Luka 6 - Библия - Пэ Балтитко Романи чиб (Романэс) 2019

Пхучибэна́ пал Са́вато (Субо́та)

¹ И сыс адя́кэ: пэ яви́р дывэ́с дро пэ́рво са́вато, пэ яви́р Патрадякиро дывэ́с Исусо́скэ пригияпэ тэ джал пир гивитко фэ́лда, и Лэ́скирэ сыкляибны́тка бокхалынэ, и лынэ́ тэ рискирэнас колосы и хан лэн, кхосыи лэн вастэ́нца.

² Вари-савэ́ Фарисе́и пхэндлэ́ лэ́нгэ: “Ваш со тумэ́ кэрэ́на дова́, со нашты́ тэ кэрэ́н дро са́вато?”

³ Ису́со отпхэндя́ лэ́нгэ: “Нау́што тумэ́ на гиндлэ́ дро Свэ́нто Чхиныбэ́н, со кэрдя́ кра́ли Дави́до, ке́ли ёв и лэ́скирэ мала́ бокхалынэ?

⁴ сыр ёв загия́ дро Дэвлэ́скиро Кхэр, и ёв и мануша́ лэ́скирэ ханэ́ свэ́нто маро́, саво́ сыс нашты́ тэ хал никонэ́скэ, а екхэ рашангэ?

⁵ И пхэндя́ Ису́со лэ́нгэ: “Чхаво́ Манушэ́скиро исын Хула́й и пэ са́вато.”

Ману́ш Праличытконэ́ Вастэ́са

⁶ И сыс адя́кэ: Исусо́скэ пригияпэ дро яви́р са́вато тэ заджа́л дрэ синагога и тэ сыклякирэ́л. И сыс одо́й екх ману́ш, савэ́стэ чачо́ (право) васт сыс шуко.

⁷ Лылвари́тка и Фарисе́и дыкхэнас ракхибны́ткэс пал Лэ́стэ, ци на састякирэлас Ёв дро са́вато, соб (кай) тэ латхэ́н бангипэн пэ Исусо́стэ.

⁸ Нэ Ису́со джиндя́, со ёнэ думиндлэ, и пхэндя́ манушэ́скэ шукэ́ вастэ́са: “Ушты́ и тэрдёв машкира́л.” И ёв уштыя́ и тэрдия́.

⁹ Тэ́ньци пхэндя́ лэ́нгэ Ису́со: “Мэ пхучава тумэ́ндыр: со трэй тэ кэрэ́с дро са́вато: лачхипэ́н ци фуипэ́н, тэ ракхэ́с джиибэ́н ци тэ хасякирэс?” Ёнэ сыс штыл.

¹⁰ Ёв подыкхця́ пэ лэ́ндэ сарэ́ндэ, и пхэндя́ кодолэ́ манушэ́скэ: “Протырдэ тыро́ васт.” Ёв протырдыя́, и насвало́ лэ́скиро васт яця́ састо́, сыр и яви́р васт.

¹¹ Ёнэ нашадэ пэс тэды холя́тыр и ракирдэ́ машки́р пэ́стэ, со лэ́нгэ тэ кэрэ́н Исусо́са?

Ису́со Выкэдэ́ла Дэшудуен Апостолэн

¹² И сыс адя́кэ: дрэ долэ́ дывэса́ Ису́со гия́ пэ бэ́рга тэ мангэ́лпэ Дэвлэ́скэ и мангдя́пэ сари́ рат.

¹³ Ке́ли яця́ дывэ́с, Ёв кхардя́ Пэ́скирэ сыкляибнытконэ́н и выкэдыя́ дэшудуен, савэ́н Ёв кхардя́ Апостолэнца:

¹⁴ Симонос, савэ́с Ёв кхардя́ “Пэ́три”, и Ендрис (Андреёс), лэ́скирэ пшалэ́с, Яковонэс и Ианос, Филипос и Варфаламеёс,

¹⁵ Матфеёс и Фомас, Яково́с, Алфеёскирэс и Симонос, савэ́с кхарэнас Зилото (Активисто),

¹⁶ Юдас Яковоскирэс и Юдас Искариотос, саво́ и яця́ Лэ́скирэ здыибнариса (Лэ́скиро здыибнари).

Ису́со Сыклякирэ́ла и Высастякирэла

¹⁷ Ке́ли Ису́со змэкцяпэ бэрга́тыр кхэтанэ́ Апостолэнца, Ёв тэрдия́ пэ роўно (во́рто) штэ́то кхэтанэ́ Лэ́скирэ сыкляибнытконэ́нца; и сыс бут мануша́ Юдэя́тыр и Ерусалимо́стыр, Тироскирэ и Сидоноскирэ штэтэ́ндыр, савэ́ сыс пашы́л мо́рё (дэрья́в):

¹⁸ ёнэ явнэ́ тэ шунэ́н Лэс и тэ высастякирэнпэ пэ́скирэ дукхэндыр; сыс манушэ, савэ́ мэнчындлэпэ налачхэ́ дукхэндыр, и ёнэ высастёнас.

