Luka 9 - Библия - Пэ Балтитко Романи чиб (Романэс) 2019

Ису́со Бичхавэ́ла Дэшудуе́н Апостолэ́н

¹ Ису́со кхардя́ кхэтанэ́ дэшудуен Апостолэн и дыя́ лэ́нгэ зоралыпэ́н и зор пэ сарэ́ налачхэ́ ду́хи и тэ састякирэн манушэ́н насвалыпнэндыр,

² и бичхадя́ лэн тэ пхэнэ́н лав пал Дэвлэ́скиро Кралипэ́н дро Болыбна́скиро Раё;

³ и пхэндя́ лэ́нгэ: “На лэн пэ́са нисо́ пэ дром: ни дэсто́, ни саква, ни маро́, ни руп и на лэн дуй гада;

⁴ и дро вари-саво́ кхэр тумэ́ заджанас, ячэ́нпэ одо́й и одотхы́р тумэ́ явэ́на тэ джа́н пэ́скэ;

⁵ а ко́ли вари-кай тумэн на прилэ́на, то тэды выджа́н яври́, тринскирэн бла́та тумарэ́ ґэрэндыр, сыр допхэныбэ́н пэ лэ́ндэ.”

⁶ Сыкляибны́тка гинэ́ пир сарэ́ гава́, ёнэ миштопхэнэнас бахталы́ зан (звесь), высастякирэнас усенде (везде).

И́родо Пиридживэ́ла и Дарэ́ла

⁷ Ке́ли Иродо, саво́ сыс хула́й пэ шта́рто паш (тетрархо) Юдэ́нгирэ Кралипнастыр, шундя́ пал саро́, со Ису́со кэрдя́, ёв на джиндя́, со тэ думинэл: пал-дова́ со екх ракирдэ́, со дава́ сыс Иа́но, саво́ отджидыя́ мулэ́ндыр;

⁸ а яви́р ракирдэ́, со дава́ Или́я явдя́; а трита ракирдэ́, со дава́ сыс екх ґаратунэ́ пророкэндыр отджидыя́.

⁹ И Иродо пхэндя́: “Мэ отчингирдём шэро́ Ианоскэ; а кон исын жа Адава́, пал Конэ́стэ мэ шунава дасаво?” И ёв родыя тэ дыкхэ́л Исусо́с.

Ису́со Чалякирэ́ла Пандж Тысёнцы Манушэ́н

¹⁰ Апо́столы явнэ́ палэ и роспхэндлэ́ Исусо́скэ пал саро́, со ёнэ кэрдэ́. Ёв лыя́ Пэ́са лэн и ёнэ дуринэ пэ чхучо́ штэ́то, пашы́л фо́ро, саво́ кхардяпэ Вифсаида.

¹¹ Ке́ли мануша́ шундлэ́ пал дава́, ёнэ гинэ́ пал Лэ́стэ, и Ису́со прилыя́ лэн и ракирдя́ лэ́нца пал Дэвлэ́скиро Кралипэ́н дро Болыбна́скиро Раё и высастякирэлас кодолэ́н, савэ́нгэ састякирибэн трэиндя́.

¹² Нэ дывэ́с гия́ кэ бэльвэ́ль, и дэшуду́й сыкляибны́тка явнэ́ и пхэндлэ́ Исусо́скэ: “Отмэк манушэ́н, мэк ёнэ тэ джа́н дрэ пашатунэ́ гава́ и гаворэ тэ ратькирэн и тэ латхэ́н тэ хан; пал-дова́ со амэ сам ада́й пэ чхучо́ штэ́то.”

¹³ Нэ Ису́со пхэндя́ лэ́нгэ: “Дэн тумэ́ тэ хан лэ́нгэ.” И ёнэ пхэндлэ́: “Амэ́ндэ буты́р нанэ, сыр пандж марэ́ и дуй мачхэ́, ци амэ́нгэ тэ джас тэ кинас хабэ́н ваш сарэ́ адалэ́ манушэ́ндэ?”

¹⁴ Пал-дова́ со сыс лэн пашэ́ пандж тысёнцы мануша́. Нэ Ису́со пхэндя́ Пэ́скирэ сыкляибнытконэ́нгэ: “Бэшлякирэн лэн рядэнца пир пандждэша́ мануша́.”

¹⁵ И ёнэ кэрдэ́ адя́кэ, и бэшлякирдэ сарэ́н.

¹⁶ А Ису́со ж лыя́ пандж марэ́ и дуй мачхэ́, ґаздыя́ якха́ пэ болыбэ́н, бахтякирдя́ лэн, пхагирдя́ и дыя́ сыкляибнытконэ́нгэ, соб (кай) ёнэ тэ роздэн манушэ́нгэ.

