Marko 2 - Библия - Пэ Балтитко Романи чиб (Романэс) 2019

Ису́со Састякирэ́ла Насвалэ́ Праличо́са Манушэ́с

¹ И пир вари-кицы́ дывэса́ Ису́со нэвэ́стыр явдя́ дро Капернаумо, и прогия́ шуныбэ́н, со Ёв сыс кхэрэ́.

² И скэдынэ́пэ бут мануша́, со буты́р на сыс штэ́то, аж пашы́л вуда́р и Ёв ракирдя́ лав лэ́нгэ.

³ И ёнэ явнэ́ кэ Ёв; штар мануша́ яндлэ́ насвалэс, савэ́стэ сыс праличо.

⁴ И пал-дова́, со пал манушэ́ндэ ёнэ на могиндлэ́ тэ янэ́н лэс кэ Ёв, ёнэ роскэдынэ кхэрэ́скири стрэ́ха (чхаки́н) дро штэ́то, кай Ису́со сыс тэрдо́ тэла́л, и кэрдэ́ бу΄гло прогиибэн, и одо́й ёнэ змэкнэ матрацо, пэ саво́ сыс пашто́ праличытко.

⁵ Ису́со, дыкхи́ лэ́нгиро патяибэ́н, ракирэ́ла насвалэскэ: “Чха́ва, отмэкэнапэ грэ́хи тырэ́.”

⁶ Вари-кон лылваритконэндыр, савэ́ сыс бэштэ́ одо́й, ракирэ́нас дрэ пэ́стэ:

⁷ “Со Ёв ракирэ́ла адя́кэ? Ёв тэлякирэла Дэвлэ́с. Кон апри́ч Дэвлэ́стэ рикирэ́ла зор тэ отмэкэ́л грэ́хи?”

⁸ Ису́со сы́гэс ґалыя́ лэ́нгиро ракирибэ́н. “Со тумэ́ адя́кэ пал дава́ думинэ́на дрэ тумарэ́ илэ?” – ракирэ́ла Ёв лэ́нгэ.

⁹ Со локхэды́р тэ пхэнэ́с насвалэскэ: “Отмэкэнапэ ту́кэ грэ́хи тырэ́”, ци “Ушты́, лэ матрацо пэ́скиро и псир?”

¹⁰ Адя́кэ, соб (кай) тумэ́ тэ джинэ́н, со Чхавэ́стэ Манушэскирэстэ исын зор пэ пхув тэ отмэкэ́л грэ́хи.” Тэды ракирэ́ла Ёв праличытконэскэ:

¹¹ “Ту́кэ ракира́ва: “Ушты́, лэ матрацо пэ́скиро и джа́ дро пэ́скиро кхэр.”

¹² И ёв екха́тыр (сра́зу), пэ якха́ сарэ́ндэ, уштыя́, скэдыя́ пэ́скиро матрацо и гия́ яври́. Дава́ дивинэлас сарэ́н, и мануша́ славинэнас Дэвлэ́с и ракирэ́нас: “Дасаво амэ ние́кхвар на дыкхцям!”

Ису́со Кхарэ́ла Левиёс

¹³ И Ису́со гия́ нэвэ́стыр кэ мо́рё (дэрья́в), и пашы́л Лэ́стэ скэдынэ́пэ бут мануша́ и Ёв сыклякирдя́ лэн.

¹⁴ Прогии дурэды́р, Ёв дыкхця́ Левиёс, Алфеёскирэ чхавэ́с. Одова́ сыс бэшто́ дро мытытко кхэр. “Яв Ма́нца”, – ракирэ́ла Лэ́скэ Ису́со. Левиё уштыя́ и гия́ пал Лэ́стэ.

¹⁵ И сыс адя́кэ: ке́ли Ису́со сыс бэшто́ дро Алфеёскиро кхэр, бэшэнас пал сками́нд Лэ́са и Лэ́скирэ сыкляибнытконэ́нца бут мытоскирэ скэдыибнарья и грэхэнгирэ; сыс бут лэн, и ёнэ джа́нас Лэ́са.

¹⁶ И ке́ли вари-савэ́ Фарисиендыр дыкхнэ́, со Ёв халас грэхэнгирэнца и мытоскирэ скэдыибнарьенца, ёнэ ракирдэ́ Лэ́скирэ сыкляибнытконэ́нгэ: “Со́скэ Ёв ха́ла мытоскирэ скэдыибнарьенца и грэхэнгирэнца?”

¹⁷ Ису́со шундя́ дава́ и пхэндя́: “На састэ манушэ́нгэ трэй састыпнари (докторо), а насвалэнгэ. Мэ явдём тэ прикхарав на патяибнытконэн, а грэхэнгирэн.”

Пал По́сто

¹⁸ Сыкляибны́тка Ианоскирэ Болдэипнарискирэ и Фарисе́и постинэнаспэ. Вари-савэ́ подджанас кэ Ису́со и пхучэнас: “Со́скэ Ианоскирэ сыкляибны́тка и Фарисиенгирэ постинэнапэ, а Тырэ́ сыкляибны́тка-над?”

¹⁹ Ису́со отпхэндя́ лэ́нгэ: “Ци могинэ́на дру́ги (мала́) Тэрнэскирэ тэ отпхэнэнпэ хабнастыр, ко́ли ёнэ исын пэ Лэ́скиро бьяв? Пака Тэрно́ исын лэ́нца, палсо́ лэ́нгэ тэ постинэнпэ?

²⁰ Нэ явэ́на дывэса́, ке́ли Тэрно́ явэ́ла лыно́ криг лэ́ндыр, тэды ёнэ явэ́на тэ постинэнпэ дро дова́ дывэ́с.

²¹ Нико́н на чхувэ́ла пэ пхурано́ урибэ́н нэво́ похтанытко котэ́р. Пал-дова́ со лёха (дирка) буты́р явэ́ла.

²² Нико́н на чхувэ́ла нэви́ мол (вино) дро пхуранэ́ цыпитка гонэ́, ёй рискирэ́ла лэн и мол вытхадэла и гонэ́ хасёна. Тэрны́ мол чхувэ́на дрэ нэвэ цыпитка гонэ́.”

²³ Екхвар дро са́вато (субо́та) Исусо́скэ пригияпэ тэ джал гивитконэ фэлдаса. Сыкляибны́тка Лэ́скирэ бокхалынэ и лынэ́ тэ зрискирэн колосы.

²⁴ И Фарисе́и ракирэ́на Лэ́скэ: “Дыкх, со́скэ ёнэ кэрэ́на дова́, со нашты́ тэ кэрэ́н дро са́вато?

²⁵ И ёв ракирэ́ла лэ́нгэ: “Нау́што тумэ́ на гиндлэ́ дро Свэ́нто Чхиныбэ́н, со кэрдя́ кра́ли Дави́до, ке́ли ёв и лэ́скирэ мала́ бокхалынэ:

²⁶ дава́ сыс тэды, ке́ли раша́нгиро барыдыро́ сыс Авиафаро; сыр Дави́до загия́ дрэ Кхангири́ и хая одо́й дыибнытко маро́, саво́ сыс нашты́ тэ хал никонэ́скэ апри́ч рашандэ! Ёв хая, и дыя́ пэ́скирэ малэнгэ.”

²⁷ И ракирдя́ лэ́нгэ: “Са́вато (субо́та) исын ваш манушэ́скэ, а на ману́ш исын ваш са́вато;

²⁸ пал-дова́ со Чхаво́ Манушэ́скиро исын Хула́й и пэ са́вато.”