Marko 10 - Библия - Пэ Балтитко Романи чиб (Романэс) 2019

Ису́со Ракирэ́ла пал Выгиибэ́н Палоро́м и Розгиибэ́н

¹ И уштыи, Ису́со гия́ криг долэ́ штэтэ́ндыр, и явдя́ пал Иорда́но дрэ Юдэ́я; и нэвэ́стыр кэ Ису́со скэдынэ́пэ мануша́, и Ёв сыклякирдя́ лэн пир Пэ́скиро сыкляибэн.

² И явнэ́ кэ Ёв Фарисе́и тэ пропатякирэн Лэс, и пхучнэ́ Лэ́стыр: “Пхэн амэ́нгэ, ци сашты́ (можна) муршэскэ тэ мэкэл пэ́скирэ ромня́?”

³ И Ёв отпхэндя́ лэ́нгэ и пхэндя́: “Со Мо́йза (Моисеё) припхэндя́ тумэ́нгэ?”

⁴ И ёнэ пхэндлэ́: “Мо́йза дэ́лас во́ля муршэскэ тэ чхинэл лыл пал розгиибэн и тэ мэкэл ла.”

⁵ Нэ Ису́со пхэндя́ лэ́нгэ: “Ёв чхиндя́ дава́ припхэныбэ́н пал тумарэ́ холямэ́ илэ.

⁶ А дро англыпэ́н (начало), сыр Дэвэ́л создэлас свэ́то, Ёв создыя́ муршэ́с и джувля́.

⁷ Палдава́ мэкэ́ла ману́ш пэ́скирэ дадэ́с и да, и ёв явэ́ла тэ дживэ́л пэ́скирэ ромня́са;

⁸ и явэ́на ёнэ сыр екх лоч (плоть); пал-дова́ со ёнэ исын какана́ на дуй, а екх лоч.

⁹ Пал-дова́ со Дэвэ́л чхудя́ кхэтанэ́, мэк адава́ ману́ш тэ на розмарэл.”

¹⁰ И дро кхэр сыкляибны́тка нэвэ́стыр пхучнэ́ Лэ́стыр пал дава́.

¹¹ И пхэндя́ Ёв лэ́нгэ: “Ко́ли кон мэкэ́ла пэ́скирэ ромня́ и лэ́ла явирья, одова́ кэрэ́ла биладжаипэ́н пэрвонэ́ ромнякэ;

¹² и ко́ли ёй кокори розджалапэ пэ́скирэ ромэса и выджа́ла палоро́м пал явирэ́стэ, тэды ёй кэрэ́ла биладжаипэ́н.”

Ису́со Бахтякирэ́ла Чхаворэ́н

¹³ И ёнэ янэ́нас кэ Ису́со тыкнэ́ биятэ́н, соб (кай) Ёв тэ чилавэл лэн; а сыкляибны́тка кошлэ лэн [на домэкэнас-р.с.]

¹⁴ Нэ ке́ли Ису́со дыкхця́ дава́, Ёв холя́сыя и пхэндя́: “Мэкэ́н чхаворэ́н кэ Мэ; и на тэрдён пэ дром лэ́ндэ, пал-дова́ со Кралипэ́н дро Болыбна́скиро Раё явэ́ла лэ́нгиро.

¹⁵ Чачэс, ракира́ва тумэ́нгэ: кон на прилэ́ла Кралипэ́н дро Дэвлэ́скиро Раё, адя́кэ сыр дава́ бия́то, одова́ на заджа́ла дро Кралипэ́н.’”

¹⁶ И Ёв облыя биятэ́н, чхудя́ упрэ́ васта́ пэ лэ́ндэ, и бахтякирдя́ лэн.

Пал Барвалюко́стэ

¹⁷ Нэ ке́ли Ису́со выджа́лас дро дром, кэ Ёв подпрастандыя ману́ш, пыя́ пэ чанга́ анги́л Лэ́стэ и пхуця́: “Дро́го Сыклякирибна́скиро! Со ма́нгэ тэ кэра́в, соб (кай) тэ дорэсав паш дро ве́чно джиибэ́н?”

¹⁸ “Палсо́ ту кхарэса ман ‘Дро́го?’” – пхэндя́ Ису́со. ‘Дро́го исын екх Дэвэ́л.

¹⁹ Ту джинэ́са припхэныбэна́: ‘На замар, на кэр биладжаипэ́н, на чор, на совлаха́ хоханэ́с (пэфроми), на хохав, кутякир дадэ́с и да.’”

²⁰ “Сыклякирибна́скиро, – отпхэндя́ и пхэндя́ пэ дава́ ману́ш, – саро́ дава́ мэ зракхцём чхаворипнастыр.”