¹⁷ И ханэ́ и сарэ́ чалынэ; и ячнэ́пэ дэшуду́й корзи́ны (кхудэ́) котэрэнца, дрэ савэ́ ёнэ скэдынэ́.

Пэ́три Пхэнэ́ла анги́л Сарэ́ндэ, Со Ису́со исын Христо́со

¹⁸ Екхвар, ке́ли Ису́со сыс екхджино́ и мангдя́пэ Дэвлэ́скэ, а Лэ́скирэ сыкляибны́тка сыс Лэ́са, Ёв пхуця́ лэ́ндыр: “Пал конэ́стэ мануша́ гинэ́на Ман?”

¹⁹ Ёнэ отпхэндлэ́: “Пал Ианостэ Болдэипнаристэ, яви́р-пал Илиястэ; яви́р ракирэ́на, со екх ґаратунэ́ пророкэндыр отджидыя́.”

²⁰ Ёв пхуця́ лэ́ндыр: “Нэ тумэ́ пал конэ́стэ Ман гинэ́на?” Пэ́три отпхэндя́: “Пал Дэвлэ́скирэ Христосо́стэ.”

Ису́со Ракирэ́ла пал Пэ́скирэ Мэ́ньки и Мэрибэ́н

²¹ Нэ Ису́со припхэндя́ шылалэс ни конэ́скэ тэ на ракирэ́н пал дава́.

²² И Ёв адя́кэ-паць пхэндя́, со Манушэ́скирэ Чхавэ́скэ трэй тэ пиридживэл бут мэ́ньки, со Лэс на приґалёна годэпхурэ́ и раша́нгирэ барыдыра́ и лылвари́тка, со Ёв явэ́ла замардо, и со пал трин дывэса́ Ёв отджидёла.

²³ И Ёв пхэндя́ лэ́нгэ сарэ́нгэ: “Ко́ли вари-кон камэ́ла тэ джал пал Ма́ндэ, мэк тэ на думинэл буты́р пал пэ́стэ, мэк тэ лэл трушу́л пэ́скиро и тэ джал пал Ма́ндэ;

²⁴ пал-дова́ со, кон камэ́ла пэ́скиро джиибэ́н тэ зракхэ́л, одова́ хасякирэ́ла лэс, и кон отдэ́ла пэ́скиро джиибэ́н пал Ма́ндэ, одова́ зракхэ́ла лэс,

²⁵ нэ саво́ лачхипэ́н манушэ́скэ, ко́ли лэ́стэ явэ́ла саро́, со Ёв камэ́ла далэ́ свэто́стыр, а кокоро́ пэс ёв хасякирэ́ла, ци кэрэ́ла пэ́скэ чорипэ́н?

²⁶ Пал-дова́ со кон ладжала Ма́ндыр и Мирэ́ лавэ́ндыр, одолэ́стыр и Чхаво́ Манушэ́скиро явэ́ла тэ ладжал, ке́ли явэ́ла дрэ Пэ́скирэ-Дадэ́скири ярко сла́ва свэнтонэ́ Янголэнца,

²⁷ Чачэс, Мэ ракира́ва тумэ́нгэ: ада́й исын вари-савэ́ мануша́, савэ́ на мэрэ́на, ко́ли ёнэ на дыкхэ́на Дэвлэ́скиро Кралипэ́н дро Болыбна́скиро Раё.”

Исусо́скиро Парудыипэ́н

²⁸ Прогинэ́ вари-савэ́ охто́ (бидуе́нгиро дэш) дывэса́, сыр Ису́со пхэндя́ далэ́ лава́, и Ёв лыя́ Пэ́са Пэтрис, Ианос и Яково́с и ґаздыя́пэ пэ бэ́рга тэ мангэ́лпэ Дэвлэ́скэ.

²⁹ Пака Ёв мангдя́пэ Дэвлэ́скэ, Лэ́скиро муй и мина парудынэ, Лэ́скиро муй яця́ тэ зяинэл и парнёл.

³⁰ И, ґа́да, дуй мурша́ ракирдэ́ Лэ́са, савэ́ сыс Мо́йза (Моисеё) и Или́я;

³¹ и савэ́ сыкадынэ болыбна́скирэ зяиныбнаса; ёнэ ракирдэ́ Исусо́са пал Лэ́скиро мэрибэ́н, пир саво́ Лэ́скэ трэиндя́ тэ проджал дро Ерусалимо.

