Marko 16 - Библия - Пэ Балтитко Романи чиб (Романэс) 2019

Отджидыипэ́н

¹ А ке́ли прогия́ са́вато (субо́та), Мари́я Магдалина, Мари́я дай Яковоскири и Саломия, киндлэ ароматытка чарья́, соб (кай) тэ джа́н тэ макхэн Исусо́скиро тру́по.

² Пэ зло́ко, дро пэ́рво куркэскиро дывэ́с, сыр уштыя́ кхам, ёнэ гинэ́ кэ маґила.

³ Пир дром ёнэ ракирдэ́ машки́р пэ́стэ: “Кон да амэ́нгэ отрискирэла криг бар пашы́л загиибэ́н дрэ копли́ца?

⁴ А ке́ли ёнэ придыкхнэпэ, дыкхэ́на, со бар отрискирдо криг, а бар сыс древа́н баро́.

⁵ Ёнэ гинэ́ андрэ́ и дыкхнэ́ тэрнэ́ манушэ́с, саво́ сыс уридо́ дро саро́ парныпэн; ёв сыс бэшто́ пир чачи́ риг вударэндыр, и ёнэ страха́дынэ.

⁶ “На андыршан”, – ракирэ́ла ёв лэ́нгэ. “Тумэ́ родэ́на Исусо́с Назаретостыр, Савэс примардэ пэ трушу́л. Ёв отджидыя́! Лэс ада́й нанэ, дава́ исын штэ́то, кай Лэс чхудэ́.

⁷ Какана́ джа́н и пхэнэ́н Лэ́скирэ сыкляибнытконэ́нгэ и Пэтрискэ: “Ёв джа́ла анги́л тумэ́ндэ дрэ Галиле́я, одо́й тумэ́ Лэс и дыкхэ́на, сыр Ёв и пхэндя́ тумэ́нгэ.”

⁸ Ёнэ выгинэ́ и дынэпэ тэ прастан маґилатыр, сыр пыя́ пэ лэ́ндэ бари дар и издраны; ёнэ никонэ́скэ нисо́ на пхэндлэ́, пал-дова́ со ёнэ дара́ндынэ.

Ису́со Сыкадёла Мария́кэ Магдалина́кэ

⁹ Отджидыи дро пэ́рво куркэскиро дывэ́с, Ису́со сыкадыя́ анги́л Мариякэ Магдалинакэ, савья́тыр Ёв вытрадыя́ эфта́ налачхэ́ ду́хи (фаны).

¹⁰ Ёй гия́ и роспхэндя́ дава́ одолэ́нгэ, кон сыс Лэ́са и савэ́ ровэнас пал Лэ́стэ и пиридживэнас;

¹¹ ке́ли ёнэ шундлэ́ пал дова́, со Ису́со исын джидо́ и, со ёй дыкхця́ Лэс, ёнэ на патяндынэ́.

¹² Тэ́ньци Ису́со сыкадыя́ дро яви́р дыкхибэ́н дуенгэ лэ́ндыр пир дром, ке́ли ёнэ гинэ́ пал фо́ро.

¹³ Кадалэ́ дуй мануша́ рисинэ́ и роспхэндлэ́ явирэ́нгэ, нэ ёнэ и лэ́нгэ на патяндынэ́.

¹⁴ Тэ́ньци Ису́со сыкадыя́ дэшуекхэ сыкляибнытконэ́нгэ, савэ́ ханас пал сками́нд. Ёв выракирдя лэ́нгэ, со на ухты́лла (на́доси) лэ́ндэ патяибэ́н и лэ́нгиро ило́ исын пхаро́ дро дова́, со лэ́нгэ сыс на пир ило́ тэ патя́н одолэ́нгэ, савэ́ дыкхнэ́ Лэс коригэды́р (позжэды́р), сыр Ёв отджидыя́.

¹⁵ Ису́со пхэндя́ лэ́нгэ: “Джа́н пир саро́ свэ́то (лот) и пхэнэ́н лав Евангелиятыр кажнонэ́ джидэ́ создыибнаскэ.

¹⁶ Одолэ́, савэ́ патя́на и явэ́на тэ болэнпэ, явэ́на зракхнэ́. Нэ одолэ́, савэ́ на явэ́на тэ патя́н-явэ́на сэндиндлэ.

¹⁷ Патяибнаскирэ явэ́на тэ сыкавэ́н дасавэ́ ди́вы: ёнэ явэ́на Мирэ́ лавэ́са тэ традэ́н налачхэ́ ду́хи, ёнэ явэ́на тэ ракирэ́н пэ нэвэ чиба́ (чибья́);

¹⁸ ёнэ явэ́на тэ лэн сапэн вастэ́нца ци тэ пьен трута (отрава) и ни саво́ чорипэ́н на явэ́ла лэ́нгэ, ёнэ явэ́на тэ чхувэ́н васта́ пэ́скирэ пэ насвалэндэ, и кодолэ́ явэ́на тэ састён.”

¹⁹ И ке́ли Рай Дэвэ́л Ису́со пхэндя́ лэ́нгэ саро́, тэды Ёв сыс ґаздыно́ пэ болыбэ́н и бэсця́ пэ чачо́ васт Дэвлэ́стэ Дадэ́стэ.

²⁰ И ёнэ выгинэ́ и роспхэндлэ́ лав усенде (везде), Рай Дэвэ́л сыс пашы́л лэ́нгирэ рэ́нды и Ёв допхэнэлас лэ́нгирэ лавэнгиро чачипэ́н знамение́нца (ґертыкэ́нца), савэ́ джа́нас ада́й жэ пал лэ́нгирэ лава́.