²¹ Ису́со ласкаса подыкхця́ пэ лэ́стэ и ракирэ́ла: “Ту́кэ екх на ухты́лла (на́доси): джа́, розбикин саро́ пэ́скиро барвалыпэ́н, и роздэ ловэ́ чорорэнгэ, тэды ту́тэ явэ́ла кучипэ́н пэ болыбэ́н; тэ́ньчи яв, джа́ пал Ма́ндэ.”

²² Ману́ш яця́ смэнтно (скучно) далэ́ лавэ́ндыр, и гия́ дрэ риг пхарэ́ минаса: пал-дова́, со Ёв сыс древа́н барвало́.

²³ Ису́со лыджия́ трусця́л и пхэндя́ Пэ́скирэ сыкляибнытконэ́нгэ: “Сыр пхаро́ явэ́ла барвалэскэ тэ заджа́л дро Кралипэ́н дро Дэвлэ́скиро Раё.”

²⁴ Сыкляибны́тка страха́дынэ Лэ́скирэ лавэ́ндыр, а Ису́со нэвэ́стыр отпхэндя́ лэ́нгэ, ракири́: “Чхаворалэ! Сыр исын пхаро́ тэ заджа́н дро Кралипэ́н дро Дэвлэ́скиро Раё одолэ́нгэ, кон патя́ла зоралэ́с дро барвалыпэ́н.

²⁵ Дава́ локхэды́р верблюдоскэ тэ проджал пир сувьякиро кан, сыр барвалэскэ тэ заджа́л дро Кралипэ́н дро Дэвлэ́скиро Кралипэ́н.”

²⁶ Сыкляибны́тка ишчо (инкэ́) буты́р дивиндлэ́пэ и лынэ́ тэ пхучэ́н екх екхэстыр: “Кон да могинэ́ла тэды тэ зракхэлпэ?”

²⁷ Ису́со подыкхця́ пэ лэ́ндэ и пхэндя́: “Манушэ́нгэ дава́ нашты́ апри́ч Дэвлэ́стэ. Дэвлэ́скэ саро́ сашты́.”

²⁸ Пэ́три тэды лыя́ тэ ракирэ́л Лэ́скэ: “Амэ саро́ ячкирдям и гиям пал Ту́тэ.”

²⁹ Ису́со пхэндя́: “Чачэс, Мэ ракира́ва тумэ́нгэ: Нанэ никонэ́с, кон ячкирдя́ кхэр, ци пшалэ́н, ци пхэнен, ци дадэ́с, ци да, ци чхаворэ́н, ци фэ́лды ваш Ма́нгэ и ваш Ева́нгелия,

³⁰ конэ́стэ на явэ́лас дрэ шэл мо́лы буты́р долэ́стыр, со лэ́ндэ исын дро дава́ джиибэ́н: кхэра́, пшалэ́н, пхэнен, даен, чхаворэ́н, фэ́лды, нэ кхэтанэ́ сарэ́са и традыпэна, а дро англатуно́ джиибэ́н ёнэ дорэсэ́на (долэна) ве́чно джиибэ́н.

³¹ А бут англатунэ́, явэ́на палатунэ́, а палатунэ́ – англатунэ́.’”

Ису́со Ракирэ́ла Три́то Мо́ло пал Пэ́скиро Мэрибэ́н

³² Ёнэ сыс дро дром кэ Ерусалимо; Ису́со гия́ анги́л сыкляибнытконэндэ, савэ́ джа́нас дрэ дар, адя́кэ-паць сыр и мануша́, савэ́ джа́нас пал Лэ́стэ. Ёв кхардя́ дрэ риг Пэскирэн дэшудуен сыкляибнытконэ́н и лыя́ тэ ракирэ́л лэ́нгэ пал дова́, со трэиндя́ Лэ́са тэ явэ́л:

³³ “Амэ джа́са пашылэды́р кэ Ерусалимо, и Чхаво́ Манушэ́скиро явэ́ла здыно раша́нгирэ барыдырэ́нгэ и лылваритконэнгэ: ёнэ засэндинэна Лэс пэ марибэ́н и здэна Лэс Наюдэ́нгэ;

³⁴ ёнэ явэ́на тэ санпэ холямэс, и тэ чунгардэн пэ Лэ́стэ, тэ марэ́н Лэс чупняса и мулякирэна Лэс, нэ пир трин дывэса́ Ёв отджидёла.”

Яково́скиро и Иано́скиро Мангипэ́н (Па́тери)

³⁵ И джа́на пашылэды́р кэ Ису́со Яково и Иа́но, дуй Заведеёскирэ чхавэ́, и ракирэ́на Лэ́скэ: “Сыклякирибна́скиро, амэ мыслинаса дро ило́, соб (кай) Ту тэ кэрэ́с ваш амэ́нгэ дова́, пал со амэ мангаса Тут.”

