкаибнэнца) тэ допхэнэл лэ́нгэ: “Сыр на́лачхо могинэ́ла тэ вытрадэл налачхэ́с?

²⁴ Ко́ли кралипэ́н роскэрдо (уладо) пэ паш, ёв на явэ́ла тэрдо́.

²⁵ Ко́ли дрэ сэ́м΄я (ири́), сави́ дживэ́ла дро кхэр, нанэ ладо (миро), дасаво кхэр на явэ́ла тэрдо́.

²⁶ Ко́ли на́лачхо джа́ла марибна́са проти пэ́стэ, тэды сыр ёв могинэ́ла тэ пиризорьякирэл, пал-дова́ со лэ́скэ хасибэ́н явдя́.

²⁷ И нико́н на могинэ́ла тэ явэ́л кэ зоралэ́-хуласкиро кхэр фэлатин и тэ обчорэл лэс, ко́ли анги́л на пхандэла зоралэ́ хула́с, и коригэды́р (позжэды́р) чорэла саро́ лэ́скирэ кхэрэ́стыр.

²⁸ Чачэс, Мэ ракира́ва тумэ́нгэ: ‘Сарэ́ грэ́хи и чорэ́ лава́ отмэкэнапэ манушэ́скэ, савэ́ ёв на’ пхэнэлас;

²⁹ нэ кошыбэ́н пэ Свэ́нто Ду́хо (Фа́но) на отмэкэлапэ никели, грэ́хо дава́ ячэ́лапэ пэ далэ́ манушэ́стэ пэ сарэ́ бэрша́.’”

³⁰ Дава́ пхэндя́ Ёв, пал-дова́ со ёнэ ракирдэ́: “Лэ́стэ исын на́лачхо ду́хо (фа́но).”

Исусо́скири Дай и Пша́ла

³¹ Явнэ́ дай и пша́ла Исусо́скирэ и, тэрдии яври́, бичхадэ́ тэ кхарэ́н Лэс.

³² Пашы́л Лэ́стэ сыс бэштэ́ бут мануша́ и пхэндлэ́ Исусо́скэ: “Тыри́ дай и пша́ла родэ́на тут яври́.”

³³ “Кон исын Ма́нгэ дай и пша́ла?” пхуця́, – Ису́со

³⁴ Ёв облыджия якхэ́нца сарэ́н, кон сыс бэштэ́ пашы́л Лэ́стэ и ракирэ́ла: “Дава́ исын дай Мири́ и пша́ла Мирэ́;

³⁵ Пал-дова́ со, кон кэрэ́ла саро́ пир во́ля Дэвлэ́скири, одова́ исын Ма́нгэ пшал, и пхэн и дай.”