³² Нэ Пэ́три и лэ́скирэ мала́ сыс пхарэ́с сутэ́; нэ ке́ли ёнэ джангадынэ, тэды дыкхнэ́ ёнэ Исусо́с дро зяиныбэн и дуе муршэ́н, савэ́ сыс Лэ́са.

³³ Ке́ли адалэ́ мурша́ отджанас Исусо́стыр, Пэ́три пхэндя́ Исусо́скэ: “Сыклякирибна́скиро! Сыр шука́р амэ́нгэ тэ явас ада́й; кэра́са трин ша́тры; екх Ту́кэ, екх Мойза́скэ, екх Илияскэ – ёв на джиндя́, со ракирдя́.

³⁴ Пака ёв ишчо (инкэ́) ракирдя́ дава́, сыкадыя́ о́блоко и учхакирдя́ лэн; и ёнэ страха́дынэ, ке́ли о́блоко гарадя Мойза́с и Илияс.

³⁵ И сыс шундлы зан облокостыр, сави́ ракирдя́: “Кадава́ исын Миро дро́го Чхаво́, Лэс шунэ́н.”

³⁶ Ке́ли зан пирияця́, Ису́со яця́пэ екхджино́. Сыкляибны́тка сыс штыл и на ракирдэ́ ни конэ́скэ дрэ долэ́ дывэса́, со ёнэ дыкхнэ́.

Ису́со Высастякирэ́ла Раклорэ́с Налачхэ́ Духо́стыр

³⁷ Пэ яви́р дывэ́с, ке́ли Ису́со сыкляибнытконэ́нца гинэ́ тэлэ́ бэрга́тыр, бут мануша́ пирилынэ Исусо́с.

³⁸ И, гада, вари-кон манушэ́ндыр, дыя́ го́дла: “Сыклякирибнарискиро! Мэ древа́н манга́ва Тут тэ дыкхэ́н мирэ́ чхавэ́стэ, ёв исын екх ма́ндэ;

³⁹ на́лачхо ду́хо (фа́но) ухтылэ́ла лэс, и ёв ада́й жэ дэ́ла го́дла и ду́хо (фа́но) мэнчынэла лэс кэ пена мо́стыр; и ду́хо (фа́но) пэ на́бут отмэкэ́ла лэс, ке́ли змэнчынэла зоралэ́с лэс;

⁴⁰ мэ мангдём Тырэ́ сыкляибнытконэ́н тэ вытрадэл ду́хо (фа́но), нэ ёнэ на могиндлэ́ тэ дын ра́да.”

⁴¹ Ису́со отпхэндя́: “О, тумэ́ сан напатяибнаскиро и пхарэ́-манушэ́нгиро ро́до! Кицы́ Мэ ява́ва тумэ́нца и кицы́ Мэ ява́ва тэ вырикирав тумэн? Ян пэ́скирэ чхавэ́с адари́к!”

⁴² Ке́ли тэрнэ́-бэршэнтиро джа́лас, на́лачхо ду́хо (фа́но) радя лэс и лыя́ тэ издралякирэл лэс; нэ Ису́со припхэндя́ на́лачхо духоскэ; Ёв высастякирдя́ тэрнэ́-бэршэнгирэс и отдыя́ палэ лэс дадэ́скэ.

⁴³ И сарэ́ мануша́ дивиндлэ́пэ пэ Дэвлэ́скиро райкано барипэ́н. Ке́ли сарэ́ дэнаспэ дивоскэ, со кэрдя́ Ису́со, Ёв пхэндя́ Пэ́скирэ сыкляибнытконэ́нгэ:

Ису́со Ракирэ́ла пал Пэ́скиро Мэрибэ́н

⁴⁴ “Рипирэн лачхэ́с далэ́ лава́: ‘Чхаво́ Манушэ́скиро явэ́ла отдыно́ дрэ манушэ́нгирэ васта́.’”

⁴⁵ Нэ сыкляибны́тка на ґалынэ́ далэ́ лава́; лэ́нгиро смысло сыс ґарадо лэ́ндыр адя́кэ, со ёнэ на джиндлэ́, пал со Ису́со ракирдя́, а тэ пхучэ́н Лэ́стыр пал дава́ лав ёнэ дара́ндынэ.

Кон исын Най Барэды́р?

⁴⁶ Дасаво пхучибэн сыс пэ ило́ сыкляибнытконэндэ: “Кон исын барэды́р машки́р амэ́ндэ?”