¹⁹ Сарэ́ мануша́ камлэ́ тэ чилавэн Лэс, пал-дова́ со Лэ́стыр выджа́лас зор и Ёв састякирэлас сарэ́н.

Бахт и Калыпэ́н

²⁰ И Ёв ґаздыя́ пэ́скирэ якха́ пэ Лэ́скирэ сыкляибнытконэндэ и лыя́ тэ ракирэ́л: “Бахталэ́ исын тумэ́, савэ́ исын чорорэ́ дро ду́хо, пал-дова́ со тумаро́ исын Кралипэ́н дро Болыбна́скиро Раё.

²¹ Бахталэ́ исын тумэ́, конэ́скиро ило́ исын бокхало пал Дэвлэ́скиро лав, пал-дова́ со Дэвэ́л пхэрдякирэла тумаро́ ило́. Бахталэ́ исын тумэ́, савэ́ ровэна, пал-дова́ со тумэ́ явэ́на тэ радынэ́нпэ.

²² Бахталэ́ исын тумэ́, ке́ли мануша́ явэ́на древа́н тэ бидыкхэн тумэн и, ке́ли ёнэ вытрадэна тумэн и явэ́на тэ обкхарэн тумэн налачхэ́ лавэ́нца и калякирэна тумаро́ лав пал Манушэ́скирэ Чхавэ́стэ.

²³ Явэ́н бахталэ́ и радынэ́нпэ дро дова́ дывэ́с, пал-дова́ со бари мазу́ри (награда) Дэвлэ́стыр ужакирэ́ла тумэн дро Болыбна́скиро Раё. Адя́кэ лэ́нгирэ дада́ кэрдэ́ пророкэнца.

²⁴ Бида тумэ́нгэ, кон исын барвалэ́! Пал-дова́ со тумэ́ндэ ужэ исын локхо джиибэ́н!

²⁵ Бида тумэ́нгэ, конэ́стэ исын саро́, со тумэ́ камэ́на; тумэ́ явэ́на бокхалэ́. Бида тумэ́нгэ, кон салапэ какана́; пал-дова́ со тумэ́нгэ явэ́ла бари ту́га и тумэ́ явэ́на тэ ровэ́н.

²⁶ Бида тумэ́нгэ, ке́ли сарэ́ мануша́ явэ́на тэ ракирэ́н лачхипэ́н пал тумэ́ндэ. Пал-дова́ со адя́кэ кэрдэ́ хоханэ́ пророкэнца дада́ лэ́нгирэ.

Паты́в кэ Вэ́рги

²⁷ Нэ Мэ пхэна́ва тумэ́нгэ, кон шунэ́ла ман: сыка́в паты́в пэ́скирэ вэргэ́нгэ, кэрэ́н лачхипэ́н одолэ́нгэ, савэ́ кэрэ́на чорипэ́н тумэ́нгэ,

²⁸ мангэ́нпэ пал одолэ́ндэ, савэ́ кошэна тумэн и мангэ́нпэ пал одолэ́ндэ, савэ́ нашукар отлыджанапэ кэ тумэ́.

²⁹ Кон пэкавэла тут дрэ чам (шчока), ри́скир кэ ёв яви́р, кон отлэла ту́тыр упратуно урибэ́н, отдэ́ лэ́скэ и гад.

³⁰ Кон мангэ́ла ту́тыр, дэ, и кон исын банго́ ту́кэ, на пхуч лэ́стыр палэ.

³¹ Кэрэ́н дова́ явирэ́нгэ, со тумэ́ камэ́на, соб (кай) яви́р мануша́ тэ кэрэ́н тумэ́нгэ.

³² И ко́ли тумэ́ сыкавэ́на паты́в одолэ́нгэ, савэ́ сыкавэ́на паты́в тумэ́нгэ, саво́ парикирибэн тумэ́нгэ? Пал-дова́ со и грэхи́тка сыкавэ́на паты́в одолэ́нгэ, савэ́ сыкавэ́на паты́в лэ́нгэ.

³³ И ко́ли тумэ́ кэрэ́на лачхипэ́н одолэ́нгэ, савэ́ кэрэ́на лачхипэ́н тумэ́нгэ, саво́ тумэ́нгэ парикирибэн пал дова́? Пал-дова́ со и грэхи́тка кэрэ́на до-паць.

³⁴ И ко́ли тумэ́ дэ́на дро вужлыпэ́н (длуго) одолэ́нгэ, савэ́ндыр тумэ́ ужакирэ́на тэ лэн палэ, саво́ парикирибэн тумэ́нгэ? Пал-дова́ со и грэхи́тка дэ́на дро вужлыпэ́н, соб (кай) тэ лэн палэ адакицык.