³⁶ Ёв пхэндя́ лэ́нгэ: “Со исын тумэ́нгэ пир ило́, соб (кай) Мэ тэ кэра́в ваш тумэ́нгэ?”

³⁷ “Дэ во́ля амэ́нгэ дро Тыро́ Кралипэ́н тэ бэшас екхэ́скэ пир чачо́ и явирэскэ пир зэ́рво (ле́во) васт Ту́тыр”, – пхэндлэ́ ёнэ Лэ́скэ.

³⁸ “Тумэ́ кокорэ́ на джинэ́на, со тумэ́ мангэна”, – пхэндя́ лэ́нгэ Ису́со. “Нау́што тумэ́ могинэ́на тэ пьен дава́ тахта́й, саво́ Мэ пьява, и тэ болэнпэ болдэипнаса, савэ́са Мэ болавапэ?”

³⁹ “Могинаса”, – отпхэндлэ́ ёнэ Лэ́скэ. Тэды Ису́со пхэндя́ лэ́нгэ: “Тэ пьен тахта́й (чаша), саво́ Мэ пьява, и тэ болэнпэ болдэипнаса, савэ́са Мэ сом болдо, тумэ́ явэ́на;

⁴⁰ нэ тэ дав во́ля тумэ́нгэ тэ бэшэ́н пир чачо́ и пир зэ́рво васт Ма́ндыр, – дава́ исын на дрэ Мири́ зор; далэ́ штэ́ты исын кодолэ́нгэ, конэ́скэ ёнэ исын приготовиндлэ.”

⁴¹ Ке́ли яви́р дэш сыкляибны́тка шундлэ́ пал дава́, ёнэ холясынэ пэ Яковостэ и Ианостэ.

⁴² Ису́со кхардя́ лэн и ракирэ́ла: “Тумэ́ джинэ́на, со кодолэ́, савэ́н гинэ́на пал барэ́ рандэ пэ Наюдэ́ндэ, рикирна зор тэ хулаинэн пэ лэ́ндэ, и лэ́нгирэ барэ́ рая хулаинэна пэ лэ́ндэ:

⁴³ нэ мэк дава́ тэ на явэ́л машки́р тумэ́ндэ. Одова́, кон камэ́ла тэ явэ́л най барэды́р машки́р тумэ́ндэ, мэк тэ явэ́л дына́ри тумэ́нгэ,

⁴⁴ и кон камэ́ла тэ явэ́л пэ́рво машки́р тумэ́ндэ, мэк тэ явэ́л писха́ри сарэ́нгэ.

⁴⁵ Адя́кэ и Чхаво́ Манушэ́скиро явдя́ на ваш дова́, соб (кай) Лэ́скэ тэ дынаринэ́н (тэ служынэн), нэ соб (кай) Ёв кокоро́ тэ дынаринэ́л и тэ отдэ́л Пэ́скиро джиибэ́н, сыр выкиныбэ́н пал бутэндэ.”

Ису́со Састякирэ́ла Корорэ́ Варимеёс

⁴⁶ И ёнэ явнэ́ дро Ерихо́но. Ке́ли Ису́со выджа́лас Ерихоностыр Пэ́скирэ сыкляибнытконэ́нца и бутэ́ манушэ́нца, короро́ бо́го Вартимеё, Тимеёскиро чхаво́, сыс бэшто́ пашы́л дром.

⁴⁷ И, сыр Ёв шундя́, со дава́ сыс Ису́со Назарянино, ёв лыя́ тэ дэл го́дла: “Ису́се, Чхаво́ Давидо́скиро! Потангинэ (пожалин) ман!”

⁴⁸ И бут мануша́ лынэ́ тэ ракирэ́н холя́са Лэ́скэ, соб (кай) ёв тэ явэ́л штыл, нэ ёв дэ́лас го́дла ишчо (инкэ́) зоралэды́р: “Чхаво́ Давидо́скиро! Потангинэ ман!”

⁴⁹ Ису́со тэрдия́ и пхэндя́: “Кхарэ́н лэс.” И ёнэ кхардэ́ корорэс, ракири́ Лэ́скэ: “Яв муршэса, ушты́, Ёв кхарэ́ла тут.”

⁵⁰ Вартимеё чхурдыя́ криг пэ́стыр упратуно урибэ́н, ухтя и подги́я кэ Ису́со.

⁵¹ “Со тўкэ трэй, соб (кай) Мэ тэ кэра́в ту́кэ?” – пхуця́ Ису́со. Короро́ пхэндя́ Лэ́скэ: “Раввуни, соб (кай) тэ откэрэнпэ Мирэ́ якха́.”

⁵² “Джа́, – пхэндя́ Лэ́скэ Ису́со, – тыро́ патяибэ́н высастякирдя́ тут.” Короро́ ада́й жа лыя́ тэ дыкхэ́л и гия́ пир дром пал Исусо́стэ.