⁴⁷ Ису́со джиндя́, со ёнэ думиндлэ, лыя́ биято́с, чхудя́ лэс анги́л Пэ́стэ,

⁴⁸ и пхэндя́ лэ́нгэ: “Кон прилэ́ла кэ пэ екхэ́с адасавэ́ биято́с ваш Миро лав, одова́ и Ман прилэ́ла, а кон прилэ́ла Ман, одова́ прилэ́ла Одолэ́с, Кон бичхадя́ Ман, кон исын тыкнэды́р машки́р тумэ́ндэ, мэк тэ явэ́л ёв са́мо барэды́р.”

Кон нанэ Про́ти Тумэ́ндэ, Одова́ исын пал Тумэ́ндэ

⁴⁹ Иа́но тэды пхэндя́: “Сыклякирибна́скиро! Амэ дыкхцям манушэ́с, саво́ Тырэ́ лавэ́са вытрадэла налачхэ́ ду́хи (фаны) и амэ припхэндям Лэ́скэ тэ пириячэл, пал-дова́ со ёв на псирэ́ла амэ́нца.”

⁵⁰ Ису́со пхэндя́ лэ́скэ: “На припхэнэн лэ́скэ; пал-дова́ со кон исын на проти тумэ́ндэ, одова́ исын пал тумэ́ндэ.”

Мануша́ Самария́тыр на Прилэ́на Исусо́с

⁵¹ Ке́ли явнэ́ пашылэды́р дывэса́, дрэ савэ́ Исусо́скэ трэиндя́ тэ ґаздэлпэ пэ болыбэ́н далэ́ свэто́стыр, ёв закамдя́ тэ джал дро Ерусалимо,

⁵² и Ёв бичхадя́ выкэдынэ́ манушэ́н анги́л Пэ́стэ; и ёнэ гинэ́ и загинэ́ дро екх Самариякиро гав, соб (кай) тэ кэдэн ваш Лэ́скэ штэ́то тэ откхинёл,

⁵³ нэ мануша́ одо́й на прилынэ́ Лэс, пал-дова́ со Ёв выдыкхця, сыр о ману́ш, саво́ джа́лас пир дром дро Ерусалимо.

⁵⁴ Ке́ли Лэ́скирэ сыкляибны́тка Яково и Иа́но дыкхнэ́ дава́, ёнэ пхэндлэ́: “Раё Дэ́вла! Ко́ли Ту камэ́са, амэ пхэна́са, соб (кай) тэ явэ́л яг болыбна́стыр и тэ хачкирэл лэн?”

⁵⁵ Нэ Ису́со порисия и выракирдя лэ́нгэ, пхэни́: “Тумэ́ на джинэ́на, саво́ ду́хо (фа́но) исын тумэ́ндэ.

⁵⁶ Пал-дова́ со Чхаво́ Манушэ́скиро явдя́ тэ на хасякирэ́л манушэ́нгиро джиибэ́н, а тэ зракхэ́л.” И ёнэ гинэ́ дро яви́р гав.

Мануша́, Савэ Дынэ́ Лав Исусо́скэ тэ Джа́н Лэ́са

⁵⁷ И сыс адя́кэ: ке́ли ёнэ джа́нас дромэ́са, вари-кон пхэндя́ Исусо́скэ: “Раё Дэ́вла! Мэ джа́ва Ту́са, карик и Ту джа́са.”

⁵⁸ Ису́со пхэндя́ Лэ́скэ: “Локхне́ндэ (лисэнды) исын норы, болыбна́скирэ чириклендэ гня́зды (ку́фы), а Манушэ́скирэ Чхавэ́скэ нанэ, кай шэро́ тэ чхувэ́л.”

⁵⁹ Ёв пхэндя́ явирэ манушэ́скэ: “Яв Ма́нца!” Одова́ ж пхэндя́: “Раё Дэ́вла! Мэк ман анги́л тэ гаравав Мирэ́ дадэ́с.”

⁶⁰ Нэ Ису́со пхэндя́ Лэ́скэ: “Мэк мулэ́ тэ гаравэн пэ́скирэ мулэн; а ту, яв, роспхэн бахталы́ зан (звесь) пал Дэвлэ́скиро Кралипэ́н дро Болыбна́скиро Раё.”

⁶¹ И ишчо (инкэ́) яви́р ману́ш пхэндя́: “Мэ джа́ва пал Ту́тэ, Раё Дэ́вла! Нэ мэк ман анги́л тэ розячавпэ мирэ́ сэмэнцаса.”

⁶² Нэ Ису́со пхэндя́ Лэ́скэ: “Ние́кх, кон чхувэ́ла пэ́скиро васт пэ плуго (пхарады) и обдыкхэлапэ палэ, исын на лачхо́ ваш Дэвлэ́скиро Кралипэ́н дро Болыбна́скиро Раё.”