³⁵ Нэ тумэ́ сыкавэ́н паты́в тумарэ́ вэргэ́нгэ, кэрэ́н лэ́нгэ лачхипэ́н и явэ́ла тумэ́нгэ бари мазу́ри (награда) Дэвлэ́стыр, и тумэ́ явэ́на Най Вучэдырэскирэ Дэвлэ́скирэ чхавэ́; пал-дова́ со Ёв исын лачхо́ и ваш одолэ́нгэ, савэ́ на парикирэна и ваш налачхэнгэ.

³⁶ Палдава́ явэ́н тангипны́тка (жалиныбнытка), сыр тангипны́тко исын тумаро́ Дад.

Ису́со Сыклякирэ́ла, со Нашты́ тэ Сэндякирэ́с Явирэ́ Манушэ́н

³⁷ На сэндинэ́н, и тумэ́ на явэ́на сэндиндлэ; на бангякирэн, и тумэ́ на явэ́на бангякирдэ; примангэн и тумэ́нгэ явэ́ла примангло.

³⁸ Дэн и явэ́на тэ дэн тумэ́нгэ: явэ́на тэ дэн тумэ́нгэ пхэрды́ ме́ра, и притасадо саро́ тэ явэ́л, би тангипнаскиро (жалимакиро), явэ́на тэ чхувэ́н тумэ́нгэ пал брэг ада́кицы, кицы́ тумэ́ змогинэна тэ лыджа́н; савэ́ мераса тумэ́ меринэна, дасавэ́-паць мераса тумэн явэ́на тэ меринэн.”

³⁹ Ису́со пхэндя́ лэ́нгэ дава́ приме́ро: “Ци могинэ́ла короро́ ману́ш тэ лыджа́л явирэ корорэс? Ко́ли адя́кэ, дуйджинэ́ пэрэ́на дрэ ґанби́н (яма)?”

⁴⁰ Сыкляибны́тко исын на барэды́р сыклякирибнаскирэстыр; нэ ке́ли сыкляибны́тко высыклёла саро́, ёв явэ́ла сыр сыклякирибна́скиро.

⁴¹ Со́скэ ту дыкхэ́са пэ тыкны пхусинка дрэ якх тырэ́ пшалэскири, а баро́ бэрно на дыкхэ́са дрэ пэ́скири якх?

⁴² Ци сыр ту могинэ́са тэ пхэнэ́с пэ́скирэ пшалэ́скэ: ‘Пша́ла, миро! Дэ, мэ вылава пхусинка тырэ́ якхатыр,’ ке́ли ту кокоро́ на дыкхэ́са бэрно дрэ тыри́ якх? Дуемуи́тко, вылэ англэды́р бэрно пэ́скирэ якхатыр, тэды дыкхэ́са, сыр тэ вылэс пхусинка лэ́скирэ якхатыр.

Кашт и Лэ́скирэ Барьякирдэ́ (Пло́ды)

⁴³ Нанэ лачхо́ кашт (дрэ́во), соб (кай) тэ дэл налачхэ́ барьякирдэ́ (пло́ды); и нанэ на́лачхо кашт, соб (кай) тэ дэл лачхэ́ барьякирдэ́.

⁴⁴ Пал-дова́ со кажно кашт уджинэна пир лэ́скирэ барьякирдэ́, тумэ́ на скэдэ́на инжыро хрустостыр сувьенца, и винаградо хрустостыр.

⁴⁵ Лачхо́ ману́ш вылыджала лачхипэ́н лэ́скирэ–илэ́скирэ кучипнастыр, на́лачхо ману́ш вылыджала фуипэ́н лэ́скирэ-илэ́скирэ фуипнастыр; пал-дова́, со исын дро ило́, дова́ ушта́ ракирэ́на.

⁴⁶ Со тумэ́ кхарэ́н Ман, ‘Раё Дэ́вла! Раё Дэ́вла,’ а тумэ́ кокорэ́ на кэрэ́на дова́, со Мэ ракира́ва?

⁴⁷ Кажно, кон явэ́ла кэ Мэ и шунэ́ла Мирэ́ лава́, и кэрэ́ла кэ ко́нцо/яго́ро (сполнинэла) лэн, исын сы́рбы:

⁴⁸ кодова́ ману́ш, саво́ ґаздэ́ла кхэр; и ёв ґанадя хор тэ чхувэ́л фунда́менто пэ бар. И ке́ли яця́ потопо, и пани́ пэкадя́ дро до кхэр, кхэр яця́пэ тэ тэрдёл, пал-дова́ со лэ́скиро фунда́менто сыс пэ бар.

⁴⁹ А одова́, кон шунэ́ла Мирэ́ лава́ и на кэрэ́ла пир лэ́ндэ, исын сы́рбы кодова́ ману́ш, саво́ ґаздыя́ кхэр би фундаментоскиро; ке́ли пэкадя́ пани́ дро лэ́стэ, кхэр ада́й жэ пыя́, и роспыяпэ сарэ́са.”